Read anuak Dut Pwøc 119 Bible Online

Dut Pwøc 119 - anuak bible

Dut Pwøc 119

¹Gwïëth en bäät jø wø bëëtö marge thïïŋ, jø wø cäädhi ki køør ciik mo Wuuö Jwøk.

²Gwïëth en bäät jø wø gwøk ciik Wuuö Jwøk, ni wø many eni ki cwïnyge bäre.

³Jøøgø bäŋ gïn mo raac mo tïïcge, 'ba ge caatha jööre.

⁴Wui Wuuö Jwøk, pwöc moi acïpï nee gwøkwa na karge.

⁵Gïna manynya keere beeye ki man bëëda naa gwøga ciik moï cooth.

⁶Kany wø cäda kiper ciik moï, wïïa ba lääy.

⁷Kanyo kwanya luup ŋøl moï na näk adïëri, ïïno pwøa ki cwïny mo thïïŋ.

⁸Aani, ciik moï gwøa gwøø; kär a weyï na bäre bäre.

⁹?Aŋø, wøpe bëëtö marge ogwøkge gø nidïï? Bëëtö marge ogwøkge ki køør luummï.

¹⁰Ï yaa manynyø ki cwïnya bäre; kär a wëëk gaan wøk ki ri ciik moï.

¹¹Luummï yaa kan cwïnya, kiper naa ba bääya dëërï.

¹²Wui Wuuö Jwøk, pwøc en jïrï; pwöny aani ki ciik moï.

¹³Luup ŋøl moï bëët wø køba købø ki dhaa.

¹⁴A wø bëëdö ni yia met ki man cäädha køør ciik moï, naa caala dhaanhø mo yie omïnnö ki jap kwärö.

¹⁵A wø cädö bäät pwöc moï, ni bëëda naa lääŋŋa jöörï.

¹⁶A bëëdö ni yia met ki ciik moï, ni wïïa ba wïl ki luummï.

¹⁷Tïïï ki gïï mo beyø jïra, a na dhaanhnhï, naa bëëda naa kwøw ni gwøa luummï.

¹⁸Jap nyeŋŋa, nee gïïa näk rëëma ec ri pwöc moï nee jooda.

¹⁹Aani, a bëëdö ni aana wëëllö bäät pinyi en; kär ciik moï kanï ki aani.

²⁰Cwïnya bëëdö ni ena køør luup ŋøl moï, naa bëëdö naa lääŋŋa geni ki yïth nïne bëët.

²¹Jø okiera, na no ocienø, wø joogï jooø, jø wø gaa wøk ki ri ciik moï.

²²Daak ajøøŋ ka ataa bääta, kiper ciik moï yaa gwøø.

²³Këël ni näk kwääri bëëdö ni ge waya nyeŋŋa, a na dhaanhnhï, a poot bëëdö naa cädö bäät ciik moï.

²⁴Met ec wø jooda ka ri ciik moï, ni beeye geni ni wø pwöny aani.

²⁵Aano ränynyö naa bëëdö yi tør; 'ba cäŋ a mooyø ki kwøw ki køør luummï.

²⁶Gïïa tïïa bëët acaana, ni løgï mara jïra; pwöny aani ki ciik moï.

²⁷Mooc aani ki leec wïc, nee tiet pwöc moï kwanya, naa cäda kiper tïïe moï na näk rëëma ec.

²⁸Aani bääta apädhö ki kïmmö; døøc a mo teek ki køør luummï.

²⁹Tïïc aani ni kara bäär ki bëët tööt, ni pwönynyï aani ki ciik moï ki køør mëër marï.

³⁰Aani jöör adïëri yaa jierø, ni cwïnya yaa cïp køør luup ŋøl moï.

³¹Wui Wuuö Jwøk, a bëëdö ni aano göök ri ciik moï; kär dee ŋat lää wïïa.

³²Aano cäädhi køør ciik moï kiper mana tïïyï cwïnya ni leer.

³³Wui Wuuö Jwøk, pwöny aani ki man cäädha køør ciik moï, nee gwøa na bäre bäre.

