Read anuak Jööp 37 Bible Online

Jööp 37 - anuak bible

Jööp 37

¹«Wui! Gïnögø wenyø mara atïïe ni pöödö døc, ni manynya pär wøk kare.

²Cegu ïthu, ni wïnynyu märö mar dwør Jwøk man ni ö wøk ki dhee ni lwör døc en.

³Eni agaackøth mare di meenyø ki maal, ni put tac gø jääŋŋö yïth tuk piny.

⁴'Ba noo tïme na køøre, dwør Jwøk wø märö, eni määr døc ki dwøl mo dwøŋ. 'Ba kany wø wëëk dwøre märö, agaackøth ba jooe.

⁵Dwør Jwøk wø märö, ni tïïe ki gïï mo døøŋŋø mo ec thäŋŋö ki ge; eni gïï mo døøŋŋø wø di tïïö ni bäŋ ŋat mo kwany tietge.

⁶Kiper eni wø köö jï pey, ni ‹Pänhnhu bäät piny,› ni kööe jï køth, ni ‹Lwörï døc ni øyï piny ni teek.›

⁷Ni put tïïe mo jiy wëëk cuŋŋö, ni ö jiyi bëët ni ŋäcge tïïe mo gø.

⁸Ni ö lääyi mo paap ni kaange rege, ni putge bëëtö kwörge ni ge ba ö wøk.

⁹Atuunna wëëge kwön wøk ki kar kän mare, ni put kännö ki köö ki yi jamø mo teek døc.

¹⁰Jam jwïëy mar Jwøk piiø di tïïö, ni ö pïïyi ni makge rege ni teek døc.

¹¹Eni pøøl wø pääŋe pääŋö ki pïï, ni wëëk agaackøth mare nigaaŋ ni put keethø yïthakicge.

¹²Eni pøøl tïïe tïïö nee cääthge bäät piny bäre ki køør dwøre, nee gïïa kööm ge ki ge tïïcge.

¹³Eni køth wø wëëge pädhö bäät piny, ni ki kwör møøk mare ajäla, wala eni jwøya piny ni mare nyooth mëër mare ni wø ba jøøl.

¹⁴«'Ba ï na Jööp, cek ïthï ki gïn, ni cuŋŋï ni caarï tiet luup mo Jwøk moi ni thääŋ ec ii.

¹⁵?Aŋø, da gïn mo ŋäyï kiper yi jöö man wø ö Jwøki wø kööm pøøl ki gø, ki kany wø meeny agaackøth mare ki yïthakic pøøl?

¹⁶?Aŋø, da gïn mo ŋäyï kiper yi jöö man bëët pøølli ni lïïrö maal en, ni bee gïï mo rëëma ec ni wø tïïc Jwøki, eni ni wø ŋäc tiet jammi bëët?

¹⁷?A ïïni, ï ni wø dëërï tïmö ni lïëth tier abïïnï, kany wø näk piny onikïïl ki jamø man wø kwönni ki tier-piny,

¹⁸løny jïrï ki man kønyï Jwøk ki tïïc kany wø peer maal, ni ee tïïö ni tøŋ ni paŋŋi kaamar cïläälca?

¹⁹«Aŋø, ï pwönynyï waani wäne nø, nee wa jïtwa ki luubö mo caanwa jï Jwøk; waani bäŋ gïn mo løny ki man caanwa gø, kiper wa bëëdö yi muudhö.

²⁰?Aŋø, løny ki man kööï jï Jwøk, na ‹A manynya gø naa cäänna›? ?Aŋø, da ŋat mo doo pëëö nee eni raany Jwøki?

²¹Bäŋ ŋat mo løny jïre ki man raŋ jï cäŋ kany wø näk mo orieny ni tar døc, ni waŋe otïïc jamø ni tøŋ.

²²Jwøk öö ki wï-piny ka ajiem mo ec thäŋŋö ki gø, mo caala warkey mo tøŋ døc.

²³Jwøa en teeki jïre kaala wïthø, ni teek mare opöödhö; 'ba ki køør ŋøl luup mana näk adïëri, ki bëët bëënynyö mare, bäŋ ŋat manynye nee thiel piny.

²⁴Kiper manøgønø, jiy lwäär ki eni, kiper eni bäŋ wø lwïthi baŋ jø wø köö ki yïth cwïnyge ni wïthge leer.»