Read anuak Jööp 22 Bible Online

Jööp 22 - anuak bible

Jööp 22

¹Køøre aløk Elipathi nyï Tëman ni kööe,

²na «?Aŋø, dhaanhø da gïn mo di kønyø dëër Jwøk? ?Këël dhaanhø mo wïïe leer, løny jïre ki man køny Jwøk?

³?Këël mo bëëtö marï tiir, agïnaŋø noo døøyï yi Jwøa en teeki jïre ni met ki gø? ?Agïnaŋø noo duue jïre ni näk uutjïëthe moï tiir?

⁴«?Aŋø, beeye kiper mana lwäärï Jwøk na ö Jwøki na jook ïïni, ni känne ka ajäla bäätï en?

⁵?Aŋø, paa per gïïa bayï na thööth døc, ki raay moï na näk ba thum ki kwaan?

⁶Kiper nyïïmeru gena tïïyï nee cïpge ki dïgïti ki gïn mo bäŋ tiere, ni kälï abïïe wøk dëët jiy ni dööŋge ki dëëtge.

⁷Ni kärï moa no onäk riewi mooø ki pïï, ni mänï jøøa no onäk käci ki cam.

⁸'Ba ïïni, ï bëëdö ni ïïna dhaanhø mo jïre da teek yi ŋöömö bäre, ni wïïï iï tïŋ maal ni ïïno wøørø yie.

⁹Määr thuunhnhi gena cöörï wøk ki ceŋge jaak, ni tïïyï bëët kïïe ni teek.

¹⁰Ni bee tiere ni bëët deŋŋï bäre no owïrö ka abëëbe en, ni ïïno boony lwärri mo cwöba riï,

¹¹ni tïme na muudhö mo ba løny jïrï ki man nëënï, ni caala jwïïö miï ee mwønyø.

¹²«?Aŋø, Jwøk ba bëëdö ni ena maal døc kuya? Neen ceer mø, ge ena maal døc kany mo bäär.

¹³Kiper ï wø köö, na ‹?Aŋø, Jwøk agïnaŋø ni ŋääe? ?Aŋø, Jwøk løny jïre ki man ŋøl luup ki yi muunhnha cøl?

¹⁴Kee eno gëëŋ pöölö mo odhïŋ, ni ba løny jïre ki man joot øøni, ni eni cäädha kar bëëtö mare maalø.›

¹⁵?Aŋø, Jööp, ï poot bëëdö niï caatha øtjööra no oruuö en, ni beeye øtjöör wø cääth jøøa reyø ki yie?

¹⁶'Ba gena laar thøø ni karge poodi, ni tïmge kaamar øtø mo okøøl jwïïö.

¹⁷Kiper gena köö jï Jwøk, ni ‹Wec wa keerwa! ?Aŋø, agïnaŋø ni løny jï Jwøa en teeki jïre ki man tïïc gø dëëtwa?›

¹⁸'Ba bee eni na pääŋ mïëri moge ki gïï mo beyø; kiper manøgønø, aani a cuŋŋö ni kara bäär ki jøø ni reyø yøø.

¹⁹«'Ba jøøa beyø, ränynyö mar jøøa reyø oneenge ni mïn yïthge, ni ö jøøa bëëtge tiir ni buuge ge ni ge köö,

²⁰ni ‹Ka adïëri møn, nyïïmän 'moø gena ränynyö, ni ö jap kwär moge ni waaŋi ya maaci.›

²¹«'Ba ïïni, beerra man dwätï ki Jwøk, ni tïïyï bëët mëër ki gø, 'ba noo tïïyï gïnögø, ïïno jïtï ki bëëtö mo beer.

²²Beerra man jïëyï ciik moa käl dhee, ni kanï luup moe yi cwïnyï.

²³'Ba ni näk mo ïïno duu baŋ Jwøa en teeki jïre, ïïno døø karï. Ni näk japa reyø karge iï tïïö ni bäär ki kar bëëtö marï,

²⁴ni leeŋï japï moa mïërö yi tør jaak, ni ö warkie moï moa tøŋ døc moa käl kanya cwøl ni Öpïr ni leeŋŋï ge yïth nyeŋ kïte,

²⁵køøre nø, Jwøa en teeki jïre otïmö na warkey jïrï, ni tïme na gwel-bïrö mana no ojierø kiperï.

²⁶'Ba ka adïëri møn, yiï omïnni ki eni na en teeki jïre, ni wëëgï täärnyïmï løø maal baŋe, eni na Jwøk.

²⁷'Ba ïïno lämö jïre, ni ö eni ni wïny lam marï, ni ö japa kööŋï kiperge ni cïpï ge jïre.

²⁸Gïï wø caarï nee tïïyï thura karge, ni bëët tarri no orieny nyeŋ jïëthe moï.

²⁹Ni näk da jiy mo geno dwøk piny, ïïno köö, ni ‹Ge tïŋ maal,› køøre Jwøk jøøa no odwøk piny opieme.

³⁰Eni këël jiy moa näk ba waany løny jïre ki man køny geni, ni køny geni ki køør ceŋŋï mo wø bëëdö ni waany.»