³⁴Mooc aani ki leec wïc, nee ciik moï gwøa, ni bëëtge ni yaa gwøø ki cwïnya bäre.

³⁵Bwøth aani ki jöör ciik moï, kiper a bëëdö ni yia met ki ge.

³⁶Løø cwïnya køør ciik moï, ni paa køør jap kwär.

³⁷Män nyeŋŋa ki raŋ gïï mo oballe jaak, ni cäŋï a mooyø ki kwøw ki køør luummï.

³⁸Wëëk luummï thur kare jïra, a na dhaanhnhï, kiper niï lwäär.

³⁹Daak ajøøŋ bääta mana lwäära ki gø, kiper luup ŋøl moï beege karge.

⁴⁰Ka adïëri møn, a bëëdö naa lääŋŋa pwöc moï; cäŋ a mooyø ki kwøw ki køør adïëri marï.

⁴¹Wui Wuuö Jwøk, beerra man nyoothï mëër marï ni wø ba jøøl jïra, ni piemï aani ki køør luummï.

⁴²Køøre nø, a jïtö ki gïn mo løøa løø jï jø wø jøøŋ aani, kiper luummï yaa gum cwïnya.

⁴³Kär luum adïëri daagï dhaa, kiper a ŋäätha luup ŋøl moï.

⁴⁴Ni ö ciiki moï ni bëëde naa gwøga geni, ni gwøa geni na bäre bäre;

⁴⁵ni bëëda naa cäädhi ka kany mo leer, kiper man wø bëëda naa manynya pwöc moï.

⁴⁶Ciik moï ocaana jï nyeye, ni wïïa ba laay.

⁴⁷Aani, a bëëdö ni yia met ki ciik moï, na mëëra ki geni.

⁴⁸A bëëdö naa wøøra ciik moï na mëëra ki ge, ni bëëda naa cädö bäätge.

⁴⁹Par wïïï ki luumma caanï jïra, a na dhaanhnhï, ni beeye luumma mooyï aani ki ŋäädhe ki køøre.

⁵⁰Gïn wø cøm cwïnya kany wø ena yïth gïï mo leth beeye en: a wø mooyï mooø ki kwøw ki køør luummï.

⁵¹Jø atöör bëëdö ni buua aani døc kiree, 'ba a bäŋ wø gaa wøk ki ri ciik moï.

⁵²Wui Wuuö Jwøk, a bëëdö naa lääŋŋa luup moa ŋølï ya acääŋŋe cøøn, ni bëëtge ni ge cøma cwïnya.

⁵³Yia aliel døc kaamar maac ki jø raay, ge na kwier ciik moï.

⁵⁴Ciik moï bëëdö na dudi jïra, kany bëëda yie en ni aana wëëllö.

⁵⁵Wui Wuuö Jwøk, a wø bëëdö naa lääŋŋa nyeŋŋï ki dï wäär, ni bëëda naa gwøga ciik moï.

⁵⁶Bëëtö mara beeye en: a bëëdö naa gwøga pwöc moï.

⁵⁷Wui Wuuö Jwøk, beeye ï na kura; aana kööŋ ki man gwøa luupï.

⁵⁸A kwaya ïïni ki cwïnya bäre; nyooth mëër marï jïra ki køør luummï.

⁵⁹Aana cädö kiper bëëtö mara; køøre raa aløøa ki man cäädha køør ciik moï.

⁶⁰Aana laar läät bäät ciik moï, naa kär ruu ki man gwøa ge.

⁶¹Jøøa reyø aana cekge ka abïëp, 'ba wïïa kär wïl ki ciik moï.

⁶²Ki dhöör wäär a wø ööa maal naa dwøga met ec jïrï kiper luup ŋøl moï na näk adïëri.

⁶³Aana nyawat jø wø lwäär ki ïïni bëët, jø wø caath køør pwöc moï.

⁶⁴Wui Wuuö Jwøk, mëër marï ni wø ba jøøl, piny päŋ ki gø bäre; pwöny aani ki ciik moï.

