Read anuak Jööp 30 Bible Online

Jööp 30 - anuak bible

Jööp 30

¹«'Ba ennø, jiy moa näk therø geni ki aani a wø buuge buuö, ni beege jøøa wëëkge kwiera ki man kønyge guu 'moa, nee pïïth dïëga koorge na aciel.

²?Aŋø, teek marge agïne ni dee duuö jïra, ni bäätge onø jöönyö?

³Gena jiy mo odwat ki køør can ki käc. Geni, wø tïme na wäär, ge wø göönna wøk ki lweet jenni yïth ŋøøpa näk otal na en yi ŋöömma näk oränynyö.

⁴Jenni moa näk otuy dïtëën wø puthge wøk ni camge ge, ni tïm cam marge ni beege lweet jenni.

⁵Ge wø rïëma wøk ki yïthakic jiy, ni kwöŋ jøwi bäätge kede gena kuuwe.

⁶Gena cöör wøk nee bëëtge nyeŋ näm moa no otal, ki yïth agäp-kïte ki yïth buri.

⁷Ge bëëdö ni ge jwöŋö yïth atøge ni dëëtge ege diil tiet koodhi.

⁸Ge bëëdö ni gena bøøre ni gena jiy mo bäŋ nyeŋge, ni geno rïëm wøk ki yi ŋööm paac.

⁹«'Ba ennø, nyeŋŋa ege kïth yi duut ni ge kwääk ka gø, ni nyeŋŋa ege tïïö ni beeye gïn wacge yïthakicge.

¹⁰Geni ge män ki aani, ni ge bëëdö ni karge ege jädhö ki aani; ni nyeŋŋa ba wecge ki man ŋuutge gø ki laaw.

¹¹Kiper Jwøk thøør atum mara awëëk nilwak ni tïïc aani naa jääk, ni ö geni ni putge tïmö ni dëëtge ba mänge këët ki man buuge aani.

¹²Ge wø öö ki bäät cwïïa ni gena lwaak ni tukge aani, ni cekge abïëp nyïma naa makge ki tieta; ni kunyge ki buri mo leny deŋŋa nee këëtge ki aani.

¹³Geni waŋjööra wø dëëtge dëëdö; ni wëëkge aani ränynyö ni bäŋ ŋat mo jooga geni.

¹⁴Gena öö kede ge dunynyi ka kany mo otuc mo dwøŋ dëër øtø, ni putge rïŋ baŋa,

¹⁵ni ö dëëra ni tïme ni rïïŋö ki lwär, ni ö wödö mara ni cööri wøk bääta kaawat man wø tïïc jamø, ni ö bëët-gööki mara ni pöödhe kaamar pöölö.

¹⁶«'Ba ennø, cwïnya apädhö; ni ö nïne mo jwør gïï mo leth ni bëëtge naa ege maa.

¹⁷Kany wø tïme na wäär, cuu 'moa puta tïmö ni möödö ni rämö; ni rääm mara bëëdö dëëra ni ba maar cuŋŋö.

¹⁸Jwøk abïï mara amaae ki teek mare na dwøŋ, ni møt aani ki lieŋ koothi mara.

¹⁹Eni aana leeŋ yo odhöönh, ni puta tïmö kaamar tør ki bur.

²⁰«Wui, ï na Jwøk, aana jwöŋö riï kiper køny, 'ba ï kär duunnö jïra; ni cuŋŋa nyïmï, ni bëëdï ni waŋï iï këël dëëra jaak.

²¹Ïïna tïïö dëëra ki gïn mo raac, ni ö bëëtö mara ni døøyï gø mo leth ki badï na teek.

²²Ïïni, aana leeŋï maal yi jamø, ni ö jamø ni køøl aani; ni ö ïïni ni cäŋï aani leeŋ ya atuunna.

²³Aani ŋääa naa kïthï piny kar thøø, ni beeye kanya no ojiiŋŋø na kar røømmø kiper gïïa kwøw bëët.

²⁴«Ka adïëri møn, cenø bäŋ wø tïŋ maal bäät dhaanhø mo oränynyö kany wø jwöŋe kiper køny yi bëëtö mare na leth.

²⁵?Aŋø, a bäŋ wø jwöŋi kaper jøøa en yi bëëtö mo leth? ?Aŋø, cwïnya bäŋ wø kïmmi kaper jøøa can?

²⁶'Ba kanya bëëda ni cwïnya da ŋäädhe ni da gïn mo beer mo öö, atïmö ni ööa gïn mo raac; ni ö kanya bëëda naa køya tar ni tïme ni ööa muudhö.

²⁷Aani cwïnya bëëdö no oränynyö jaak ni bäŋ jwöm mo jooda; ni ö jwør gïï mo lethi ni bëëtge ni ena nyïma.

²⁸A bëëdö naa kïmmö ni bäŋ cøm cwïny mo jooda; naa wø cuŋŋö dï lwaak naa jwöŋö kiper køny.

²⁹Dwør oduuru mara atïmö kaamar dwør othöö, ni ö dwør kïmmö mara ni tïme kaamar dwør tula.

³⁰Buny dëëra atïmö ni cøl; ni tïm dëëra ki cuu 'moa ni waŋŋi ka adïrïgi.

³¹Kiper manøgønø, thoom mara dwøl mare aniida baŋ dwør kïmmö, ni ö dwør opelø mara ni wiila gø baŋ dwør oduuru.»