Read anuak Dut Pwøc 132 Bible Online

Dut Pwøc 132 - anuak bible

Dut Pwøc 132

¹Manøgø beeye duut Deebit, ni beeye duut wääth man wø wär ni jøw iitha thuur ni jøw cøøa Øt Wuuö Jwøk. Wui Wuuö Jwøk, kär wïïï wïl ki Deebit, ki gïïa leth bëët na pïï dëëre,

²ki gïna kööŋe ki gø jïrï, ï na Wuuö Jwøk, ï na Jwø Jeekap na teek, na kööe,

³na «A ba døny yi øtø mara, naa ba ci kar niine mara;

⁴nyeŋŋa ba wëëga niine, ni ba nanna,

⁵këël mano jïta ki kar bëëtö jï Wuuö Jwøk, eni na Jwø Jeekap na teek.»

⁶Ka adïëri møn, acanduk mar Wuuö Jwøk gïr gø awïny kwäyø ni ge ena Eeparata, ni jootge gø yi ŋööm jø Kiriat-Jeerim, ni kälge gø Jerucalem.

⁷'Ba ennø, beerra man cøø kar bëëtö mare, eni na Wuuö Jwøk, ni wøørø eni kanya näk køøm tiete.

⁸Wui Wuuö Jwøk, ö maal ni ciï kar bëëtö marï, ïïni, ka acanduk ni wø nyooth teek marï.

⁹Beerra man ö dïlämme moï ni røøge bëënynyö dëëtge, ni ö jiyï mo wø cwïnyge en køørï ni kwöŋge ki met ec.

¹⁰Wui Wuuö Jwøk, ki køør luumma caanï jï dhaanhnhï ma Deebit, kär täärnyïmï kanï ki nyeya mana røønyï.

¹¹Ïïna kööŋ jï Deebit ki kööŋ ma adïëri, miï ba døø ŋääï ki gø, na kööï, ni «Nyec ocïba jï ŋat mo käla dëërï.

¹²Ni näk jøw okäl dëërï luumma tuuda gwøkge gwøø, ki ciik 'moa moo pwönynya geni ki ge, jøw okäl dëëtge thuwø nyec cøøa jïge na bäre bäre.»

¹³Wuuö Jwøk Dhayan ee jierø; ni eni manynya gø na kar bëëtö mare, ni kööe,

¹⁴ni «Man beeye kar bëëtö mara na bäre bäre; a bëëdö kany, kiper a manynya gø.

¹⁵Dhayan gwïëdha gwïëdhö ni tïm cammi ni päl yie, ni wëëga jøøa can moa en yie jäŋö.

¹⁶Dïlämme moe owëëga ŋäc pïëm man wø piem jiy ki gø, ni ö jiye mo wø cwïnyge en køøra ni kwöŋge ki met ec.

¹⁷Kaace a röönyö ki dhaanhø mo teek mo käla ri Deebit, aani, a tïŋŋa maal ki nyikwaare mo bëëdö na bäre bäre.

¹⁸Nyïïmän moe lään wïc orøøa dëëtge kaamar abïï, 'ba eni, aduda mare obëëdö ni paŋŋi.»