Read anuak Jööp 3 Bible Online

Jööp 3 - anuak bible

Jööp 3

¹'Ba køør gïnögø, Jööp dhee ajabe ni cien dïcäŋ mana lwaarø yie ki gø.

³ni «Beerra man ö dïcäŋŋi mana lwaarø yie ki aani ni ränynye, ge ki wäär mana cään jiyi yie kipera, ni ‹Nyilaar dïcwøø alwaarø ki gø!›

⁴Beerra man ö dïcäŋŋi manøgø ni tïme na muudhö, ni ö Jwøki ni en maal ni bäŋe gïn caare kiper gø; beerra man bäŋe tar mo rieny bääte.

⁵Beerra man mayi ya muudhö ki lwøc mo cøl; beerra man rïëpi ya pöölö; beerra man ö dïcäŋögø ni wëëgi ya muunhnhögø lwär.

⁶Beerra man ö wäärri manøgø ni mayi ya muudhö mo cøl døc; beerra man ba mïn yie ki man dwali røk nïne mo cwiir, ni dööŋe wøk ni bäŋ kwäänne ki røk nïr dwäde.

⁷Ka adïëri møn, beerra man ö wäärri manøgø ni dööŋe ni bäŋ gïrpiny yie; beerra man tïme ni bäŋ dwør met ec mo wïnynyi yie.

⁸Beerra man ö jø wø ceen cääŋŋe ni cienge dïcäŋ manøgø; ni beege jøøa näk rege ege jiiŋŋø ki man wëëkge lään wø cwøl ni Lëëwatan ööny maal.

⁹Beerra man ö ceerri mo amöölla mar dïcäŋögø ni tïmge ni cøl; beerra man ö eni ni koor tar mar dïcäŋ ni ba joot gø, ni ö eni ni ba joot tiet-cäŋ ka amöölla;

¹⁰kiper eni mera käre mänö ki man lwaare ki aani, ni käre japa leth gëëŋö ki aani nee ba jooda ki nyeŋŋa.

¹¹«?Aŋø ni ba puta thøø en kanya lwaarø ki aani, ni beeye kanya ööa wøk ki yi mera kiree?

¹²?Aperŋø na cïp a käw ni pïr aani, ni wëëk aani dhøødhø ki thunh mera?

¹³Kiper doo na aano thøw, dee na aano butö ni aano nikïïl en; ni aano butö ni raa yaa jwömö,

¹⁴kaamar nyeye ki jøøa wïthge leer na käär mïëri na gëën dëëtge ki päänye moi no oränynyö dïcäŋi en.

¹⁵Aani doo na rewa ewa jwömö na aciel en ki kwääri moa näk jïge da warkie, na näk uudi moge ege pääŋö ki gwet-bïrö.

¹⁶?Wui, aŋø ni ba bwönna wøk en ki yi mera ni kan aani yi bwörö kaamar nyilaal mo tac cäŋ käre joodø na bäre?

¹⁷Yi bwörö kaace, jøøa reyø japa reyø na wara tïïcge ba tïïcge këët; ni ö jøøa wara bëëdö no oööl ki tïïc ni jïtge ki jwöm.

¹⁸Jiy moa no otwöö ge bëët, ge dööŋ wøk tier tööc, ni bëëtge ni bäŋ dwør kwäärö mo wïnyge bäätge këët mo köömma geni ki tïïc.

¹⁹Jøøa kwörge therø ki moa kwörge døøŋŋø ge ena yi bwörö, ni laŋŋø bëëdö no opädö ni bäŋ teek kwääye bääte.

²⁰«?Aperŋø na cïp tar jï jø wø en yïth gïï mo leth, ni wëëk jiy kwøw moa näk kïmmö ki yïth cwïnyge?

²¹Ni beege jø wø bëëdö ni køya thøø, 'ba thøø ba ööi; ni wø cac thøø døc ni kaala man wø cac jap kwärö mo okoony piny,

²²jøøa näk mïn ec marge ki kanynyø jootge ka kanyo pïïcge yi bwörö.

²³?Aperŋø na cïp kwøw jï dhaanhø mo jööre orwäänyö, mo jööre odëët Jwøki en?

²⁴Kiper kïmmö atïmö na cam mara; ni bëët dwør cooyø mara ni lwör kaamar pïï.

²⁵Gïna lwäära ki gø aö bääta; gïna naa lwäär ki gø døc apänh bääta.

²⁶Aani bäŋ bëëtö mo beer ki bëët jwöm jïra; aani bäŋ jwöm jïra møn, 'ba beege jwør gïï mo leth keerge.»