Read anuak Dut Pwøc 116 Bible Online

Dut Pwøc 116 - anuak bible

Dut Pwøc 116

¹Aani, a mëër ki Wuuö Jwøk kiper dwøra wø wïnynye wïnynyö kany wø kwaa eni.

²Eni cøøra cøørø ki yïth nïr kwøw 'moa bëët, kiper mana cek ïthe ki mara.

³Aana bëëdö ni aano ciel thøø dïër kaamar dhaanhø mo omeenø ki thøøl, ni ö räämmi mana caal mana en kar bëët jwïëc jøøa no othøw ni ö bääta, ni lwäya, ni päth cwïnya.

⁴Køøre nyeŋ Wuuö Jwøk acwøla, ni kööa, ni «Wui Wuuö Jwøk, a kwaya ïïni, kwøw aani!»

⁵Wuuö Jwøk bëëdö ni mëër ki jiy ni mare beer, ni eni na Jwøk marø met ec mare wø nyoodhe nyoodhø.

⁶Wuuö Jwøk jøøa näk gïn tïïcge kucge di gwøø; kanya bëëda ni aano dwøk piny, aana kønye.

⁷Wui, cwïnya, døø piny, kärï pärö, kiper Wuuö Jwøk atïïö ki gïï mo beyø jïra.

⁸Ï na Wuuö Jwøk, jwïëya akälï wøk cer thøø, ni pooyï pï nyeŋŋa, ni tïïyï tieta nee nigethïk naa ba pädha.

⁹Aano bëëdö naa caatha køør Wuuö Jwøk kanyo pooda naa poot kwøw.

¹⁰Aana bëëdö ni cwïnya da ŋäädhe, këël na bëëda ni aano köö ni aano caannø døc.

¹¹Aani, cwïnya abwøk, ni kööa ni jiy bëët tööte.

¹²?Agïnaŋø noo tïïa jï Wuuö Jwøk na kar gïïa beyø bëët na tïïe jïra?

¹³Aani, køøŋ nyïïomøki ocïba ki ya athöödhi na muuy jï Wuuö Jwøk naa pwøya eni kiper mana piem aani.

¹⁴Gïïa kööŋa kiperge jï Wuuö Jwøk ocïba ni jiye bëët nutö.

¹⁵Wuuö Jwøk thøø mar jiye jwøre jwørø.

¹⁶Wui Wuuö Jwøk, ka adïëri møn, aana dhaanhnhï; aana dhaanhnhï møn, ni aana o dhaaŋ wø tïny ïïni; aana pädï wøk ki yi thøø.

¹⁷Olämi mar dwøk met ec ocïba jïrï, ni cwøla nyeŋŋï, ï na Wuuö Jwøk.

¹⁸Gïïa kööŋa kiperge jï Wuuö Jwøk ocïba ni jiye bëët nutö,

¹⁹ni wa ena dï kal mar Øt Wuuö Jwøk, na en dï Jerucalem. Alëluya, pwøc en jï Wuuö Jwøk!