Read anuak Jööp 29 Bible Online

Jööp 29 - anuak bible

Jööp 29

¹'Ba Jööp ena bëëdö ni poot cäänö ni kööe,

²na «Aŋø ni ba tïme keda a ena yïth nïne moa pöödhö en, kanya bëët Jwøki ni waŋe ena bääta,

³ni lamba mare orieny bääta, ni yi muudhö caadha ka tar mare!

⁴Nïne moøgø beege nïne moa beyø jïra, ni beeye kanya bëët Jwøki na nyawat mara ni koora kar bëëtö mara.

⁵Ni beeye kanya poot Jwøa en teeki jïre ni ena buuta, no obwöre 'moa ge bëëdö deŋŋa;

⁶kanya bëët waŋjöö mara ni thec ki caak, ni maaw bëëdö ni kwönna wøk jïra ki yi kïdi man wø biic nyïïjenni yie.

⁷«'Ba kanya wara cøøa dhi kiir mar pääny, naa pïïa piny kar acooŋa ki dïbwöthe mo pääny,

⁸obwöc cwøw a wø jootge joodø ni jämge aani ki kara, ni ö jø døøŋŋø ni öge maal ni cuŋge.

⁹Kanyøgø dïbwöthe wø puta nidut, ni cïpge ceŋge dhøkge,

¹⁰ni ö kwääri ni micge dhøkge, ni dhäthge ki cäänö.

¹¹Kiper jiy moa wïny luumma aana pwøcge, ni ö jiyi moa joot aani ni køpge gïra.

¹²Kiper aani jiy moa can ni wø many køny, ki kïïe moa näk bäŋ jø göökge rege gena kønya.

¹³Ŋata en um thøø aana gwïëthe, ni wëëga cwïny määr thuunhnhi mïnnö ni wärge ki dudi.

¹⁴Bëënynyö arøøa dëëra kaamar abïï, ni tïïa ŋøl luup ma kare kaamar aleeŋŋa ka abïï man wø loop wïc.

¹⁵Aana bëëdö na waŋ kiper cööye, ni bëëda ni aana tielø kiper ŋööte.

¹⁶Aana bëëdö na wuuö kiper jø wø many køny, ni bëëda naa cwaga wëëlle kar løøk.

¹⁷Lëëmmi mo jø raay atøya, ni ö cam mana en dhøkge ni käla gø wøk.

¹⁸«Aana cädö ni nïr kwøw 'moa thöönhnhö kaamar nyeŋ akwöö, ni thøøa ya abïla mara ki met ec.

¹⁹Aana bëëdö kaamar jaath mo lweedi moe okar ni pïïcge yïth pïï, mo bääte bëëdö no oninør ki thööy ki yi wäär bäre.

²⁰Wödö mara bëëdö ni nyään jïra cooth, ni ö teek dëëra ni bëëde ni nyään.

²¹«Jiy abëëdö ni ge wïnynya luumma ni ge raŋŋa jïra, ni ge wø bëëdö ni ge lïŋö ni ïthge wø cekge ciiø ki luup pwöc 'moa.

²²Kany wø näk mo aano cäännö, ge ba cäänni køøra këët; luup 'moa putge ka wïnynyö na kare.

²³Gena bëëdö ni ge køya aani kaawat man wø koor køth, ni ge bëëdö ni dhøkge ege löö jïra kaawat man wø tïïc jiyi mo lääŋŋa køth.

²⁴Aani jïge wø raŋa raŋø ni met ec yaa nyoodhø jïge kany wø bëëtge ni cwïnyge opädhö, ni jïtge ki cøm cwïny kany wø raŋge täärnyïma ni leer.

²⁵Aana bëëdö ni aana bwödhi marge, ni jëënna geni ki jöör bëëtö man bëëtge ki gø. Aana bëëdö kaamar nyeya yïthakic jø leny moe, naa bëëdö naa caala ŋat wø cïpi ki cøm cwïny jï jø wø näk cwïnyge opädhö.»