Read anuak Dut Pwøc 139 Bible Online

Dut Pwøc 139 - anuak bible

Dut Pwøc 139

¹Manøgø beeye duut Deebit. Wui Wuuö Jwøk, cwïnya adarï ni ŋäyï bëëtö mara.

²Pïïnna piny ki öönynya maal ŋäyï, na acaara mara ŋäyï kany wø poode ni poot kär tägö.

³Wääth mara ki nyaaŋ dëëra piny wø neetï neetø, ni jöör bëëtö mara bäre ŋäyï.

⁴Wui Wuuö Jwøk, këël kany wø poode ni luubö poot kär tuny wøk ki dhaa, luummögø ŋäyï na bäre.

⁵A iï ciel dïër, ni cerï iï peeth bääta.

⁶Teeŋ ŋäc mana ŋäyï aani, yia rëëm ki gø; ni tiere teek døc, ni ba løny jïra ki man kwanya gø.

⁷?Aŋø, a kaa ŋø nø noo cøøa yie ni jwïëy moï tøør yie? ?Naa kaa nø noo reŋŋa yie naa ŋwieya ïïni?

⁸Ni näk maa cøøa maal, ï nut yie. Ni näk maa cøøa kar bëët jwïëc jøøa no othøw, ï poot nut kaace thuwø.

⁹Këël a doo määtö kaamar wenyø naa tägi ka jï løø kur tuul-cäŋ, naa cøøa jï kur pänh-cäŋ,

¹⁰a poot bwøthï bwødhø kaace, ni jølï aani ki teek marï.

¹¹Ni näk maa köö, na «A gëëŋ muudhe gëëŋö, ni tïm tarri mana en buuta na muudhö,»

¹²ki baŋï muudhö ba cøl, ni wäär tar ni caala waŋcäŋ, kiper muudhö ki tar bëët röömi ki baŋï.

¹³Wui Wuuö Jwøk, thäk dëëra bëët tïïya ïïni, ni cwääyï aani ni tïma ni aana dhaanhø yi mera.

¹⁴Ï pwøa pwøø, kiper aana cwääc ki cwääc mo rëëma ec miï di lwäärö ki køøre. Tïïe moï thääŋa ec møn, ni beeye gïna ŋääa døc na adïëri.

¹⁵Kanya cwääc aani yi mera kany mo kuc, ni cwääc aani ki cwääc mo beer, cuu dëëra nëënö jïrï, ni patha okanø ki ïïni,

¹⁶naa nëënö jïrï kanya pooda naa poot kär tïmö ni aana dhaanhø; ni ö nïne moa no okwaanø kipera bëët ni gööri piny yi wëëlö marï, kanya pootge ni ge poot kär tägö.

¹⁷Wui Jwøk, acaare moï perge leth jïra, ni kwäänge thööth døc;

¹⁸ni näk mo kwaana kwaanø, kwäänge tïmö ni kaala nyeŋ akwöö. Kany wø pääa, a poot bëëdö ka ïïni.

¹⁹Wui Jwøk, ni näk mo jøøa reyø 'nägï nääö, doo beer. U na jø wø many rem jiy, daagu rou buuta.

²⁰Wui Jwøk, nyïïmännï cäänö dëërï ki gïï mo reyø, ni ge raanynya nyeŋŋï ki gïn mo bäŋ tiere.

²¹?Wui Wuuö Jwøk, aŋø, jøøa män ki ïïni, a kär männö ki geni thuwø? ?A kär bëëdö naa ba many dëët jøøa thïïŋ dëëtge kiperï?

²²Aana männö ki geni na bäre bäre, ni tïmge na nyïïmän 'moa.

²³Wui Jwøk, dar yia ni ŋäyï mar cwïnya; pääny aani ni jootï gïï wø pär cwïnya ki ge;

²⁴ni näk da gïn mo kännö ki pänh cwïny jïrï ri bëëtö mara, neenï, ni putï bëëtö na bäre bäre naa bwøthï ki jöö mo beer.