⁶⁵Wui Wuuö Jwøk, ïïna bëëdö niï tïïya gïï mo beyø jïra, a na dhaanhnhï, ki køør luummï.

⁶⁶Pwöny aani nee wïïa tïme ni leer, nee gïna beer ki gïna raac jiera, kiper a bëëdö naa ŋäätha ciik moï.

⁶⁷Kanya pooda ni gïïa leth kära jwørø, aano gaa wøk; 'ba ennø, a bëëdö ni luummï yaa gwøø.

⁶⁸Wui Wuuö Jwøk, ï beer ni tïïe moï beyø; pwöny aani ki ciik moï.

⁶⁹Jø atöör aana rwøthge jaak ki tööt, 'ba a bëëdö naa gwøga pwöc moï ki cwïnya bäre.

⁷⁰Ge bëëdö ni cwïnyge teek, 'ba aani, a bëëdö ni yia met ki ciik moï.

⁷¹Mana jwøra gïï mo leth atïmö na gïn mo beer kipera, kiper nee ciik moï kwanya.

⁷²Ciik moa caanï ki dhiï perge leth jïra, ni kaala warkey ki gwet-bïrö mo ba kwaan.

⁷³Aana cwääyï ki cerï ni këëllï tiera piny; mooc a ki leec wïc nee ciik moï kwanya.

⁷⁴Jø wø lwäär ki ïïni, bëëtö mara ojootge ni mïn yïthge, kiper a ŋäätha luummï.

⁷⁵Wui Wuuö Jwøk, ŋääa ni luup ŋøl moï beege karge, ni ŋääa ni marï beeye adïëri na wëëgï aani jwør gïï mo leth.

⁷⁶Beerra man ö mëërri marï ni wø ba jøøl ni cøm cwïnya, ki køør luummï na caanï jïra, a na dhaanhnhï.

⁷⁷Beerra man nyoothï mëër marï jïra, kiper naa kwøa, kiper yia mïnni ka ciik moï.

⁷⁸Beerra man lää wïth jø atöör, kiper na katge dhaa ki jap tööt; 'ba aani, a bëëdö naa cädö bäät pwöc moï.

⁷⁹Beerra man ö jø wø lwäär ki ïïni ni duuge baŋa, jø wø ŋäc ciik moï.

⁸⁰Beerra man gwøa ciik moï ki cwïnya bäre, nee wïïa ba lääe.

⁸¹Aana ööl naa koora man piemï aani; 'ba a poot bëëdö naa ŋäätha luummï.

⁸²Waŋa atal jöö køør luummï, ni kööa, na «?A yi wäne noo cømï cwïnya?»

⁸³Këël na tïma kaamar opïr pïën mo oraany jïrö, wïïa kär wïl ki ciik moï.

⁸⁴?A këël kany mo nyïëdi nø noo bëëda, a na dhaanhnhï, naa kurö? ?Na yi wäne noo ŋølï luup bäät jø wø caan aani?

⁸⁵Jø atöör gena kunyö ki buri kipera, jø wø ba caath køør ciik moï.

⁸⁶Ciik moï bëët beege adïëri; køny aani, kiper aana caange ki luup tööt.

⁸⁷Dööŋŋa kany mo thiinh ki man 'näkge aani bäät piny, 'ba aani pwöc moï kära wiiø.

⁸⁸Cäŋ a mooyø ki kwøw ki køør mëër marï ni wø ba jøøl; køøre ciik moï gwøa gwøø.

⁸⁹Wui Wuuö Jwøk, luummï tiere okëët piny maal, ni bëëdö na bäre bäre.

⁹⁰Adïëri marï bëëdö ni nut yïth beenhnhe bëët; piny acïbï kare ni teek, ni put bëëtö kare.

⁹¹Ki køør luup ŋøl moï, jammi bëët bëëdö kwörge këël dïcäŋi ennø, kiper jammi bëët bëënna ïïni.

