Read anuak Dut Pwøc 102 Bible Online

Dut Pwøc 102 - anuak bible

Dut Pwøc 102

¹Manøgø beeye duut Deebit. Wui Wuuö Jwøk, wïny lam mara; beerra man pïïc kwaci mara baŋï.

²Kär täärnyïmï kanï ki aani kany wø ena yïth gïï mo leth. Cek ïthï ki mara, ni laarï mara løk kany wø cwøla ïïni.

³Kiper nïr kwøw 'moa wø laara maayø kaamar jïrö, ni tïm dëëra bäre ni waŋŋi.

⁴Bääta apädhö ni tïma naa caala luum mo obäp, ni gïr cam ba lääŋŋa.

⁵Ki køør cooyø mara na päl, aana dwat ni tïma na cöö keere.

⁶Aana tïmö kaamar wenyø mo onoorø dï paap, ni tïma naa caala tula mo bëëdö wï paac.

⁷A bëëdö naa juudö, naa caala wenyø mo bëëdö ee keere wï øtø.

⁸Nyïïmänna bëëdö ni jøøŋŋa aani cooth ki yïth nïne bëët, ni ö jø wø päät aani ni tïïcge nyeŋŋa na gïr acïëni.

⁹Ki køør wëëyï na pällö bääta, aana kwanyï ni wetï aani wøk, ni tïma naa cama bur, ni ö pï nyeŋŋa ni bëëde ni øøya yi gïn wø maadha.

¹¹Nïr kwøw 'moa aløny ni maayø kaamar tïm abøøya, ni tïma kaamar luum mo obäp.

¹²'Ba ï na Wuuö Jwøk, ï bëëdö na nyeya na bäre bäre, ni bëët nyeŋŋï ni ŋäc këël yïth beenhnhe bëët.

¹³Ïïno ö maal ni päth cwïnyï ki gïr Dhayan, kiper ennø beeye kany mo orømø ki man nyoothï met iï jïre, kiper kanya wäŋŋi apäŋ.

¹⁴Kiper ka adïëri møn, jiyï poot mëër ki Dhayan, pääny mana no oränynyö, ni cwïnyge opädhö ki gïr ŋøøm moa dööŋ wï paac manøgø.

¹⁵Wïth juurre bëët otïmö ni lwäär ki nyeŋ Wuuö Jwøk, ni ö nyec bäät piny bëët ni lwäcge ka ajiem mare.

¹⁶Kiper Wuuö Jwøk Dhayan cäŋe ka geerø, ni ööe ka ajiem mare.

¹⁷Eni lam mar jøøa can di wïnynyö, ni kwac marge ba taae.

¹⁸Beerra man göör luummi piny kiper beenhnhe moo ööi, kiper nee geni na näk poot kär nywølø nee Wuuö Jwøk pwøcge;

¹⁹ni luummeca beeye en: Wuuö Jwøk alwïthö piny ni eni ena maal kar bëëtö mare na en kur keere, ni raŋ bäät piny ni eni ena maal,

²⁰kiper nee cooyø mar jø twöc wïnynye, nee jøøa näk thøø onø ŋøl bäätge päde.

²¹Køøre nyeŋ Wuuö Jwøk okøp jiyi Dhayan, ni beeye Jerucalem, ni ö pwøci mare ni caani yie,

²²kanyo ö tiet mïëri ki wïth juurre noo cooŋge rege na aciel ni ge wøøra Wuuö Jwøk.

²³'Ba aani, Wuuö Jwøk aana tïïe naa jääk naa poot thiinh, ni døøc nïr kwøw 'moa mo nøk.

²⁴Køøre aana köö, ni «Wui, ï na Jwøk mara, kär jwïëya laar käl ni cwiiya poot nøk; ïïni, ï bëëdö niï kwøw ki yïth beenhnhe bëët.

²⁵Dïkwøŋ cøøn piny acwääyï, ni tïïyï maal ki cerï.

²⁶Gïïögø bëët ränynyö, 'ba ïïni, ï dööŋ karï. Ge ränynyö bëët kaamar abïï, ni wiilï geni kaawat man wø wiil abïï dëël, ni wet ge.

²⁷'Ba ïïni, ï poot bëëdö na karï karï, ni cwiiri moï ba thum.

²⁸Wäät jiyï obëëdö ni kwøw, ni ö nyïïkwaacge ni këët tietge piny nyïmï.»