Read anuak Dut Pwøc 147 Bible Online

Dut Pwøc 147 - anuak bible

Dut Pwøc 147

¹Alëluya, pwøc en jï Wuuö Jwøk! Beeye gïn mo beer ki man wärø ki dut pwøc jï Jwøk marø, kiper beeye gïn mo beer mo duunnö ki met ec.

²Wuuö Jwøk Jerucalem cäŋe ka geerø, ni duu jø Icriel yie moa no omaaø ki tøŋ.

³Eni jøøa näk cwïnyge opädhö, cwïnyge di cømø, ni køny jøøa no oööl.

⁴Eni kwään ceer ŋääe, ni nyeŋge ee caaø bëët.

⁵Jwøk marø dwøŋ, ni teek mare päl, ni leec wïïe bäre ba løny joot.

⁶Wuuö Jwøk cuŋŋa kur jøøa no ocaannø, 'ba jøøa reyø dwøge piny.

⁷Wärru jï Wuuö Jwøk ki duut nou dwøga met ec, wärru ki dut pwøc jïre, eni na Jwøk marø, nou pöödö ki thoom.

⁸Bee eni ni wø mooc maal ki pøøl, ni wø jääŋ køth bäät piny, ni wø wëëk luum tuuö bäät kïte.

⁹Eni lääy wø di mooø ki cam, ni mooc nyïï agääe thuwø kany wø jwöŋge.

¹⁰Patha teek mar okweeny noo døøc yi Wuuö Jwøk mo met, ni patha teek mar dhaanhø noo døøc yi gø mo met;

¹¹'ba Wuuö Jwøk yie wø mïnni ka jø wø lwäär ki eni, jø wø ŋääth mëër mare ni wø ba jøøl.

¹²Wui, u na jø Jerucalem, pwøyu Wuuö Jwøk! Pwøyu eni na Jwøk maru, u na jø Dhayan!

¹³Kiper dïdëëdi mo dhøk kiiri mou ee tïïö ni teek, ni jiy mou mo oen pou ee gwïëdhö.

¹⁴Eni pou bäre di mooø ki bëët-mëër, ni caam uuni ki beel ma liil ni jäŋŋu.

¹⁵Eni dwøre wø di jääŋŋö piny, ni ö luumme ni laar thur kare.

¹⁶Rwöc wø käle piny ni rïëp piny kaamar aleeŋŋa, ni wëëk thööy ööny bäät piny.

¹⁷Pey wø gwääre gwäärö kaamar gii; ?'ba aŋa ni løny jïre ki man cuŋŋe yi köö mare?

¹⁸Eni luumme wø jääŋŋe jääŋŋö ni løc peyi, ni kööl jamø ni tïm pïïyi ni kwödö.

¹⁹Luup moe wø caane caanø jï nyïïkwaac Jeekap, ni caan ciik moe ki luup ŋøl moe jïge, ge na jø Icriel.

²⁰'Ba eni luumme käre caanø jï wïth juurre, ni geni ciik moe kucge. Alëluya, pwøc en jï Wuuö Jwøk!