⁹²Doo na a kär bëëdö ni yia met ki ciik moï, a doo ränynyö ki gïïa jwøra na leth.

⁹³Aani wïïa ba wïl ki pwöc moï na bäre bäre, kiper aana cäŋï mooyø ki kwøw ki køørge.

⁹⁴Aana dhaanhnhï; piem aani, kiper man wø bëëda naa manynya pwöc moï.

⁹⁵Jøøa reyø koora aani nee jwïëya raanyge, 'ba a bëëdö naa cädö bäät ciik moï.

⁹⁶Ajooda ni jammi bëët da cuŋge, 'ba ciik moï bëëdö na bäre bäre.

⁹⁷Wui Wuuö Jwøk, yia met ki ciik moï døc, naa bëëdö naa cädö bäätge ki yïth nïne bëët.

⁹⁸Ciik moï a wø moocge mooø ki leec wïc mo kaala mar nyïïmänna, kiper ciik moøgø nutö buuta cooth.

⁹⁹Aana tïmö ni wïïa leer naa kaala dïpööye 'moa bëët, kiper mana bëëda naa lääŋŋa gïïa caanï.

¹⁰⁰Wïïa atïmö ni leer ni kaala wïth jøøa døøŋŋø, kiper pwöc moï yaa gwøø.

¹⁰¹Raa yaa mänö ki jïëth bëëtö moa reyø bëët, kiper nee luummï gwøa.

¹⁰²A kär gaa wøk ki ri luup ŋøl moï, kiper beeye ïïni ki dëërï na pwöny aani.

¹⁰³Luummï bëëdö ni met jïra døc, ni bëëde ni ŋweeth dhaa ni kaala maar kïc.

¹⁰⁴Leec wïc wø jooda joodø ki køør ciik moï; kiper manøgønø, a män ki jïëth tööt bëët.

¹⁰⁵Wui Wuuö Jwøk, luummï caala lamba mo meenya nyïma, ni bëëde ni caala tar mo meenya jööra.

¹⁰⁶Aano nø kööŋ kiper naa cäädha køør luup ŋøl moï na näk adïëri, naa puta bëëtö naa tïïya geni cooth.

¹⁰⁷Wui Wuuö Jwøk, aana cännö døc; 'ba cøm cwïnya ki køør luummï.

¹⁰⁸Wui Wuuö Jwøk, wïny luumma man wø pwøa ïïni ki gø, ni pwönynyï aani ki køør luup ŋøl moï.

¹⁰⁹A bëëdö yïthakic kwøw ki thøø cooth, 'ba wïïa bäŋ wø wïl ki ciik moï.

¹¹⁰Jøøa reyø aana cekge ka abïëp, 'ba a kär gaa wøk ri pwöc moï.

¹¹¹Gïïa caanï atïmö na 'moa na bäre bäre, kiper beeye geni ni wø døøc cwïnya mo met.

¹¹²Cwïnya acïba køør ciik moï, kiper nee gwøa na bäre bäre këël aŋuun kwøw mara.

¹¹³A män ki jiy mo wïdö yïthakic acaare ariiø, 'ba a mëër ki ciik moï.

¹¹⁴Beeye ïïni ni wø kana raa buute, ni beeye ï na kwöt leny mara; naa bëëdö naa ŋäätha luummï.

¹¹⁵U jø wø tïïc gïï mo reyø, daagu rou buuta, kiper nee ciik mo Jwøk mara nee gwøa.

¹¹⁶Jøl aani ki køør luummï, kiper naa kwøa, ni kär niï wëëga ŋäädhe mara duunnö ki lään wïc bääta.

¹¹⁷Jøl aani, kiper naa piem, nee ciik moï wøøra cooth.

¹¹⁸Jø wø gaa wøk bëët ri ciik moï kwierï kwierø, kiper cwøk moge bäŋ gïn duue.

¹¹⁹Jøøa reyø bäät piny bëët wø wetï wøk kaamar juu; kiper manøgønø, a mëër ki ciik moï.

