Read anuak Jööp 19 Bible Online

Jööp 19 - anuak bible

Jööp 19

¹Køøre aløk Jööpi ni kööe,

²na «?Aŋø, a kany mo nyïëdi noo bëëdu nou cwaata yia, naa ööllu öölö ki luup mou en?

³Ennø, kwöre aløny na apaar nou jälla aani, ni wïthu ba laay ki man caru gïï mo reyø dëëra.

⁴Aani, këël mo aano bääyö na adïëri, bääyö manaca doo na cuŋŋa dëëra a keera.

⁵'Ba uuni, dëëtu atïŋu maal bääta, ni tïïyu gïna leth na en bääta ni beeye nyuudhi mar bääyö mara.

⁶'Ba beerra man ŋäyu gø ki man näk mo beeye Jwøk na kïth gïn bääta; ni bee eni na boony aani ka ajääp.

⁷«Ka adïëri møn, aana jwöŋö ni cwïnya oränynyö døc, 'ba bäŋ ŋat mo oduunnö jïra, ni rëëda døc kiper køny, 'ba bäŋ ŋøl luup mo otïïö.

⁸Eni jöö mara ee gëëŋö ni bäŋ kany mo pöödha ki yie. Eni nyeŋ jïëthe 'moa ee wïrö ki muudhö.

⁹Eni wödö mara akäl wøk bääta, ni ö aduda ni käl gø wøk wïïa.

¹⁰Aana wëëk raanynyø ki yïth jammi 'moa bëët ni put bëëtö mara ränynyö. Eni ŋäädhe mara aputh wøk kaamar jaath.

¹¹Wëër mare awëëk liel bääta kaamar maac; ni kwaan aani kaamar nyimän mare.

¹²Jø leny moe bëët gena öö kuna tukge aani; ni kunyge ki buri mo leny deŋ kar bëëtö mara, ni rumge kar bëëtö mara dïër ki twëëre moge.

¹³«Eni nyïïmera atïïe ni karge bäär ki aani, ni ö nyïïawääta bëët ni putge aani wec.

¹⁴Tuuŋwa gena aay buuta; ni ö nyïïawääta moa näk aano ŋïyö ki ge døc ni wïl wïthge ki aani.

¹⁵Jiy mo wø bëëdö paara ki mään mo wø tïny aani, aana kwaange kaamar wëëllö; geni, a raŋge kaamar ŋat mo path.

¹⁶Ŋat tïïc mara wø cwøla cwølø, 'ba eni ba laar jïëy, këël na bëëda naa kwaaya gø ki dhaa kiree.

¹⁷Jam dhaa atïmö ni ŋwääi ni raac jï dhaagø mara; ni tïm nyïïmera kiree ni män ki aani.

¹⁸Këël obwöre moa therø gena männö ki aani; kany wø tïŋa raa jaak ge puta cäänö dëëra ki luup mo reyø.

¹⁹Nyïïawääta bëët moa näk aano ŋïyö ki ge døc, gena männö ki aani; jøøa mëëra ki geni bëët gena døø dëëra.

²⁰Aana dööŋ na cöö keere, ni bødha dhi thøø ki kany mo thiinh.

²¹«Wui nyïïawääta, cwïnynyu päthge ki gïra; kiper cer Jwøk ena dëëra ni pwöta aani.

²²?Aperŋø ni caannu aani en kaawat mana tïïc Jwøki dëëra? ?Aŋø, yïthu kär thum nø ki gïna tägö ri dëël mara?

²³«Wui, doo beerra man göör luup 'moa piny! Wui, doo beerra man göör ge piny yi wëëlö,

²⁴ni göör ge ri kïdi thuwø ni tïïc ni di tieŋø ki twöŋi mar nywïëny wø cwøl ni ayrön, ki göör man wø göör ni tïïc ka nywïëny mo oleenyø, nee bëëde na bäre bäre.

²⁵'Ba aani, ŋääa ni pïëmi mara nut ni kwøw, ni noo tïme na aŋuun nïne, eni öö ni cuŋŋe dï piny.

²⁶'Ba këël køør ränynyö mar buny dëëra man, aani, Jwøk poot jooda joodø ki rïŋ dëëra man.

²⁷Aani ki dëëra, eni jooda joodø; eni jooda joodø ki waŋa kiree, ni beeye aani møn ni patha ŋat mør. Wui! cwïnya lääŋŋa gø døc!

²⁸«'Ba ni näk mo u köö, ni ‹?Caannø gø nidïï nø? Kee tier gïna leth na tägö dëëre käla baŋe keere,›

²⁹ennø, beerra man lwäyu ko opëëllö, kiper wëëc Jwøk kännö ka ajäla mar opëëllö; kanyøgønø, putu ka ŋäc ni da ŋøl luup.»