Read anuak Jööp 31 Bible Online

Jööp 31 - anuak bible

Jööp 31

¹«Aani nyeŋŋa amäna ki man neena nyakøø ni cwïnya pärö ki gø.

²?Agïnaŋø noo cïp Jwøki mana en maal jï dhaanhø, ni beeye mano tïmö na kure ki baŋ Jwøa en teeki jïre na en maalø?

³?Aŋø, patha ränynyö kiper jø wø tïïc raay, ki ööny gïn mo leth bäät jø wø tïïc gïï mo reyø?

⁴?Aŋø, Jwøk, uutjïëth bëëte 'moa bäŋ wø raŋŋe, ni kwar kwör cääthe mo tieta bëët?

⁵«Ni näk maa caatha øtjöör tööt, ni tieta løpa køør luup cwøk,

⁶doo beerra man ö Jwøki ni kïth gïïa tïïa bäät gïr røm mana näk kare, nee joode ki man näk mo bëëtö mara tiir.

⁷'Ba ni näk mo aano gaa wøk ki øtjöö, ni tïm cwïnya ni bwøtha nyeŋŋa, wala ceŋŋa bëëdö ni ba waany,

⁸doo beerra man ö japa piidha ni cami ya jø møøki, ni ö gïïa piidha ni pudhi wøk.

⁹«Ni näk mo aano pätö ki dhaagø mør ki cwïnya, wala a leewa dhi øtø mar cï ŋat atut mara,

¹⁰doo beerra man ö dhaagø mara ni tïme na ŋat tïïc jï dïcwøø mør, ni buut cwøwi møøk ki gø.

¹¹Kiper gïnögø doo tïmö na bääyö mo raac døc, ni tïme na raay mo duunnö ka ajäla.

¹²Ni tïme na maac mo wääŋö, ni räänyö këël mano këët kar bëët jwïëc jøøa näk othøw, ni dee japa moa näk yaa joodø bëët raanynyø.

¹³«Doo naa cwøw ki mään moa näk jø tïïc 'moa luup moge yaa taaø, kanya dwaalge ki nyeŋŋa,

¹⁴?agïnaŋø ni daa dwøgø jï Jwøk kanyo pëëny aani? ?Na agïnaŋø ni daa løø jïre kanyo cwøl aani kar løøk?

¹⁵?Aŋø, Jwøk na cwääc aani ec, paa eni na cwääc jøøgø thuwø? ?Aŋø, ba poot na eni na cwääc waani yïth mëëkwa?

¹⁶«'Ba aani, gïïa many jøøa canni kära mänö, ni waŋ cï thøø kära tïïö ni can;

¹⁷aani cam mara kära camø na a keera, ni ba pääŋŋa ko obwöre moa näk kïïe.

¹⁸'Ba ki mana täge ki yïth nïr thïnhö mara, a wø pïïdhö ki kïïe, naa bëëdö kaamar wääge, naa bëëdö naa gwøga määr thuunhnhi cooth.

¹⁹Ni näk mo da dhaanhø mo yaa joodø mo manynya thøø ki can abïï, wala dhaanhø mo cäädhi ka dëëre,

²⁰ni käre aani gwïëdhö ki yi cwïnye, kiper mana kära dëëre wëëk murrö ki jïëc rööm 'moa;

²¹ni cera yaa tïŋ maal bäät obwöre moa näk kïïe, kiper mana ŋääa gø naa di cwaaø kar løøk,

²²doo beerra man ö bada ni pudhi wøk göönna, ni put toor ki waŋ mutö.

²³Kiper a lwäär ki ränynyö man wø ööi ki baŋ Jwøk, ni ba løny ki man tïïa ki gïn mo raac kiper a lwäär ki dööŋ-kar mare.

²⁴«Doo na cwïnya bëëdö ni ŋäätha warkey, ni aano köö ni warkey mana tøŋ beeye kar gwøk røk mara;

²⁵ni yia omïnnö ki jap kwärö 'moa na thööth, ni beege japa tïïa ki ceŋŋa;

²⁶ni aano lwïthö baŋ cäŋ ni jooda gø no orieny, wala dwääy yaa lwiidhø ni cäädhi ka ajiem mare,

²⁷ni tïm cwïnya ni ena køørge, ni nuuma cera ki dhaa, ni mara wøør ge,

²⁸gïïögø thuwø doo tïmö na raay ni känne ka ajäla bääta, kiper doo tïmö naa kwiera Jwøk na en maal.

²⁹«?Aŋø, aani, yia wø mïnnö wø bëëde ki gïn mo leth mo tägö dëër nyimänna, wala a wø kanynyø kiper gïna leth na ö bääte?

³⁰Ba doo løny; aani, dhaa wø köömma köömmö nee ba cääne ki raay, ki man ciena jwïëc ŋatøgø.

³¹?A jø wø bëëdö paara, ge bäŋ wø köö na bëëde, na ‹?Aŋa ni kär jäŋ ki cam mo met po Jööp?›?

³²Bäŋ wëëllö mo yaa wëëk but thääŋ jöö ki wäär, kiper dhi øtø mara bëëdö ni yaa jabø jaak kiper wëëlle.

³³?Aŋø, raay 'moa yaa kanø kaawat man wø tïïc jiyi, ni gïï mo reyø yaa kan cwïnya,

³⁴kiper mana lwäära ki jiy døc, ni aano bwøk ka ataa mar tuuŋa, ni puta bëëtö en ni aano nikïïl naa ba døny wøk?

³⁵«Wui! ?Aŋø ni bäŋe ŋat wïny dwøra en? Raŋï, ŋïï mara kee en, beerra man ö Jwøa en teeki jïre ni duunne jïra! Beerra man ö ŋati ni löö ki aani en ni göör luupa piny.

³⁶Ka adïëri møn, daa käärö ki göönna, ni kïtha gø wïïa kaamar aduda.

³⁷Aani kwör cääthe mo tieta daa caanø jïre, ni daa cäänö nyïme kaawat man wø cään kwäärö.

³⁸«'Ba ni näk mo pwöth 'moa a ege jäälö, ni kwöra no opuurö 'moa ge jwöŋö ni pï nyeŋge øya piny,

³⁹ni jap wø ciek yi pwödhö cama ni jø tïïc ba cunna, ni cwïny jø tïïc wø raanynya raanynyø,

⁴⁰doo beerra man tuc koodhi kar beek wø cwøl ni cïndë, ni tuc luummi kar beek wø cwøl ni gäbci.»[1] Luup Jööp gena ŋuudö kaagø nø.