Read anuak Jööp 32 Bible Online

Jööp 32 - anuak bible

Jööp 32

¹Kanyøgø jøøgø na adäk yøø gena lïŋö ki man dwökge ki luubö jï Jööp, kiper mana kööe ni bëëtö mare tiir ki baŋe.

²'Ba Eliyu wär Barakel nyï Buc, na käl dhi øt Ram, yie awaaŋ ki gootø døc ki Jööp kiper mana kööe ni bëëtö mare tiir ki nyïm Jwøk.

³Eni thuwø, yie awaaŋ ki gootø ki nyïïawääte moa na adäk kiper mana dhäthe jïge ki man dwökge ki luubö ma kare jï Jööp, këël na bëëtge ni Jööp ege jäälö.

⁴'Ba Eliyu, kiper mana näk mo eni thiinh, jøøgø akoore nee kwøŋge cäänö ki Jööp.

⁵'Ba Eliyu, kanya joot jøøgø na adäk yøø ni bäŋ luubö ma kare mo ege dwøgø, yie awaaŋ ki gootø.

⁶Kanyøgønø, Eliyu wär Barakel nyï Buc ena köö, ni «Aani, a thiinh ki cwiiri, 'ba uuni u døøŋŋø; kiper manøgønø, aana lwäyö ki man caana acaara mara jïïu.

⁷Aani, aana cädö ni ‹Dhaanhø mo dwøŋ beeye na doo cäänö, ni ö dhaanhe mo cwiiri moe thööth ni dee pöö ki luup leec wïc.›

⁸'Ba beeye Jwïëc Jwøk ni wø en dëër dhaanhø, ni beeye jam dhi Jwøa en teeki jïre ni wø cïp kwany tiet luup jï gø.

⁹'Ba patha ŋata dwøŋ keere ni wø wïïe leer, ni patha ŋata cwiiye thööth keere ni wø kwany tier gïrpiny ma kare.

¹⁰Kiper manøgønø, aana köö, ni ‹Cegu ïthu jïra; aani thuwø acaara mara caana caanø jïïu.›

¹¹«'Ba ka adïëri møn, aani uuna køya ki cäänö maru, naa bëëdö ni ïtha yaa ciiø kanya bëëdu nou määnyö ki luup leec wïc mo caannu.

¹²Aana bëëdö ni ïtha yaa ciiø døc baŋu; 'ba bäŋ dhaanhø dëëtu mo bääyö mar Jööp ee joodø, ni bäŋgø thuwø mo luup Jööp ee løø na adïëri.

¹³Käru köö, ni ‹Waana jiy mo wïthwa leer; beerra man ö Jwøki ni bööt Jööp, ni patha dhaanhø.›

¹⁴'Ba Jööp na cääne, ba cäänö ka aani, naa ba dwök baŋe thuwø ki luubö kaawat mana caannu.

¹⁵«'Ba jøøgø yïthge athäŋŋö, ni bäŋe gïn mo ege dwøgø këët; ni tïmge ni bäŋ gïn mo maar lønyø jïge ki caan.

¹⁶?A aani, løny ki man kura këët? Kee ge bëëdö ni geno nikïïl, ni ge cuŋŋö kaace jaak ni bäŋ dhaanhø mo dwögi.

¹⁷'Ba aani thuwø, mara løøa løø; aani thuwø, acaara mara caana caanø.

¹⁸Kiper aani jïra da luup mo thööth mo caana caanø; jwïëy moi ni dëëra en a ege wëëk cäänö.

¹⁹Yia bëëdö kaamar opïr pïën mo päŋ ki køøŋø, mo manynya man cööde.

²⁰Aani, a cäänö naa jïta ki jwöm; aani, dhaa jaba jabø ni dwöga ki luubö.

²¹Aani, bäŋ dhaanhø mo jeenya, ni bäŋ dhaanhø mo mwødha;

²²kiper doo na aana ŋat mwøth, ŋata cwääc aani doo laar öö ni dee aani kälö.»