¹²⁰Dëëra atïmö ni kwanynyi kiper mana lwäya ki ïïni, naa bëëdö naa lwäär ki luup ŋøl moï.

¹²¹Aani luup wø ŋøla ŋølø na karge, naa tïïya adïëri; kär a wiiï ceŋ jø wø thiel aani piny.

¹²²Gwøk aani, a na dhaanhnhï, naa jïta ki bëëtö mo beer; män jø atöör naa ba thielge piny.

¹²³Waŋa atal jöö naa koora pïëm marï, ki luummï na beer.

¹²⁴Gïïo tïïyï jïra, a na dhaanhnhï, tïïyï ki køør mëër marï ni wø ba jøøl, ni pwönynyï aani ki ciik moï.

¹²⁵Aana dhaanhnhï; mooc aani ki leec wïc, kiper nee tiet ciik moï nee ŋääa.

¹²⁶Wui Wuuö Jwøk, beeye kar tïïc marï gø ennø, kiper jiy ciik moï aŋølge.

¹²⁷'Ba ka adïëri møn, aani a mëër ki ciik moï, ni kaala warkey, këël warkey mana tøŋ.

¹²⁸Kiper manøgønø, a bëëdö ni aano jïëy ni pwöc moï bëët beege karge, ni bëëda naa män ki jïëth tööt bëët.

¹²⁹Ciik moï rëëma ec; kiper manøgønø, geni gwøa gwøø.

¹³⁰Ki man kwany tiet luupï cïpö ki tar, ni cïpö ki leec wïc jï jøøa näk poot bäŋ gïn ŋäcge.

¹³¹A bëëdö ni aano wär ni dhaa yaa ŋaamø, naa lääŋŋa ciik moï.

¹³²Luu wïïï baŋa ni nyoothï mëër marï jïra, kaawat man wø tïïyï jï jø wø mëër ki ïïni.

¹³³Bwøth aani ki køør luummï, naa ba bööt raayi.

¹³⁴Käl aani wøk ceŋ jø wø thiel jiy piny, kiper nee pwöc moï gwøa.

¹³⁵Wëëk tac täärnyïmï rieny bääta, a na dhaanhnhï en, ni pwönynyï aani ki ciik moï.

¹³⁶Pï nyeŋŋa bëëdö ni lwöra piny kaamar pï naam, kiper jiy bëëdö ni ciik moï ba gwøkge.

¹³⁷Wui Wuuö Jwøk, ï bëëdö ni marï beer, ni luup ŋøl moï thïïŋ.

¹³⁸Ciik moa cïpï beyø, ni beege ciik ma adïëri døc.

¹³⁹Aana këëyö na bäre bäre, kiper mana ö nyïïmänna na wecge luummï.

¹⁴⁰Luummï tøŋ ni caala gïn mo otwønø, ni bëëda, a na dhaanhnhï, naa mëër ki gø.

¹⁴¹A bëëdö ni kara thiinh ni aano taaø, 'ba wïïa ba wïl ki pwöc moï.

¹⁴²Bëënynyö marï beeye bëënynyö mo bëëdö na bäre bäre, ni ciik moï beege adïëri.

¹⁴³Gïï mo leth aö bääta, ni bëëda naa rämö, 'ba a poot bëëdö ni yia met ki ciik moï.

¹⁴⁴Ciik moï bëëdö na adïëri na bäre bäre; mooc aani ki leec wïc naa bëëda naa kwøw.

¹⁴⁵Wui Wuuö Jwøk, a jwöŋö dëërï ki cwïnya bäre; wïny mara; aani ciik moï gwøa gwøø.

¹⁴⁶A jwöŋö dëërï; piem aani; aani ciik moï gwøa gwøø.

¹⁴⁷A wø ööa maal ni øw poodi ni kwaa ïïni, naa ŋäätha luup moï.

¹⁴⁸Nyeŋŋa lwieny ki wäär bäre, naa bëëdö naa cädö bäät luup moï.

¹⁴⁹Wui Wuuö Jwøk, wïny dwøra ki køør mëër marï ni wø ba jøøl, ni cäŋï a mooyø ki kwøw ki køør luup ŋøl moï.

