Read anuak Dut Pwøc 146 Bible Online

Dut Pwøc 146 - anuak bible

Dut Pwøc 146

¹Manøgø beeye duut Deebit. Alëluya, pwøc en jï Wuuö Jwøk. Aani, Wuuö Jwøk pwøa pwøø ki cwïnya bäre.

²Wuuö Jwøk pwøa pwøø ki yïth nïr kwøw 'moa bëët, ni wära ki dut pwøc jï Jwøk mara kany pooda naa kwøw bäät pinyi en.

³Käru bëëdö nou ŋäätha kwäärö, kiper ena dhaanhø jaak mo bäŋ gïn mo kønye rou.

⁴Jwïëy moe aay, ni ö rïŋ dëëre ni døø yi ŋöömö, ni put acaare moe rwäänyö dïcäŋöce.

⁵Gwïëth en bäät ŋat wø køny mare joode baŋ Wuuö Jwøk, Jwø Jeekap, ni wø bëëdö ni ŋäätha Wuuö Jwøk.

⁶Wuuö Jwøk beeye Jwøa cwääc maal ki piny, ki naama dwøŋ, këël jammi bëët moa en yïthge. Eni luumme bëëdö ni di ŋäädhö na bäre bäre.

⁷Eni jøøa no othiel piny di ŋunnö ki ŋøl ma kare, ni mooc jøøa näk dëëtge da käc ki cam. Wuuö Jwøk beeye wø pät jøøa näk otwöö.

⁸Wuuö Jwøk beeye wø jap nyeŋ cööye; Wuuö Jwøk beeye wø tïŋ jiy maal mo wø bëëdö no opädhö; Wuuö Jwøk bëëdö ni mëër ki jø wø bëëdö ni marge adïëri.

⁹Wuuö Jwøk beeye wø gwøk juurre mo wø bëëdö na wëëlle paac, ni wø køny kïïe ki määr thuunhnhi; 'ba gïï wø tuut jøøa reyø raanynye raanynyø.

¹⁰Wuuö Jwøk bëëdö na wïth jammi bëët na bäre bäre; u na jø Dhayan,[17] Jwøk maru bëëdö ni nut yïth beenhnhe bëët. Alëluya, pwøc en jï Wuuö Jwøk.