Read anuak Jööp 33 Bible Online

Jööp 33 - anuak bible

Jööp 33

¹«'Ba ennø, ï na Jööp, cek ïthï ki luup 'moa, ni wïnynyï luup moi bëët ni caana jïrï en.

²Ennø, aani a ena bäät man jaba dhaa naa cääna, ni luup oløny ni ena bäät buny dhaa kiree.

³Ni luupa moi ni caana ii käla yi cwïny mo thïïŋ, ni luup mo wø ö wøk ki dhaa beege gïï mo ŋääa ni gena adïëri.

⁴Jwïëc Jwøk bee na cwääc aani, ni ö jam jwïëy mar Jwøa en teeki jïre ni wëëk aani kwøw.

⁵'Ba ni näk mo løny jïrï, duunnï jïra ni mø, jek riï nø, ni ööï ni cuŋŋï nyïma ki luup moï.

⁶Aani cøøn, a rööma ïïni ki nyïm Jwøk, naa käla ro odhöönh thuwø.

⁷'Ba ennø, ï ba doo lwäyö ki aani, kiper cera ba tïmö ni peek bäätï.

⁸«'Ba ka adïëri møn, ïïna cäänö ni wïnyö jïra, ni luup moa caanï aputa wïnynyö kiree.

⁹Ïïna köö, ‹Ni bëëtö mara beer, ni bäŋ gïn mo ogwäyö jïra, naa bëëdö naa waany ni bäŋ raay mo yaa tïïö.

¹⁰'Ba Jwøk anø määnyö ki jöö mør man jääl aani ki gø, naa ee nø kwaan kaamar nyimän mare.

¹¹Eni tieta akïth yïth orøge, ni bëëdö ni neeta uutjïëthe 'moa bëët, naa jääle.›

¹²«'Ba ennø, ï na Jööp, a cäänna ïïni, marï patha kare, kiper Jwøk dwøŋ døc ni kaala dhaanhø.

¹³?Aperŋø ni pïëmï ki Jwøk en, ni kööï ni luup moï ba duue?

¹⁴Kiper Jwøk løny jïre ki man cääne ki luup ki uutjïëthe ma teeŋi, 'ba dhaanhø wïïe ba caare ki luup mo gø.

¹⁵Kany wø tïme na wäär ni jiy obutö døc kwör niine moge, Jwøk cäänö ki jiy ki yïth lääk ki ri jammi mo wø nyooth ki yi wïc ki wäär,

¹⁶ni jap ïthge ki man wïnyge dwøre, ni wëëk geni bwøk ki köömmö mare,

¹⁷ni mare duu geni wøk ki uutjïëthe moge na reyø, ni mäna geni ki bëët atöör;

¹⁸kiper nee jwïëcge pieme dhi buur, ni gwøk jwïëy moge ki thøw opëëllö.

¹⁹'Ba Jwøk løny jïre thuwø ki man jook dhaanhø ki täw, ni wëëk gø but bäät pëëm ni rämö, ni cuu moe ojøøny.

²⁰Ni put tïmö ni cwïnye ba many cam, ni cwïnye bëëdö ni cøl ki caammi moa no ojierø.

²¹Ni ö dëëre ni dwade døc, ni tïm cuuwe ni nëënö wøk jaak.

²²Ni tïm kare ni cään ki thøø, ni ö bëët kwøw mare ni tïme ni ena cer nyïïatwiel mar thøø.

²³«'Ba ki røk nyïïatwiet maal ma kuma, doo na da aciel mo ena løøe mo cäänö kipere, ni para wï gø ki gïna dee tïïö,

²⁴ni nyootha bäth ec mare jïgø, ni kööe, ni ‹Piem eni dhi thøø, kiper aana jïtö ki gïn mo wïïla eni wøk,›

²⁵kanyøgønø, rïŋ dëëre doo cäŋa tïmö kaamar rïŋ dëër nyilaal mo poot thiinh, ni dee døø kare ni teek ni caala yïth nïr wøp moe.

²⁶Ni läme jï Jwøk, ni ö Jwøki ni jïëc mare, ni neen täärnyïm Jwøk ni put kwöŋŋö ki met ec, kiper mana dwøgi ya Jwøki kare ri bëëtö mare mana tiir dïkwøŋ.

²⁷Køøre nø, eni wär ki duut nyïm jiy, ni kööe, ni ‹Aana bääyö møn, ni raanynya gïna näk adïëri, 'ba ajäla mana dee aani jäälö ki gø kär tïïc Jwøki.

²⁸'Ba eni jwïëya apieme cer thøø; 'ba ennø, a puta bëëtö yi tac kwøw.›

²⁹«'Ba ka adïëri møn, Jwøk teeŋ gïïögø bëët wø tïïe tïïö jï jiy ki kwör møøk,

³⁰ni mare piem jwïëy mo dhaanhø dhi thøø, kiper nee dhaanhø bëëde yi tac kwøw.

³¹«'Ba ennø, ï na Jööp, cek ïthï ni wïnynyï luumma; niïkïïl, naa cäänna.

³²'Ba nee da gïn mo løgï løø, caanï jïra; cäänï, kiper a manynya gø niï ŋunni ni marï beer.

³³'Ba ni näk mo bäŋgø, cek ïthï jïra; niïkïïl, kiper niï läwa pwönynyö ki luup leec wïc.»