Read anuak Dut Pwøc 106 Bible Online

Dut Pwøc 106 - anuak bible

Dut Pwøc 106

¹Alëluya, pwøc en jï Wuuö Jwøk! Dwøgu met ec jï Wuuö Jwøk, kiper eni beer, ni mëër mare ni wø ba jøøl bëëdö na bäre bäre.

²?Aŋa ni løny jïre ki man caan gïïa tïïc Wuuö Jwøki ki teek mare? ?Na aŋa ni løny jïre ki man pwøc eni ki pwøc mana dii pwøø ki gø?

³Gwïëth en jï jø wø many ŋøl ma adïëri, jø wø tïïc mana näk kare cooth.

⁴Wui Wuuö Jwøk, kär wïïï wïl ki aani kanyo nyoothï met iï jï jiyï; ö baŋa ni piemï aani,

⁵kiper nee kwärö mar jiyï na näk iï jierø neena, nee yia mïnne ki jiyï na aciel, nee ï jiemwa na aciel ki jiyï na näk thöögï.

⁶Waani, waana tïïö ki raay, kaawat mana tïïc kwäcwa, ni bëëtwa ki bëëtö mo paa kare, ni tïïwa ki gïï mo reyø.

⁷Kanya bëët kwäcwa Ijep, tïïe moï ni wø rëëm ec kärge lääŋŋö, ni mëër marï na päl ni wø ba jøøl, ge kär cädö kiper gø; 'ba gena gëëmö ki ïïni, ï na Jwøa Dwøŋ ni en Maal, kanya enge bäät Naama Kwaar.

⁸'Ba ka adïëri møn, Wuuö Jwøk gena pieme kiper nyeŋŋe, ni nyootha teek mare,

⁹kanya kööm Naama Kwaar ni tale, ni bwøth geni ki kanya päŋ dïkwøŋ, ni cääthge kere ge caatha paap mo otal.

¹⁰Kanyøgø gena pieme ceŋ jøøa män ki geni, ni käl geni wøk ceŋge.

¹¹Ni ö naammi ni cam jøøgø, ni bäŋe aciel mo odööŋ.

¹²Køøre ge na jiye, luup moe aŋääthge, ni wärge ki duut ni ge pwøya eni.

¹³'Ba wïthge alaar wïlö ki tïïe moe, ni kärge pwöc mare koorø.

¹⁴Ni tïmge ni ge lääŋŋa yïthge dï paap, ni päärge Jwøk.

¹⁵Gïna pëënyge acïbe jïge, 'ba dëëtge amooe ki täw mo leth.

¹⁶Kanya enge twïër dï paap, gena bëëdö ni yïthge keec ki Modhe ka Aran, Aran ŋata no ocïp kur keere na mar Wuuö Jwøk.

¹⁷Ni ö pinynyi ni jap ree ni mwøny dïbwöthe moge ma Daathan ka Abiram, ni dïïr ree bäätge ki jø mïëcge bëët.

¹⁸Ni ö maaci ni waaŋ jøøa dwal dëëtge ki jøøgø, ni put jøøgø ni reyø yøø thöör.

¹⁹Jø Icriel gena lëënyö ki warkey ni tïïcge gø na nyirøøa tier Kïn Körëp, ni wøørge gïnögø ni ege leenyø na gïn lam enø.

²⁰Geni Jwøk na näk ajiem marge awiilge ki gïna tïïcge ni caala dhieŋ ni wø cam luum jaak.

²¹Geni wïthge awïl ki Jwøk na piem geni, na tïïc gïï mo døøŋŋø Ijep,

²²ni beege gïïa näk rëëma ec na tïïe kaace yi ŋööm Kaam, ki gïïa thääŋ ec na tïïe bäät Naama Kwaar.

²³Køøre Jwøk aköö ni ge di raanynyø; 'ba Modhe, na näk ee jierø, aci yïthakicge ki Jwøk, nee wëër mar Jwøk paanye bäätge, nee ge ba raanynye.