¹⁵⁰Jø wø caath køør gïï mo reyø, gena nyänhnhö; geni karge bäyö ki ciik moï.

¹⁵¹Wui Wuuö Jwøk, ï bëëdö ni karï cään, ni ciik moï bëët beege adïëri.

¹⁵²Kanya kwanya ciik moï kany mo bäär, aŋääa ni tietge okëët piny na bäre bäre.

¹⁵³Neen caannø mara ni kønyï aani, kiper wïïa bäŋ wø wïl ki ciik moï.

¹⁵⁴Ŋun aani ni piemï aani, ni cäŋï a mooyø ki kwøw ki køør luummï.

¹⁵⁵Jøøa reyø karge bäär ki pïëm man wø piem jiy ki gø, kiper ciik moï ba manyge.

¹⁵⁶Wui Wuuö Jwøk, mëër marï dwøŋ; cäŋ a mooyø ki kwøw ki køør luup ŋøl moï.

¹⁵⁷Jø wø caan aani ki jø wø män ki aani thööth, 'ba a bäŋ wø gaa wøk ki ri ciik moï.

¹⁵⁸Jø wø tïïö ki gïï mo reyø ki piny raŋŋa naa ba many dëëtge, kiper luummï bäŋ wø gwøkge.

¹⁵⁹Wui Wuuö Jwøk, raŋ mëër man mëëra ki pwöc moï ki gø en; cäŋ a mooyø ki kwøw ki køør mëër marï ni wø ba jøøl.

¹⁶⁰Luup moï bëët beege adïëri; luup ŋøl moï na beyø bëët bëëdö na bäre bäre.

¹⁶¹Kwääri a caange caannø ki gïn mo bäŋ tiere, 'ba a bëëdö naa wøøra luupï ki yi cwïnya.

¹⁶²Yia wø mïnni ka luummï kaawat man wø mïn yi ŋat mo o ojïtö ki jap twëër mo thööth.

¹⁶³A män ki tööt, ni yia raac ki gø døc; 'ba a mëër ki ciik moï.

¹⁶⁴Ï wø pwøa pwøø ki kwöre abïriiø ki yi cäŋ kiper luup ŋøl moï na beyø.

¹⁶⁵Jø wø mëër ki ciik moï, jïge da jwöm mo päl ki cwïnyge, ni ge bëëdö ni bäŋ gïn mo cwaany tietge.

¹⁶⁶Wui Wuuö Jwøk, a bëëdö naa koora ïïni naa piemï, naa bëëdö naa kïtha ciik moï bäät tïïc.

¹⁶⁷A bëëdö naa gwøga ciik moï, naa mëër ki geni døc.

¹⁶⁸A bëëdö naa gwøga pwöc moï ki ciik moï, kiper bëëtö mara bäre ŋäyï.

¹⁶⁹Wui Wuuö Jwøk, beerra man wïnynyï oduuc kwac mara; mooc aani ki leec wïc ki køør luummï.

¹⁷⁰Beerra man wïnynyï kwac mara, ni piemï aani ki køør luummï.

¹⁷¹Beerra man ö dhaa ni pwøc ïïni, kiper man wø pwönynyï aani ki ciik moï.

¹⁷²Beerra man wära ki duut kiper luummï, kiper ciik moï bëët beyø.

¹⁷³Beerra man bëëdï ni riï iï jiiŋŋø ki man kønyï aani, kiper pwöc moï yaa jierø.

¹⁷⁴Wui Wuuö Jwøk, a bëëdö naa lääŋŋa ïïni naa piemï; met ec wø jooda ka ri ciik moï.

¹⁷⁵Beerra man bëëda naa kwøw kiper nee ï wø pwøa, ni bëët luup ŋøl moï ni køønynya aani.

¹⁷⁶Kany wø bëëda naa thääyö kaamar diel mo orwäänyö, many aani, a na dhaanhnhï, kiper wïïa bäŋ wø wïl ki ciik moï.