Read anuak Dut Pwøc 144 Bible Online

Dut Pwøc 144 - anuak bible

Dut Pwøc 144

¹Manøgø beeye duut Deebit. Pwøc en jï Wuuö Jwøk, eni na teek mara, eni ni wø pwöny aani ki leny, ni wø døøc ceŋŋa mo teek naa këëda.

²Bee eni ni wø mëër ki aani ki mëër mo ba jøøl, ni bee eni na kar gwøk røk jïra; ni eni bëëdö kaamar kiir mo teek jïra, ni ena pïëmi mara. Bee eni na kwöt leny mara, ni bee eni ni wø kana raa buute, ni bee eni ni wø dïïm jiy ni tïmge ni ge ena tiera.

³?Wui Wuuö Jwøk, dhaanhø agïnaŋø, ni lääŋŋï gø en? ?Ni o dhaanhø agïnaŋø, ni cädï kipere en?

⁴Dhaanhø caala jam dhøk jaak, ni nïr kwøw moe maayø kaamar tïpö.

⁵Wui Wuuö Jwøk, jap maal ni ööï piny, ni gutï kïte nee duuŋge ki jïrö.

⁶Jääŋ agaackøth ni keethï nyïïmänna, ni thööyï ge ka athëëre moï ni riemmï geni.

⁷Rwää cerï piny ki maal, ni piemï aani ni kälï aani wøk ki yïth gïïa leth na caal naama päŋ, naa kälï wøk ka ceŋ jøøa path,

⁸ni wø car cwøk, ni wø kööŋ ki tööt.

⁹Wui Wuuö Jwøk, a wär ki duut mo nyään jïrï, naa pöödö ki thoom mo thøøli moe apaar.

¹⁰Beeye ïïni ni wø wëëk nyec Icriel käädhö, ni beeye ïïni ni wø piem dhaanhnhï ma Deebit.

¹¹Piem aani dho opëëlla raac, ni kälï aani wøk ceŋ jøøa path, ni wø car cwøk, ni wø kööŋ ki tööt.

¹²Beerra man ö wäätwa, kany wø pootge ni ge poot therø, ni døøŋge kaamar jaath mo oløth; ni tïm nyïïwa ni mïërö ni rege ege kørø, ni caala jer gøøt mo øt nyeya.

¹³Beerra man ö odïï mowa ni päŋge ki wïth caammi ma teeŋi, ni ö dïëki mowa ni nyöötge ni meetge rege ni ba løny ki kwaan dï pwöla.

¹⁴Beerra man ö dhäki mowa ni tïmge ni jayø bëët, ni bäŋe gø mo bwön wøk, ni bäŋe ya aciel mo rwäänyi. Ni tïme ni bäŋ ŋat mo göö ko oduuru dï paac.

¹⁵Gwïëth en jï jø paan wø bëëdö ki teeŋ bëëtö manøgø; gwïëth en jï jø paan wø Jwøge beeye Wuuö Jwøk.