Read anuak Jööp 5 Bible Online

Jööp 5 - anuak bible

Jööp 5

¹«Cwötï ennø mø. ?Da ŋat mo wïnynya dwørï? ?A nyïïatwiel maal mane nø noo göögï ree?

²Kiper keec cwïny, dhaanhø mo wïïe ba leer nääe nääö, ni ö gootø ni 'näk dhaanhø ma acaaye thiinh.

³Aana jïtö ki dhaanhø mo wïïe ba leer, mo bëëtö mare cäätha maal ni beer, 'ba paare alaar cien.

⁴Eni nyïïe bëëdö ni kär gwøø, ni geno caarø kar løøk, ni bäŋ ŋat mo cwak geni.

⁵Caammi moe athöör jiyi moa no onäk käci, këël mana këët baŋ moa ciek yïth koodhi; ni ö jap kwärö moe ni thööri ya jøøa näk owär.

⁶Kiper caannø ba ö wøk ka yi tør, ni jwør gïï mo leth ba tuya yïth ŋøøm;

⁷'ba dhaanhø nyöönna jwør gïï mo leth kaawat man wø ö akaraaci mo otal wø gami ya maaci.

⁸«'Ba ki baŋa, beeye man manynya Jwøk; aani luubö mara cïba nyïm Jwøk,

⁹ŋat wø tïïc gïï mo ec thäŋŋö ki ge mo tietge ba løny ki kwany, ni beege gïï mo rëëma ec mo ba thum ki kwaan.

¹⁰Eni køth wø cïbe cïbö bäät piny, ni jääŋ pïï yïth pwöth.

¹¹Eni jøøa kwörge therø wø cïbe kwör mo døøŋŋø, ni ö jø wø kïmmi ni tïŋ ge maal nee bëëtge no ogwøø.

¹²Eni luup mo wø tuut jø wø nyeŋge reegø wø raanynye raanynyø, ni tïme ni bäŋ gïn mo thura kare këët ri tïïe moge.

¹³Eni jø wø ŋääth leec wïc marge keerge wø wëëge mak ka abïëp riek waŋ marge, ni ö japa tuutge ni laar tïmö ni bäŋ tietge.

¹⁴Muudhö wø nijïïm bäätge ko okaan cäŋ, ni thäämge ki dhöör cäŋ keda pinynya wäär.

¹⁵Eni jiy moa many køny wø pieme piemø yïth luup riek waŋ mo jøøa reyø, ni piem jøøa can ceŋ jøøa teek.

¹⁶Kiper manøgønø, jøøa can wø jïtö ki ŋäädhe, ni ö tïïe moa reyø ni cuŋge.

¹⁷«Meta yi ŋat wø jook Jwøki; kiper manøgønø, kär pwöc Jwøk na en teeki jïre taagï.

¹⁸Kiper eni dhaanhø wø kïthe yi gïn mo leth, 'ba eni cïpö ki cøm cwïny; ni kïth dëër dhaanhø ki ŋwiili, 'ba cäŋe ka wëëk caŋŋø ki ceŋŋe.

¹⁹Eni ï käle wøk ki yïth gïï mo leth mo pïï ra abïciel, 'ba këël doo pïï ri bïrietge bäŋ gïn mo leth mo gut ïïni.

²⁰Eni ï gwøe gwøø ki thøø cer käc, ni gwøk ïïni ki thøø ri leny.

²¹Ïïni ï dööŋ wøk ra ajäla mar dhøk, ni bëëdï niï ba lwäär kany wø täk gïï mo lethi.

²²Ïïno bëëdö niï ŋeethø bäät gïï mo leth ki kany wø näk ri käc, ni bëëdï niï ba lwäär ki lääc paap moa no owär.

²³Kiper pwödhö marï otïmö ni bäŋ kïte yie, ni ö lääc paapi ni bëëtge ki bëët-mëër ki ïïni.

²⁴Ïïno bëëdö ni iï ŋäädhö ki man näk mo kar bëëtö marï bëëdö no ogwøø, ni raŋï kaal marï ni bäŋ gïrpiny aciel mo orwäänyö yie.

²⁵Otïmö ni ŋäyï thuwø ki man näk miï jïtö ko obwöre mo thööth, ni tïm nyïïkwaayï kaamar luum mar bäät piny.

²⁶Ïïno ci yi bwörö ni ïïno røm ki cwiiri kaawat man wø kac caammi ki yi caa marge mana näk kare.

²⁷«Ka adïëri møn, luubö man anø raŋwa ni jootwa gø na adïëri; kiper manøgønø, wïnynyï, ni kwanyï tiere ï keerï.»