Read anuak Jööp 9 Bible Online

Jööp 9 - anuak bible

Jööp 9

¹'Ba aløk Jööpi ni kööe,

²na «Adïëri møn, ŋääa ni manøgø bee gïn ma kare, ?'ba ennø, bëëtö mar dhaanhø tïme ni tiir nidïï nyïm Jwøk?

³Këël da dhaanhø mo manynya man pïëme ki gø, ki røk luupe ma kuma moo care, eni bäŋ aciel mo duue.

⁴Jwøk wïïe leer døc ni teek mare okadhø. ?Aŋa ni cäänö ki gø ni waŋe teek, ni bäŋ gïn mo tägi dëëre?

⁵Eni kïte wø daae daaø ni bäŋ gïn mo ŋäcge, ni jaal geni ki wëër mare.

⁶Eni tier piny di nëëŋö ni jäŋ gø, ni tïïc were mo gø ni kwanynyi.

⁷Eni cäŋ wø di cäännö nee ba rienye, ni tïïc ceer nee ba cïpge ki tar.

⁸Eni keere maal apeere, ni bee eni ni wø cäädhi ki bäät athaŋ naama dwøŋ.

⁹Bee eni na cwääc ceer mo wø cwøl ni liec ki ceer mo wø cwøl ni wäät-odäki, ki ceer mo wø cwøl ni joonni, ki ceer mo wø en jï løø tier piny.

¹⁰Eni wø tïïö ki gïï mo ec thäŋŋö ki ge mo tietge ba løny ki kwany, ni tïïe ki gïï mo rëëma ec mo ba thum ki kwaan.

¹¹Kany wø cur buuta, eni ba jooda, ni kany wø pöödhe, eni ba løny ki man ŋääa gø.

¹²Kany wø juth gïrpiny, ?aŋa ni løny jïre ki man män gø, na aŋa ni köö ki eni, na ‹Agïnaŋø ni tïïyï enø?›

¹³«Jwøk wëër mare ba dwøk piny, ni jø wø ö maal bääte na no odwätö ki Reeyap opäth piny tiete.

¹⁴?A aani nø, aana ŋa no dwöga baŋe en? Na a luupa ŋø ni løny jïra ki man caana gø jïre?

¹⁵Këël na bëëda ni bëëtö mara tiir, a ba løny ki man dwöga baŋe, 'ba gïna daa tïïö bee ki man kwaa gø, eni ni wø ŋøl luumma, kiper nee bäth ec mare nyoodhe jïra.

¹⁶Këël daa cwølø nee duunne jïra, kära ŋäädhö ki man näk ïthe di ciiø ki luumma.

¹⁷Eni, a wø tøye tøyø ki jamø mo teek, ni kïth dëëra ki ŋwiili mo thööth ki gïn mo bäŋ tiere.

¹⁸Eni a ba wëëk jwöm ki man jwïëa ki jamø, 'ba eni bëëdö ni caama aani ki gïï mo keec.

¹⁹Ni näk mo gïn mo tïïc ka teek, teek mare dwøŋŋa eni. ?'Ba ni näk mo gïn mo tïïc ka løøk, aŋa noo cwøl eni kar løøk?

²⁰Këël na bëëda ni bëëtö mara tiir, dhøk mara a wø di jäälö. Këël na bëëda ni bäŋ gïn mo jøøŋŋi ri bëëtö mara, luup mo wø cara, raaya wø dige nyoodhø.

²¹«Këël na bëëda ni bäŋ gïn mo jøøŋŋi ri bëëtö mara, bäŋ gïn mo caana kiper dëëra, kiper bëëtö mara yaa taaø.

²²Gïïögø röömi bëët, ni bee tiere na kööa, ni ‹Eni ŋata näk bäŋ gïn jøøŋŋi ri bëëtö mare, ki ŋata näk bëëtö mare raac, ge raanynye raanynyø na aciel bëët.›

²³Kany wø dee thøø mo tägö ni cwöba røk dëët jøøa bëëtge beyø, eni wø ŋeethø bäät gïïa leth na jwørge.

²⁴?'Ba ni näk piny onø cïp ceŋ jø raay, ni dïŋut luup onø tïïc na cööye, ni näk mo patha eni na tïïc gø, ŋat mør aŋa?

²⁵«Nïne 'moa atïmö ni läädö døc ni kaala ŋat ŋwïëy; gena laar pöödhö ni bäŋ met ec mo ege joodø.

²⁶Gena cäädhö ni jööt døc kaamar jää naam mo otïïö ka abääpa, ni neewïïw kaamar olwiith mo cwietha gïrpiny.

²⁷Kany wø kööa ni wïïa wëëga wïlö ki gïïa leth, ni kööa ni cwïnya cøma cømø naa ŋeetha,

²⁸a poot bëëdö naa lwäär kiper gïïo leth noo tägi dëëra, kiper ŋääa naa ba ŋunnï.

²⁹Aani, luubö anø ŋøl bääta ni aano bääyö; ?aperŋø nø noo bëëda ni raa öölö ki ŋaap jaak en?

³⁰Këël mo dëëra yaa lwøø ki caabuun, ni lwøa ceŋŋa ki thöö nee tïmge ni waany,

³¹a poot leeŋï yi buur mo yie da gïï mo reyø, na abïïe 'moa dëëtge puta tïmö ni jeey ki aani.

³²«Kiper Jwøk patha dhaanhø kaamar aani mo løny ki man dwöga jïre, nee wa ciwa kar løøk ni cäänwa yïthakicwa.

³³Wui, doo naa da dïŋut luup mo ci dïwa, ni dee cuŋŋö yïthakicwa bëët,

³⁴ni daa jïtö ki dhaanhø mo tïŋa athøra mar Jwøk maal bääta, naa puta tïmö naa ba bööi ki køør mana lwäära ki gø,

³⁵køøre nø, a doo cäänö ki eni ni bäŋ lwär; 'ba ba løny ki man tïïa gïnögø ki teek mara.»