Read anuak Jööp 41 Bible Online

Jööp 41 - anuak bible

Jööp 41

¹«?Aŋø, løny jïrï ki man tuudï lään wø cwøl ni Lëëwatan wøk ko obïth, wala ki man twöyï leebe ki thøøl?

²?Aŋø, løny jïrï ki man rwaagï thøøl ume, wala ki man magï gø ki lëëmme ko obïth?

³?Aŋø, løny jïre ki man kwaac ïïni nee bäth ec marï nyoothï jïre? ?Aŋø, løny jïre ki man mwøth ïïni ki luup mo met?

⁴?Aŋø, løny ki man jïëc luup moï, kiper nee tïme na laŋŋø jïrï na bäre bäre?

⁵?Aŋø, løny jïrï ki man kwäägï ki gø kaamar wenyø, wala ki man twöï gø piny jï laaŋe moï moa näk nyïïakuue nee kwääkge ki gø?

⁶?Aŋø, løny jï dïgäthe ki man pïëmge kiper gäte nee ŋeewge? ?Aŋø, løny ki man pääŋge gø yïthakicge?

⁷?Aŋø, løny jïrï ki man cööbï kwöt dëëre ka arøøc, wala ki man cööbï wïïe ki waragööy?

⁸'Ba noo kïthï cerï bääte, wär put ŋäc ni leny dagø, ni eni ba cäŋï nwøyø këët na bäre bäre.

⁹Ŋato päär gø ki man mak gø, ba løny jïre, këël ki man neeni ki waŋ bee lwär mo dwøŋ døc;

¹⁰ni bäŋ ŋat mo kam gø, kiper eni wïnni døc. ?A ennø, aŋa ni løny jïre ki man gëëme ki aani?

¹¹?Aŋa ni bääta da pïïdö mare nee eni cunna? Kiper jammi moi bëët ni en tier maal en beege 'moa.

¹²«Aani, a ba lïŋi ki man cääna kiper tiet läänögø, wala teek mare wala yi cwääc mare.

¹³?Aŋa ni løny jïre ki man gööny koothi mare wøk dëëre? ?Aŋa ni løny jïre ki man daŋ kwöt dëëre wøk man ni ree dwalø na ariiø en?

¹⁴?Aŋa ni many man jap dhi gø, kiper nyämme moe bee gïï mo di lwäyö ki ge.

¹⁵Dïŋääe otïïö keda kööt leny mo ocaanø, ni ge bëëdö ni rege gääbö na aciel;

¹⁶ni man nø kare cään ki maya, ni bäŋ jamø mo pöödhi ki yïthakicge.

¹⁷Geni, ge bëëdö ni rege gääbö ki møga, ni ge bëëdö ni rege ege maa ni bäŋ gïn mo pää ge.

¹⁸Kany wø kweere ki tham, tar puta nikwiil, ni put nyeŋŋe mëënynyö kaamar däär cäŋ mar amöölla.

¹⁹Maac mo liel wø ööa wøk ki dhee, ni ö piit maaci ni pele.

²⁰Eni jïrö nitul ki ume, ni tïme kaamar daa thaal mo twak mo othäänhö bäät moonni.

²¹Jam jwïëy mare, bel di äbö, ni ö maaci mo liel ni ö wøk ki dhee.

²²Ŋute bëëdö ni teek døc, ni ŋat wø joot gø puta lwäyö ki gø.

²³Rïŋ dëëre teek, ni ree döötö no ogääbö, ni bëëdö ni teek kaamar nywïënyö.

²⁴Cwïnye teek kaamar kïdi ni ba lwäär, ni bëëdö kaamar kïn guur.

²⁵Kanyo näk mo eno ö maal, jøøa teek ge puta lwäyö, ni putge bwøk ni døøge ŋäthge kany wø tuuŋ ree.

²⁶Këël da opëëllö, wala tøŋ, wala atheerø, wala waragööy mo ööa baŋe, bäŋgø mo bööt gø.

²⁷Nywïënyö mana näk bääŋ kwaane kaamar theeŋ bëëlö, ni kwaan nywïënyö mana näk jwïël kaamar jaath mo otøp.

²⁸Eni ba reŋi ka atheerø, ni kïdi man wø thööri ki gø nëëni keda lethø ki jïre.

²⁹Na athøra neete keda luum mo otal, ni eni wø ŋeethø bäät ŋat wø thöör gø ki tøŋ.

³⁰Ni kwök mo wø en bäp yie beth kaamar piit dak mo othøw, ni kew ŋøøm kaamar gïr dïn man wø tuut dhäki.

³¹Eni kut di tïïö ni wälli kaamar pïï mo twak yi dak, ni tïïc pï naama dwøŋ ni dhulli kaamar maaw mo twak yi dak.

³²Ni kany wø pöödhe ki yie puta nitwääc ni tar, ni put nëënö kaamar jïër mo tar.

³³Eni bäŋ gïn mo rööma gø bäät piny, ni eno cwääö ni bäŋ gïn mo lwääre.

³⁴Eni wø lwïthö baŋ lääy mo wø töödö bëët ni raŋ ge ni ee taaø, ni bëëdö ni ena nyeya bäätge.»