Read anuak Jööp 38 Bible Online

Jööp 38 - anuak bible

Jööp 38

¹Køøre Wuuö Jwøk luubö aløøe jï Jööp ki ya atuunna, ni kööe,

²ni «?Man aŋa ni rïëp pwöc 'moa ki muudhö en ki luup mo bäŋ kwänynyö rege?

³'Ba ennø, jek riï kaawat man wø tïïc dïcwøø. Aani, ï pëënynya pëënynyö ki pïëc nee løgï jïra.

⁴«?Ïïni ee, kanya caa tier piny ki cwääc, ï nutö? Caanï jïra, ni näk mo ïïna dhaanhø mo tiet luup ŋäyï.

⁵?Aŋa na tïïc yi lïŋ yi dööŋö mar gø? ?Aŋø, bee ïïni? ?Na aŋa na røm gøøni?

⁶?Aŋø, tier piny ocwää bäät ŋø, wala aŋa na kwøŋ kït gøøt mar gø cwääc,

⁷kanya bëët ceerri mo amöölla ni ge wär na aciel, ni nyïïatwiet maal bëët ge kwöŋŋö ki met ec?

⁸«?Aŋa na cïëk dhøgi mo kwör wø tuul pïïyi ki yïthge mo naama dwøŋ, kanya kwönge wøk ki tiet ŋøøm kuya?

⁹Aani, pøøl atïïa na abïï man uum dëëre ki gø, ni wïra deŋŋe ki muudhö mo cøl døc.

¹⁰Ni tïïa ki nyeŋ kee mo ba løny ki man kaal ge, ni määnynya dhee ko odhuule ki dïdëëdi.

¹¹Køøre aana köö, ni ‹Ï na naama dwøŋ, løny ki man tïŋï riï maal ennø, 'ba kany ba kaalï këët; athaga marï na dwøŋ ŋøl kany nø.›

¹²«?Aŋø, ki mana bëëdï cøøn, amöölla tïïya ïïni nee wø ööe, wala øw wø wëëga ï niwaany,

¹³nee bäät piny nee wø maae bäre, ni wëëk jø raay riem wøk yi gø?

¹⁴Thuuri ka amädi mo bäät piny tïmö ni nëënö kaamar käde mo ena ri dak.

¹⁵Jø wø tïïc gïïa reyø tar marge abïp, ni ö ceŋ moge moa dege tïŋ maal kiper tïïc gïï mo reyø ni tøcge.

¹⁶«?Ïïni, ïïno nø ci yïth jøør mo naama dwøŋ, wala ki man cäädhï tiet pïï yi kut?

¹⁷?Aŋø, dhi kal mar kar bëët jwïëc jøøa no othøw anyooth jïrï? ?Aŋø, dhi kal manøgø ni cøl enø anø jootï?

¹⁸?A dööŋö mar bäät piny bäre ŋäyï? Caanï jïra, ni näk mo gïïögø bëët ŋäyï.

¹⁹«?A jöö man wø coony kar bëëtö mar tar en kaa? ?Kar bëët muudhö en kaa?

²⁰?Aŋø, løny jïrï ki man kïthï ge kwörge? ?Uutjïëthe mo wø ci kwör bëëte moge ŋäyï?

²¹Ka adïëri møn, ŋäyï, kiper ïïno nø nywøl kar kanyaca. Ïïni, ïïno bëëdö ki cwiiri mo thööth.

²²«?Aŋø, ïïna døny yïth uut kän moa näk pey okan yïthge, wala ki man jootï uut kän moøgø,

²³na näk yaa kanø kiper cääŋŋe mo jwør gïï mo leth, ni beege cääŋŋe mo lenye ki mänye?

²⁴?A jööra ŋø ni wø ci kanya näk tar okeethø yie, wala kanya näk jam wø ööi ki kur tuul-cäŋ okeethø yie bäät piny?

²⁵?Aŋa ni wø koony aŋaak man wø pööth pï køthi ki yie, ni wø jiiŋ jöö man wø määr køthi ki yie,

²⁶nee ŋöömma näk bäŋ jiy yie jïte ki pïï, ni beeye kanya näk otal na näk bäŋ dhaanhø yie,

²⁷nee ŋöömma näk oränynyö na näk bäŋ gïrpiny yie bëënynye, ni wëëk gø tuuö ki luum?

²⁸?Aŋø, køth da wänni? ?Aŋa na tïïc ŋïth thööy?

²⁹?Aŋø, rwöc okäla ri ŋø? ?Aŋa na tïïc pey mo wø ööi ki maal,

³⁰kany wø mäk pïïyi ni teek kaamar kïdi, ni bäät pï naama dwøŋ bëëdö no orïëp rwöci?

³¹«?Aŋø, løny jïrï ki man twöyï ceeya cwøl ni joonni? ?Aŋø, løny ki man pätï ceer mo wø cwøl ni wäät-odäki?

³²?Aŋø, ceer moa näk rege ege cooŋø løny jïrï ki man bwøthï ge kanya näk karge, wala ceey wø cwøl ni liec løny jïrï ki man bwøthï gø ki jø wø caath køøre?

³³?A ïïni, ciik mo jap maal ŋäyï? ?Løny jïrï ki man tïïyï ge nee bäät piny kääri ki ge?

³⁴«?Aŋø, løny jïrï ki man cwötï nee dwørï pïïe yïth pøøl, nee køth mo päl päth bäätï?

³⁵?Aŋø, løny jïrï ki man köömmï agaackøth nee cige kanya manynyï, ni köge jïrï, ni ‹Wa ena kany ennø›?

³⁶?Aŋø, aŋa na mooc cwïny ka acaara? ?A kwany tiet luup ocïpa ŋa jï ŋeth?

³⁷?Aŋa ni jïre da leec wïc mo løny ki man kwaan pøøl, wala ki man wëëk køth pädhö keda pïï mo kuny piny ka maal,

³⁸ni tïm tørri no odhöönh mo ree ee maa na aciel, ni ö pølli ni mecge rege na aciel?

³⁹«?Aŋø, ŋuu dwänynyï dwänynyö ki lääy man came, ni wëëgï nyïï ŋuu moa näk onäk käci jäŋö ki cam,

⁴⁰kany wø bëëtge ni geno butö kwör bëëte moge, ni geno møør piny ya abuŋŋö?

⁴¹?Aŋø, aŋa ni wø mooc agaak ki cam, kany wø bëët nyïïe ni ge jwöŋö jï Jwøk, ni ge thääyö kiper bäŋ-cam?»