Read anuak Dut Pwøc 140 Bible Online

Dut Pwøc 140 - anuak bible

Dut Pwøc 140

¹Manøgø beeye duut Deebit. Wui Wuuö Jwøk, käl aani wøk ceŋ jøøa reyø, ni gwøgï aani ceŋ jø kwöri,

²jø wø caar tïï gïï mo reyø ki cwïnyge, ni ge bëëdö ni ge cøønna yïth jiy kiper leny.

³Lëëpge ege tïïö ni beth kaamar leep thwöl, ni luup mo wø cur dhøkge caala cïm mar olwierø.

⁴Wui Wuuö Jwøk, gwøk aani ceŋ jøøa reyø, ni gwøgï aani ceŋ jø kwöri, jø wø määnyö ki jöö ki man raanyge aani ki gø.

⁵Jø atöör abïëp ege ciiø kipera, ni cekge thøøli øtjööra, ni cekge akupe kipera.

⁶Aana lämö jï Wuuö Jwøk ni kööa, ni «Beeye ïïni na Jwøk mara; Wui Wuuö Jwøk, cek ïthï ki kwac mara.

⁷Wui Wuuö Jwøk, ï na kwäärö mara, ï na teek ni wø piem aani, aana gëëŋï dïcäŋ leny.

⁸Wui Wuuö Jwøk, gïïa many jø raayi kär tïïyï jïge, ni ba wëëgï gïïa tuutge thur kare, nee wïthge ba tïŋge maal.

⁹«Jø wø ciel aani dïër, beerra man ö luup mo wø carge ki lëëpge ni døøge wïthge.

¹⁰Beerra man päth cuki mo wärri bäätge; ni leeŋ geni yi maac, ni leeŋ geni yïth buri mo bäyö, nee ge ba duuge wøk këët.

¹¹Kär dee dïwääc nyeŋ mo jïti ki kare dï paac; beerra man ö gïïa reyø ni dwarge jø kwöri.»

¹²Ŋääa ni Wuuö Jwøk cwaga jøøa no ocaannø, ni luup jøøa can ŋøle na karge.

¹³Wui Wuuö Jwøk, ka adïëri møn, jøøa beyø nyeŋŋï pwøcge pwøø, ni ö geni na cwïnyge thïïŋ ni bëëtge ki ïïni na aciel.