Read anuak Dut Pwøc 115 Bible Online

Dut Pwøc 115 - anuak bible

Dut Pwøc 115

¹Wui Wuuö Jwøk, kär tïmö ni jiemma waani; kär tïmö ni jiemma waani, 'ba beerra man tïme ni jiemma nyeŋŋï kiper mëër marï ni wø ba jøøl ka adïëri marï.

²Aperŋø ni kö wïth juurre en, ni «?Jwøk marge en kaa?»

³'Ba Jwøk marø møn, ena maal, ni eni tïïya man wø met yie ki gø.

⁴'Ba gïï wø lam wïth juurre wø tïïc ka warkey ki gwel-bïrö, ni beege gïï mo tïïya jiyi ki ceŋge.

⁵Gïïögø jïge da dhøgi, 'ba ge ba luubö; ni jïge da nyeŋŋi, 'ba ge ba nëënö.

⁶Jïge da ïdhi, 'ba ge ba wïnyö; ni jïge da ummi, 'ba bäŋ gïn mo ŋwääcge.

⁷Jïge da ceŋ, 'ba bäŋ gïn mo mulge; ni jïge da tiel, 'ba ge ba cäädhi; ni bäŋ dwøl mo tuny wøk ki cwäkge.

⁸Jøøa tïïc geni otïmö ni bäŋ teek jïge ni caala geni, këël jøw bëët mo wø ŋääth geni.

⁹Wui, u na jø Icriel, ŋääthu Wuuö Jwøk; bee eni na dïkunyi maru ni ena kwöt leny jïïu.

¹⁰Wui, u na jø dhi øt Aran,[11] ŋääthu Wuuö Jwøk; bee eni na dïkunyi maru ni ena kwöt leny jïïu.

¹¹Uuni ni wø lwäär ki Wuuö Jwøk, ŋääthu Wuuö Jwøk; bee eni na dïkunyi maru ni ena kwöt leny jïïu.

¹²Wuuö Jwøk lääŋŋa øøni; ø di gwïëdhö; ø di gwïëdhö, ø na jø Icriel, ni gwïëth jø dhi øt Aran.

¹³Wuuö Jwøk jø wø lwäär ki eni di gwïëdhö, ni beege moa kwörge bäŋgø ki moa kwörge døøŋŋø bëët.

¹⁴Beerra man ö Wuuö Jwøki ni wëëk uuni nyaay, uuni ko obwöre mou bëët.

¹⁵Beerra man ö Wuuö Jwøki ni gwïëth uuni, eni na cwääc maal ki piny.

¹⁶Maal beeye mar Wuuö Jwøk, 'ba piny ee cïbö jï jiy.

¹⁷Jøøa no othøw Wuuö Jwøk ba pwøcge, ni beege jøøa no oci kany mo bäŋ dwøl yie.

¹⁸'Ba øøni, Wuuö Jwøk pwøø pwøø, ki man bëëde ennø, këël bäre bäre. Alëluya, pwøc en jï Wuuö Jwøk!