Read anuak Jööp 26 Bible Online

Jööp 26 - anuak bible

Jööp 26

¹Køøre aløk Jööpi ni kööe,

²na «?Aŋø, ki jïrï ni ŋata jääk iï cwaa? ?Aŋø, ki jïrï ni ŋata näk bääte opädhö iï piemø?

³?A pwöya ŋø na cïpï jï ŋat mo bäŋ leec wïc jïre? ?Aŋø, da luup leec wïc mo thööth mo iï nyoodhø?

⁴?Aŋø, aŋa na mooc ïïni ki leec wïc ki man caanï luupögø? ?A jwïëy moe na bwøth ïïni ki man cäänï?

⁵«Jwïëc jøøa no othøw kwanynyi ki lwär døc tiet pïï moa en yïth ŋøøm, ge ki jø wø bëëdö na aciel ki geni.

⁶Kar bëët jwïëc jøøa no othøw, na näk kar ränynyö, kär kanø ki nyïm Jwøk, ni bäŋ gïn uum gø ki man ba nëëne jïre.

⁷Eni maal apeere yi bääru jaak mo bäŋ gïrpiny yie; ni wëëk piny cuŋŋö bäät gïn mo bäŋgø.

⁸Eni pïï wëëge bëëtö yïth pøøl moe, ni ö pøølli ni bëëtge ni ba cööti ki peek mar pïï.

⁹Eni dwääy mo ena tar uume uumö; eni pøøl moe wëëge peer waŋ gø ni rïëp gø.

¹⁰Ena kïïö ki waŋkeew bäät naama dwøŋ, ni beeye keew man pääŋ tar ki muudhö.

¹¹Were mo maal, dëëtge wø tïmö ni kwanynyi ki lwär nyïme, ni thäŋ yïthge ki dwør juuk mare.

¹²Eni naama dwøŋ awëëk nikïïl ki teek mare; ni ö lään wø cwøl ni Reeyap ni wëëk gø petø ki køør leec wïc mare.

¹³Jam dhøk mare, maal ajwiee ki gø, ni wëëk thwör wø rïïŋi døc näk ki cere.

¹⁴Raŋŋu, moøgø beege japa nøk jaak røk moa tïïe. Øøni, ø wïnynya moa cari kipere ni di mooŋø mëëth jaak. ?Aŋø, dwøre manø ni teek ni caal dwør odäru enø tiere kwanyi ŋa?»