²⁴Geni luumma caan Wuuö Jwøki kärge ŋäädhö, ni taakge rege ki jøøa en yi ŋöömma mïërö.

²⁵Gena bëëdö ni ge ŋurö yïth oduŋkaare moge, ni kärge dwør Wuuö Jwøk wïnynyö.

²⁶Køøre ena kööŋ jïge, ni ge wëëge thumö ki thøø dï paap,

²⁷ni wëëk nyïïkwaacge keethø dï wïth juurre, ni thumge ki thøø tiet mïëri.

²⁸Geni cwïnyge aløøge baŋ jwøa cwøl ni Baal-Pëëgör, ni camge olämme moa cïp jï juu mo bäŋ jwïëy dëëtge,

²⁹ni tïïcge Wuuö Jwøk nee goote ki køør gïïa tïïcge, ni ö Jwøki ni jääl geni ki täw mo leth.

³⁰'Ba Piniac aö maal ni dier luummögø, ni put täwi cuŋŋö.

³¹Ni jïëc eni ni mare beer këël yïth beenhnhe bëët moo ööi ki køør gïna tïïe.

³²Geni Wuuö Jwøk atïïcge nee wëëre bäät pï Meriba, ni ö Modhe ni jïte ka ajäla ki køørge;

³³kiper cwïny Modhe adøøcge mo keec, ni cääne ki luup mo käre caarø.

³⁴Geni wïth juurre moa bëëdö Keenan kärge nääö, këël na bëëde ni geno kööm Wuuö Jwøki ni jøøgø 'näkge.

³⁵'Ba røkge ajääpge ki wïth juurre moøgø, ni kwanyge bëëtö marge.

³⁶Ni wøørge gïïa no otieŋø ni wø lam jøøgø, ni tïm lammi manøgø na abïëp kiperge.

³⁷Wäätge ki nyïïge aŋaalge no olämme jï juu mo piny,

³⁸ni kønyge rem jiy piny mo bäŋ gïn mo ege baaø, ni beege rem wäätge ki nyïïge, na ŋaalge no olämme jï gïïa no otieŋø ni wø lam jø Keenanni, ni tïm ŋöömö marge ni ba waany ki køør remø.

³⁹Ni tïm dëëtge ni ba waany ki køør tïïe moge, ni tïmge kaamar kääpe ki køør gïïa tïïcge.

⁴⁰Wëër mar Wuuö Jwøk aliel kaamar maac bäätge, ge na jiye, ni männe ki geni, ge na näk thööge.

⁴¹Ni cïp geni ceŋ wïth juurre, ni tïmge ni ge ena tietge, ge na jøøa män ki geni.

⁴²Gena thiel nyïïmänni moge piny, ni tïmge ni ge ena tietge.

⁴³Geni, gena køny Wuuö Jwøki kwöre mo thööth, 'ba gena tïmö ni marge ageem ki køør gïï wø carge, ni nigeŋac yïth raay moge.

⁴⁴'Ba kanya ö Wuuö Jwøki na wïny oduuru marge, leth bëëtö marge aneene,

⁴⁵ni par wïïe ki luumma tuude kiperge, ni dwøk cwïnye piny ki køør mëër mare na päl ni wø ba jøøl;

⁴⁶ni tïïc cwïny jøøa mak geni ki tøŋ ni bäth ki geni.

⁴⁷Wui Wuuö Jwøk, ï na Jwøk marwa, piem waani, ni lemï waani yïthakic wïth juurre, kiper nee nyeŋŋï na en kur keere pwøcwa, ni jiemwa ïïni kany wø pwøcwa ïïni.

⁴⁸Pwøc en jï Wuuö Jwøk, Jwø Icriel, ki mana täge cøøn, këël bäre bäre. Beerra man kö jiyi bëët, ni «Beeye kare!» Alëluya, pwøc en jï Wuuö Jwøk!