Read anuak Dut Pwøc 105 Bible Online

Dut Pwøc 105 - anuak bible

Dut Pwøc 105

¹Dwøgu met ec jï Wuuö Jwøk, ni pwøyu nyeŋŋe, ni caannu tïïe moe nee wïny wïth juurre.

²Wärru jïre, wärru dut pwøc jïre, ni caannu tïïe moe bëët na näk rëëma ec.

³Jiemmu nyeŋŋe na en kur keere; beerra man mïn yïth jø wø cac Wuuö Jwøk.

⁴Cayu Wuuö Jwøk ki teek mare, ni manynyu eni cooth.

⁵U na nyïïkwaac dhaanhnhe ma Eeberam, u na nyïïkwaac Jeekap na näk ee jierø, caarru wïthu ki gïïa näk rëëma ec na tïïe, këël ŋïïce moe ki luup ŋøl moa caane ki dhee.

⁷Eni na Wuuö Jwøk, beeye Jwøk marø; ŋøl luup mare ena bäät piny bäre.

⁸Eni luumma tuude di lääŋŋö na bäre bäre, ni bëëde ni luumma caane di lääŋŋö këël yïth beenhnhe ma kume,

⁹ni beeye luumma tuude ki Eeberam, na kööŋe kiper gø jï Aydhak.

¹⁰Ni cäŋ gø tuutö ki Jeekap, ni beeye Icriel, nee bëëde na bäre bäre,

¹¹na kööe, ni «Ŋööm Keenan omëëga ïïni, ni tïme na kur nyïïkwaayu.»

¹²Kanya bëëtge ni kwäänge nøk, ni ge nøk døc ni gena wëëlle yi ŋöömmögø,

¹³ni ge wïïrö tiet mïëri, ni ge cøøa paac man nø ki baŋ jøøi nø,

¹⁴ge käre wëëk dhaanhø mør nee ge thiel piny; nyeye aköömme kiperge, ni kööe,

¹⁵ni «Jiya na näk yaa jierø kär gutu, ni ba tïïu dëëtge ki gïï mo leth, ge na nyïïkuk 'moa.»

¹⁶Kanya ö Wuuö Jwøki na käl käc paac mana bëëtge yie, ni wëëk caammi moge thumö bëët,

¹⁷eno nø jääk Ijep ki dhaanhø nyïmge dïkwøŋ, ni beeye Jocep, na kwøŋ dwøk pwödhö na laŋŋø.

¹⁸Eni tiete atwöc ko oguudi, ni maai piny ki nywïëny.

¹⁹'Ba eni, kanya poode ni luumma caan Wuuö Jwøki poot kär thur kare, luummögø abëëdö na gïr päärö dëëre.

²⁰'Ba nyeny Ijep ajäägö ni käl eni wøk øt twöc, ni bee eni na wïth jiy na pät Jocep.

²¹Eni Jöcep atïïe na ŋat käär akwöma, ni tïïc eni na wïth jammi moe bëët,

²²nee cuumme moe köömme kaawat man wø manynye, nee jø døøŋŋø moe pwönynye nee jïtge ki leec wïc.

²³Køøre Icriel thuwø, ni wø cwøl ni Jeekap, aö Ijep, ni bëëde na wëëllö kaace yi ŋööm Kaam.

²⁴Ni ö Wuuö Jwøki ni wëëk jiye ma jø Icriel nyaay, ni tïïc geni ni teek ni kaala nyïïmän moge.

²⁵Eni cwïny jø Ijep awiile ni tïmge ni ge män ki jiye, ni tïïge ka atade dëët jiye.

²⁶Eni dhaanhnhe ma Modhe ajääŋŋe, ni jääŋ Aran thuwø na näk ee jierø.

²⁷Geni nyuuthe moe atïïcge dï jø Ijep, ni tïïcge gïï mo rëëma ec kaace yi ŋööm Kaam.

²⁸Eni muudhö ajääŋŋe ni tïm pinynyi ni cøl, ni kärge luumme kwierø.

²⁹Eni pïï mo jø Ijep awiile ni tïme na remø, ni wëëk rec moge thøø.

³⁰Dï paac marge agääbö ko ogwaal bäre, këël kwör niine moa en paan dwøŋ.

³¹Ena cäännö, ni ö nyuuwi dï poge bäre, ni cäŋ cäännö, ni put lwaa lwaŋŋø öö ni päl.

³²Pey ajääŋŋe bäätge na kar køth, ni ö maalli ni male dï poge bäre.

³³Ni raany omøki ko olämmi moge moa piithge, ni kaaŋ jenni moa en dï poge.

³⁴Ena cäännö, ni put bäänyö öö, ni beeye bäänyö mo kwäänge ba thum.

³⁵Ni camge gïïa no otuy bëët poge, ni thöörge gïïa no ociek yi ŋöömö marge.

³⁶Eni kaai bëët moa näk cwøw dï poge ma Ijep anääe, ni beege moa kwøŋ jø Ijepi nywøl na nyooth gø ni ge nyöödö.

³⁷Køøre eni jø Icriel abwøth wøk ni ge käädö ki warkie ki gwet-bïrö; 'ba kanya cääthge, bäŋ dhaanhø aciel dïge mo obøømmø.

³⁸Kanya aac jø Icrielli, jø Ijep yïthge amïnnö, kiper mana bëëtge ni geno lwäyö ki gïïa tïïc Jwøki dëëtge ki køørge.

³⁹Eni pöölö apeere na tïpö bäätge, ni tïïc maac nee liele jïge ki wäär.

⁴⁰Gena pëëö, ni känne jïge ka ajwëëyi, ni wëëk ge jäŋö ki møø mo käla maal.

⁴¹Eni kïdi akaae ni mul pïïyi wøk, ni kwöt kwöra no otal kaamar naam.

⁴²Eni wïïe kär wïl ki luumma en kur keere na tuude, ni beeye luumma tuude ki dhaanhnhe ma Eeberam.

⁴³Eni jiye abwøth wøk ni yïthge met, ni kwöŋge ki met ec, geni na näk ee jierø.

⁴⁴Eni ŋøøp wïth juurre amëëk geni, ni lwørge gïïa tïïc jøøgø ki öölö marge ni tïmge na moge,

⁴⁵kiper nee ciik moe gwøkge, ni kïthge gïïa ceme bäät tïïc. Alëluya, pwøc en jï Wuuö Jwøk!