Read anuak Dut Pwøc 118 Bible Online

Dut Pwøc 118 - anuak bible

Dut Pwøc 118

¹Dwøgu met ec jï Wuuö Jwøk, kiper eni beer, ni mëër mare ni wø ba jøøl bëëdö na bäre bäre.

²Beerra man kö jø Icrielli, ni «Mëër mare ni wø ba jøøl bëëdö na bäre bäre.»

³Beerra man kö jø dhi øt Aranni, ni «Mëër mare ni wø ba jøøl bëëdö na bäre bäre.»

⁴Beerra man kö jø wø lwäär ki Wuuö Jwøk, ni «Mëër mare ni wø ba jøøl bëëdö na bäre bäre.»

⁵Aana jwöŋö dëër Wuuö Jwøk kanya ena yïth gïï mo leth, ni wïny mara ni mooc a ki bëëtö mo beer.

⁶Wuuö Jwøk ena kura naa ba lwäyi. ?Aŋø, dhaanhø jaak, agïnaŋø noo tïïe dëëra?

⁷Wuuö Jwøk ena kura, ni beeye dïkunyi mara; kiper manøgønø, nyïïmänna jooda joodø ni geno böötö.

⁸Beerra eni ki man bëët dhaanhe ni ree ee kan buut Wuuö Jwøk, ki man bëëde ni eni ŋäätha dhaanhø.

⁹Beerra eni ki man bëët dhaanhe ni ree ee kan buut Wuuö Jwøk, ki man bëëde ni eni ŋäätha kwääri.

¹⁰Wïth juurre bëët aana cielge dïër, 'ba ki køør nyeŋ Wuuö Jwøk gena raanynya.

¹¹Aana cielge dïër, aana cielge dïër møn; 'ba ki køør nyeŋ Wuuö Jwøk gena raanynya.

¹²Aana cielge dïër kaawat man wø tïïc kïci, 'ba gena nibäc kaamar maa koodhi, ni raanynya geni ki køør nyeŋ Wuuö Jwøk.

¹³Gena nyänh bääta døc ni tïma naa many ka böötö, 'ba Wuuö Jwøk aana kønye.

¹⁴Wuuö Jwøk beeye teek mara, ni bee eni na cäŋŋa ki duut, ni tïme na pïëmi mara.

¹⁵Kwöŋŋö man wø kwöŋŋö ki met ec kiper pïëm man wø piem jiy ki gø en, wïnyö yïth oduŋkaare mo jic Wuuö Jwøk, ni jøw köö, ni «Wuuö Jwøk bade teek ni këëdö ki leny mo teek;

¹⁶Wuuö Jwøk teek bade dwøŋ døc; Wuuö Jwøk bade teek ni këëdö ki leny mo teek.»

¹⁷Aani, a ba thøw, 'ba a bëëdö naa kwøw, ni cara tïïe mo Wuuö Jwøk.

¹⁸Wuuö Jwøk aana pwönynye døc ki pwöc mo leth, 'ba a käre wëëk thøø.

¹⁹Japu dhøk käälle jïra mo wø døny jic Wuuö Jwøki ki yïthge, kiper naa dønya ki yïthge, nee met ec dwøga jï Wuuö Jwøk.

²⁰Man beeye dhi kal mar Øt Wuuö Jwøk, man wø døny jic Wuuö Jwøki ki yie.

²¹Wui Wuuö Jwøk, met ec duua duuö jïrï kiper mana wïnynyï mara, ni tïmï ni ïïna pïëmi mara.

²²Kïdi mana kwier dïgëëte aïmö na kïn gøøt mana pere letha eni na mak øtø;

²³gïnögø beeye gïna tïïc Wuuö Jwøki, na tïmö na gïn mo rëëma ec ki nyeŋŋø.

²⁴Dïcäŋi beeye dïcäŋ mana cïp Wuuö Jwøki kur keere; beerra man kanynyø ni mïn yïthø ki gø.

²⁵Wui Wuuö Jwøk, wa kwaya ïïni, piem waani; wui Wuuö Jwøk, wa kwaya ïïni, nee gïï wø tïïcwa thurge karge.

²⁶Gwïëth en jï ŋato ööi ki nyeŋ Wuuö Jwøk! Wa gwïëtha uuni ki yi Øt Wuuö Jwøk.

²⁷Wuuö Jwøk beeye Jwøk møn, ni bee eni na mooc øøni ki tar. Olämme moo cïp dïcäŋ man wø wøør Jwøk yie wär twöyu ki thøøli, ni kälu geni buut gïn wø cïp olämme bääte.

²⁸Beeye ï na Jwøk mara, met ec duua duuö jïrï; beeye ï na Jwøk mara, nyeŋŋï tïŋa maal.

²⁹Dwøgu met ec jï Wuuö Jwøk, kiper eni beer, ni mëër mare ni wø ba jøøl bëëdö na bäre bäre.