Read anuak Jööp 4 Bible Online

Jööp 4 - anuak bible

Jööp 4

¹Køøre aløk Elipathi nyï Tëman jïre ni kööe,

²ni «?Ni näk da dhaanhø mo mak cwïnye ni cääne ki ïïni, yiï ränynyö ki gø? ?'Ba aŋa ni løny jïre ki man bëëde ni lïŋö ni ba cäänö?

³Ka adïëri møn, jiy mo thööth apwönynyï, ni wëëgï bäädi moa no onilway tëënnö.

⁴Jiy moa näk bøømmø, dëëtge awëëgï tëënnö ki luup moï, ni wëëgï cøŋŋi moa no jöönyö nithïk.

⁵'Ba ennø, gïï mo leth aläw öö bäätï, ni put yiï ränynyö, ni pïïcge dëërï, ni put cwïnyï bwøk.

⁶?Aŋø, lwär marï ki Jwøk paa beeye cøm cwïny jïrï, ni ö bëëtö marï na tiir ni näk ŋäädhe marï?

⁷«Raŋï døc mø; ?aŋø, da ŋat mo bëëdö ki bëëtö mo beer ni rwäänye? ?Aŋø, da ŋat mo bëëdö ki bëëtö mo tiir ni ränynye na bäre?

⁸'Ba mana ŋääa, jø wø bëëdö ni ge puura raay, ki jø wø bëëdö ni ge piitha gïï mo reyø, nyïï gø kacge kaaø.

⁹Geni, ge di raany jamø mano ö wøk ki dhi Jwøk, ni thøwge ki wëër mare ni wø liel kaamar maac.

¹⁰Ŋuuwe ge märö ni ŋärge, 'ba lak ŋuuwe moa teek otøyi.

¹¹Ŋuu thøw kiper mana käre jïtö ki cam, ni ö nyïï ŋuuwe moa thenh thenh ni keethge.

¹²«Da luubö maa caan jïra no omooŋø, ni beeye luubö mo mooŋa ïtha.

¹³'Ba ni aano butö døc ki niine mo dëëra kuua, aana lägö ki gïn mo cwïnya pärö ki gø,

¹⁴ni ö lwärri ki dïkwany dëël mo dwøŋ ni ö bääta, ni put cuuwi 'moa tïmö ni nhønhnhi.

¹⁵Ni ö gïn mo keda jamø ni pöödhe ki täärnyïma, ni ö dëëra ni neejuk ki lwär.

¹⁶Ni jooda gïnögø ni cuŋŋö, 'ba ba løny ki man ŋiia gø ni kööa ni bee gïn, 'ba gïnögø abëëdö ni cuŋŋö nyïma, ni wïnynya dwøl mo muuŋö mo köö,

¹⁷na ‹?Aŋø, løny jï dhaanhø ki man tïme ni bëëtö mare tiir ni kaala Jwøk? ?Eni løny jïre ki man tïme ni waany ni kaala ŋata cwääc gø?›

¹⁸'Ba ni näk Jwøk këël jø wø tïny gø ba ŋäädhe, ni eni wø jïtö ki gïï mo obaac nyïïatwieli moe,

¹⁹a tugi ki dhaanhø nø, ni bëëdö yi øtø mo tïïc ko odhöönh en, ni tiere kanya käl yie bee yi tør, ni bee gïn wø laar dweny kaamar alweela.

²⁰'Ba wø tïme na akiya amöölla ka abøøya, put gïn mørri ka nyath, ni thøøe na bäre bäre ni bäŋ ŋat mo caar wïïe ki gø.

²¹?Moøge paa beege teeŋ jøøa näk oduŋkaare moge oputh wøk ni putge thøø ni bäŋ leec wïc jïge?»