Read anuak Jööp 35 Bible Online

Jööp 35 - anuak bible

Jööp 35

¹Køøre Eliyu abëëdö ni poot cäänö ni kööe jï Jööp,

²na «?Aŋø, iï caarø ni beeye gïn ma kare ki man kööï ni bëëtö marï tiir ki nyïm Jwøk?

³Kiper ïïna köö jïre, na ‹?Agïnaŋø noo jooda wala noo duue jïra ki køør mano bëëda ni raa yaa mänö ki raay?›

⁴«'Ba ennø, løøa løø jïrï, ni bee ïïni ki nyïïawäätï moø ni buutï yøø.

⁵Lwïthï maal mø ni raŋï gø; raŋ pøøl moø ni en maal kuya yøøke ki ïïni.

⁶?Aŋø, ni näk mo ïïno bääyö, da gïn mo raanynye dëër Jwøk? ?A ni näk mo da gïï mo reyø mo thööth mo iï tïïö, agïnaŋø noo raanynye dëër Jwøk?

⁷?'Ba ni näk mo bëëtö marï tiir, agïnaŋø na cïpï jï Jwøk, wala agïnaŋø na joode baŋï?

⁸Rääö marï guta jiy mo caala ïïni, ni ö bëënynyö marï ni gut teeŋ jøøgø thuwø.

⁹«Jiy ge jwöŋö kiper caannø mana päl bäätge. Geni, ge jwöŋö kiper køny nee bøthge ceŋ jøøa en teeki ceŋge.

¹⁰'Ba bäŋ dhaanhø mo pëëö, ni ‹?Jwøk en kaa na cwääc aani, Jwø wø wëëk wa wär dudi ki wäär,

¹¹ni wø pwöny wa døc ni kaala man pwöny lääy mo bäät piny, ni wïthwa ee tïïö ni leer ni kaala weny mo maal?›

¹²Eni, kany wø bëët jøøgø ni jwöŋö, bäŋ gïn mo løøe, kiper atöör mana en cwïnyge, ge na jø raay.

¹³'Ba ka adïëri møn, Jwøk ïthe ba ciie ko oduuru mo bäŋ tiere; ni eni na en teeki jïre bäŋ gïn caare kiper teeŋ gïnögø.

¹⁴A ïïni nø, ï na Jööp, dwørï owïny Jwøki nidïï, ni kööï ni eni kärï joodø en, ni luubö marï ena nyïme niï koora eni!

¹⁵'Ba kiper mana bëët Jwøki ni gootø mare ee jooø ki man tïïy ajäla, ni raac jiy ba raŋŋe døc,

¹⁶ï na Jööp, dhiï aŋammï ki luup mo bäŋ tietge; ni kaathï cäänö marï ki luup mo tøør ri leec wïc.»