Read anuak Dut Pwøc 145 Bible Online

Dut Pwøc 145 - anuak bible

Dut Pwøc 145

¹Manøgø beeye duut Deebit. Wui Wuuö Jwøk, ï na nyeya mara, nyeŋŋï tïŋa maal, ni pwøa ïïni na bäre bäre.

²Ïïno pwøa ki yïth nïne bëët, ni pwøa ïïni na bäre bäre.

³Ï na Wuuö Jwøk, ï dwøŋ, ni ïïno rømø døc ki man pwøi, ni dööŋö marï ba løny ki man ŋääi bäre.

⁴Wui Wuuö Jwøk, beenhnhø man nø tïïe moï opwøcge, ni caange gø jï beenhnhø maya, ni køpge gïr tïïe moï na døøŋŋø.

⁵Ïïno wøør jiyi ni køpge ajiem marï na dwøŋ; 'ba aani thuwø, a wø cädö kiper tïïe moï ni wø rëëm ec.

⁶Tïïe moï na døøŋŋø ni wø thäŋ eci ki ge ocaan jiyi; 'ba aani thuwø, dööŋö marï køba købø.

⁷Kany wø cät jiyi kiper beer marï na dwøŋ, gïr gø køpge købø, ni wärge ni yïthge met kiper adïëri marï.

⁸Wuuö Jwøk yie bäth ni mëër ki jiy; eni ba laar wëër, ni mëër mare päl ni ba jøøl.

⁹Wuuö Jwøk täärnyïme leer ki jiy bëët, ni bäth ec mare wø nyoodhe nyoodhø jï gïïa cwääe bëët.

¹⁰Wui Wuuö Jwøk, gïïa cwääyï bëët ï pwøcge pwøø, ni ö jiyi moï ni wø bëëdö ni cwïnyge ena køørï ni pwøcge ïïni.

¹¹Ajiem mar bura marï køpge købø, ni caange gïr teek marï,

¹²kiper nee tïïe moï na døøŋŋø nee ŋäc jiyi bëët, këël ajiem buyï na dwøŋ.

¹³Bura marï bëëdö na bäre bäre, ni ö teek nyec marï ni bëëde ni nut yïth beenhnhe bëët. Gïïa caan Wuuö Jwøki bëët di ŋäädhö, ni tïïe moe bëët wø tïïe ka køør mëër mare ni wø ba jøøl.

¹⁴Wuuö Jwøk jøøa näk manynya pädhö bëët di jølø, ni tïŋ jøøa en yïth gïïa leth maalø.

¹⁵Wui Wuuö Jwøk, gïïa kwøw bëët nyeŋge ena baŋï, ni cam marge cïpï cïbö jïge kanya näk kare.

¹⁶Cerï wø peerï peerø jï gïïa kwøw bëët, ni mooyï geni ki gïn cam ni jäŋge kaawat man wø manyge.

¹⁷Jöör bëëtö mar Wuuö Jwøk beer bäre, ni tïïe moe bëët wø tïïe ka køør mëër mare ni wø ba jøøl.

¹⁸Wuuö Jwøk bëëdö ni kare cään ki jø wø cøør nyeŋŋe bëët, ni beege jø wø cøør nyeŋŋe ki cwïny ma adïëri.

¹⁹Jø wø lwäär ki eni, gïï wø manyge wø cïbe cïbö jïge, ni wïny kwac marge, ni køny geni.

²⁰Wuuö Jwøk jø wø mëër ki eni bëët di gwøø, 'ba jøøa reyø bëët raanynye raanynyø.

²¹Wuuö Jwøk pwøa pwøø cooth, ni ö jiyi bëët ni pwøcge eni na en kur keere na bäre bäre.