Read anuak Jööp 42 Bible Online

Jööp 42 - anuak bible

Jööp 42

¹Køøre aløk Jööpi jï Wuuö Jwøk ni kööe,

²ni «Aani, ŋääa ni jammi bëët løny ki tïïc jïrï; ni tïïe moï moa näk iï cïp piny, bäŋgø mo kääŋi rege ni ba tïïc.

³Ïïni, ïïna pëëö, na ‹?Aŋa ni rïëp pwöc 'moa ki muudhö en ki luup mo bäŋ kwänynyö rege?› Ka adïëri møn, aana cäänö ki luup mo tietge kära kwanyø na karge, ni beege luup mo rëëma ec mo kaala acaara mara.

⁴Ïïna köö, ni ‹Cek ïthï naa cäänna; aani ï pëënynya pëënynyö nee løgï jïra.›

⁵'Ba aani, luup moï awïnynya ki ïtha, 'ba ennø ïïna jooda ki waŋa kiree.

⁶Kiper manøgønø, aani dëëra ajääla, ni køba raay 'moa naa bëëdö yi tør ki yi bur.»

⁷'Ba Wuuö Jwøk kanya nø caan luupögø jï Jööp, ena köö ki Elipath nyï Tëman, ni «Aana gootø ki ïïni ki nyïïawäätï moa na ariiø, kiper bäŋ luup mo karge mo you caanø kipera kaawat mana tïïc dhaanhnha ma Jööp.

⁸Kiper manøgønø, lwötu ki rwädhe abïriiø ki nyöök rööm abïriiø, ni cou baŋ dhaanhnha ma Jööp ni cïpu ge no olämme mo wø waaŋ bäre kiper dëëtu. 'Ba dhaanhnha ma Jööp olämö kiperu, ni ööa ni jïëa lam mare, ni bäŋe gïn mo tïïa dëëtu këët ki køør bøøl maru. Uuni, bäŋ luup mo karge mo you caanø kipera kaawat mana tïïc dhaanhnha ma Jööp.»

⁹Køøre Elipath nyï Tëman, ki Bildat nyï Cuua, ki Cöpar nyï Nayma, gïna caan Wuuö Jwøki jïge atïïcge; ni ö Wuuö Jwøki ni jïëc lam mar Jööp.

¹⁰'Ba køør kanya läm Jööpi kiper nyïïawääte, bëëtö mare adwøk Wuuö Jwøki kare, ni mooc gø ki jammi mo opöödhö ni kaala moa nut jïre dïkwøŋ.

¹¹Nyïïmenni bëët moa näk cwøw ki moa näk mään, ki jiy bëët moa ŋäc eni dïkwøŋ, gena öö ni cämge ki eni paare. Ni ö geni ni cømge cwïny gø ni nyoothge mëër marge jïgø ki køør japa leth bëët na käl Wuuö Jwøki bääte, ni ö ŋati man nø dëëtge ni cïpe jïgø ki gwet-bïrö ki gwet ïth mo tïïc ka warkey.

¹²'Ba Wuuö Jwøk Jööp agwïëdhe yïth nïr gø moa en cään ni kaala mana dïkwøŋ. Ena jïtö ki rööm ma kume apaar kurŋween, ka athïrööle ma kume abïciel, ki dhää puur ma kume ariiø, ka arëëni ma mädhi ma kuma.

¹³Eni thuwø ena nyöödö ki wääte abïriiø møøk ki nyïïe ma adäk møøk.

¹⁴Nyaare mana dïkwøŋ acaae ni Jemima, ni cak rietge ni Kejia, ni cak dääge ni Keren-Apuk.

¹⁵'Ba bäŋ nyïïakuue mo di joodø tiet mïëri bëët mo mïërö kaamar nyïï Jööp. Ni ö wääge ni mooc geni ki kurge røk jammi moe, ni beege na aciel ki nyïïmëëkge moa näk cwøw.

¹⁶'Ba køør gïnögø, Jööp abëëdö ki cwiiri ma dïpa ki pïëraŋween; ni joot wääte ki nyïïkwaaye këël mana pïïe ri ŋweer beenhnhe.

¹⁷Køøre ena thøw no ojal no ojäŋ ki cwiiri.