Read anuak Jööp 8 Bible Online

Jööp 8 - anuak bible

Jööp 8

¹Køøre aløk Bildati nyï Cuua ni kööe,

²na «?A kany mo nyïëdi noo carï luupögø, noo tïm luupï moo ö wøk ki dhiï ni caala jamø mo teek?

³?Aŋø, Jwøk luup wø ŋøle ŋølø no oköömmö, wala Jwøa en teeki jïre luubö mo tiir wëëge kööm?

⁴Ni näk mo obwöre moï obääyö dëëre, eni bääyö marge ee nø dwøk wïthge.

⁵'Ba ïïni, ni näk mo Jwøk iï manynyø, ni kwayï eni na en teeki jïre,

⁶ni bëëtö marï beer ni tiir, ka adïëri møn, eni ree dee nyoodhø jïrï, ni dwøk bëëtö marï mana beer kare.

⁷Këël na bëëdï ni täk bëëtö marï nëëni ni thiinh, bëët yi nyïm marï døøye mo dwøŋ.

⁸«Beerra man pëënynyï beenhnhe moa pöödhö, nee jammi moa kwany kwäcge nee caange jïrï nee ŋäyï.

⁹Kiper øøna jiy mo ø nywøl ka awääre en, ni bäŋ gïn mo ŋääø døøc, ni nïr bëëtö marø bäät piny kany laara pöödhö kaamar tïpö.

¹⁰?Aŋø, ï ba pwönyge ni cäänge ïïni ki luup leec wïc ki køør kwänynyö marge?

¹¹«?Aŋø, otöök døøŋŋø ni bäär jaak kany mo otal? ?Løny jï obøw ki man tuue kany mo bäŋ naam yie?

¹²Geni kanyo pootge ni marge tuuö ni mar ni ge poot kär nyaarø, ge laara talø ni ränyge ni kaala lumme møga bëët.

¹³Kaawat manøgønø, uutjïëthe mo jiy bëët moa näk wïthge owïl ki Jwøk, ki ŋäädhe mar ŋat mo tøør ri Jwøk, laara ränynyö.

¹⁴Eni ŋäätha gïn mo ba ruu, ni gööga ri gïn mo laara ränynyö kaamar øt-othïënhö.

¹⁵Gïna caal øt-othïënhö wø ŋäädhe ŋäädhö, 'ba bäŋ wø cuŋŋi kare; ni mak gø ni teek, 'ba bäŋ wø bëëdö ki kany mo bäär.

¹⁶Eni bëëdö kaamar jaath mo oløth mo ena yi böön-cäŋ, mo bäädi moe olaak ya ajïniina bäre,

¹⁷ni lweedi moe tuya yïthakic kïte, ni ge rïïö ki karge yïth kïte.

¹⁸'Ba kany wø näk mo eni di daa, kare oköö, ni ‹Ï kuua cøøn.›

¹⁹'Ba ka adïëri møn, met ec mar jøøgø ba bëëdö ki kany mo bäär, 'ba jø møøk oööi ni läwge karge.

²⁰«Ka adïëri møn, dhaanhø mo bëëdö ni bäŋ gïn jøøŋŋi ri bëëtö mare ba kwier Jwøki; ni Jwøk thuwø jiy mo wø tïïc gïïa reyø ba cwaae.

²¹'Ba eni dhiï poot tïïe tïïö ni bëënna ŋeethø, ni wëëk ïïni kwöŋŋö ki met ec ki dhiï.

²²Nyïïmän moï geno bëëdö ni geno rïëp lään wïci; ni ö kwör bëëte mo jøøa reyø ni tïmge ni bäŋgø këët.»