Read anuak Dut Pwøc 107 Bible Online

Dut Pwøc 107 - anuak bible

Dut Pwøc 107

¹Dwøgu met ec jï Wuuö Jwøk, kiper eni beer, ni mëër mare ni wø ba jøøl bëëdö na bäre bäre.

²Beerra man ö jøøa wïïl Wuuö Jwøki wøk yïth gïïa leth ni caange met ec marge na enøgønø,

³ni beege jøøa cooŋe ki tiet mïëri bëët, na käl jï løø kur tuul-cäŋ ki jï løø kur pänh-cäŋ, ki moa käl wï-piny ki tier-piny.

⁴Møøk dïge atïmö ni thääyö dï paap kany mo bäŋ pïï yie, ni kärge jöör pääny mana dege bëëdö yie joodø.

⁵Käc ki riew bäre atïmö ni päl dëëtge, ni ö dëëtge ni ŋiir piny.

⁶Kanya cwat yïthge ki öölö, Wuuö Jwøk akwacge, ni ö Wuuö Jwøki ni käl geni wøk yïth gïïa leth na enge yïthge.

⁷Gena bwøth Wuuö Jwøki ki jöö mo tiir, kiper nee ge cige pääny mana dege bëëdö yie.

⁸Beerra man ö jøøgø ni dwøkge met ec jï Wuuö Jwøk kiper mëër mare ni wø ba jøøl, ki gïïa näk rëëma ec ni wø tïïe jï jiy.

⁹Kiper ŋata no onäk riewi amaadhe ki pïï ni røme, ni wëëk ŋata no onäk käci jäŋö ki cam mo met.

¹⁰Møøk dïge abëëdö yi muudhö mo cøl ma kar thøø, ni geno twöö ko oguudi ni bëëtö marge leth,

¹¹kiper mana kwierge luupa caan Jwøki, ni taakge pwöc moe, eni na dwøŋ ni en maal.

¹²Wïthge adwøk Wuuö Jwøki piny ki tïïc mo teek, ni tïm dëëtge ni dhønhnhi ni bäŋ ŋat mo køny geni.

¹³Kanya cwat yïthge ki öölö, Wuuö Jwøk akwacge, ni ö Wuuö Jwøki ni käl geni wøk yïth gïïa leth na enge yïthge.

¹⁴Gena käl Wuuö Jwøki wøk ki yi muunhnha cøl na näk kar thøø, ni cööt oguudi moa näk geno twöö ki ge.

¹⁵Beerra man ö jøøgø ni dwøkge met ec jï Wuuö Jwøk kiper mëër mare ni wø ba jøøl, ki gïïa näk rëëma ec ni wø tïïe jï jiy.

¹⁶Kiper eni dhøk uut twöc moa näk tïïc ka nywïëny atoor piny, ni tøc dïdëëte mo nywïëny na thäŋi.

¹⁷Møøk dïge moa wïthge teek, bëëtö marge atïmö ni leth kiper mana dhalge luum Jwøk ni tïïge ki gïï mo reyø.

¹⁸Cwïnyge atïmö ni cøl ki caammi bëët, ni tïm karge ni cään ki thøø.

¹⁹Kanya cwat yïthge ki öölö, Wuuö Jwøk akwacge, ni ö Wuuö Jwøki ni käl geni wøk yïth gïïa leth na enge yïthge.

²⁰Wuuö Jwøk dwøre acaane ni dwøk dëëtge karge, ni køny geni yi ränynyö marge.

²¹Beerra man ö jøøgø ni dwøkge met ec jï Wuuö Jwøk kiper mëër mare ni wø ba jøøl, ki gïïa näk rëëma ec ni wø tïïe jï jiy.

²²Beerra man cïpge ko olämme thuwø ni ge dwøga met ec, ni caange tïïe moe ni döötge ena maal.

²³Møøk dïge mo wø cäädhi dï naama dwøŋ ki baabuure, ni wø bëëdö ni marge tïïc bäät naama dwøŋ,

²⁴tïïe mo Wuuö Jwøk na näk rëëma ec ni wø tïïe bäät naamøgø ajootge døc.

²⁵Kiper dwøre acaane, ni put atuunna mo dwøŋ kwönnö, ni ö athaga ni tïme ni päl.

²⁶Gena leeŋ athaga maal ni cäŋ geni duu piny, ni päth cwïnyge na bäre bäre ki køør gïna raac na tägö.

²⁷Gena tïmö ni ge bøømmø kaamar dhaanhø mo omeer, ni tïm riek waŋ marge ni bäŋ kare.

²⁸Kanya cwat yïthge ki öölö, Wuuö Jwøk akwacge, ni ö Wuuö Jwøki ni käl geni wøk yïth gïïa leth na enge yïthge.

²⁹Atuunna ajooe ni cuŋŋe, ni ö athaga ni lïŋe.

³⁰Yïthge amïnnö kanya ö naammi na neekïïl, ni ö Wuuö Jwøki ni bwøth geni këël mana pïïcge dhi waath mana manyge.

³¹Beerra man ö jøøgø ni dwøkge met ec jï Wuuö Jwøk kiper mëër mare ni wø ba jøøl, ki gïïa näk rëëma ec ni wø tïïe jï jiy.

³²Beerra man tïŋge nyeŋŋe maal dï acooŋ paac bäre, ni pwøcge eni kany wø ö jø døøŋŋø wø cooŋge dëëtge yie.

³³Wuuö Jwøk näm ataale ni tïm kwörge na tëën, ni taal kwör wø kwön pïïyi ki yïthge;

³⁴ni tïïc ŋøøp wø cïpi ki cam na ŋøøp acäbö mo bäŋ gïn mo tuy yie. Gïïögø atïïe ki køør rääö mar jøøa bëëdö yi ŋöömmögø.

³⁵Kany ma tëën atïïe na kany mo yie da näm, ni tïïc ŋøøpa näk otal na kwör wø kwöt pïïyi ki yïthge.

³⁶Jøøa no onäk käci awëëk bëëtö kaace, ni gëëtge ki pääny mo bëëtge yie.

³⁷Ni purge ki pwöth, ki pwöth omøki, ni jïtge ki caammi mo thööth.

³⁸Gena gwïëth Wuuö Jwøki, ni tïmge ni thööth, ni tïïc dhäk moge ni thööth.

³⁹'Ba kwään jiy wø tïmö ni nøk ni døø wïthge piny ki køør caannø ki bëëtö mo leth ki kïmmö man wø kïmge ki gø.

⁴⁰Ni ö Wuuö Jwøki ni bëëde ni kwääri ee taaø jaak, ni wëëk geni thääyö dï paap mo bäŋ øtjöö mo joot yie.

⁴¹'Ba jøøa can wø poot käle wøk ki yi ränynyö marge, ni meet geni ni tïmge ni thööth kaamar pïïth dïëk.

⁴²Gïïögø neen jøøa beyø neenø ni mïn yïthge, ø ni ö jøøa reyø ni bëëtge ni dhøkge ege miiø.

⁴³Ŋata näk wïïe leer, beerra man kïth gïïögø cwïnye, ni bëëde ni lääŋŋa mëër mar Wuuö Jwøk ni wø ba jøøl.