Read anuak Dut Pwøc 148 Bible Online

Dut Pwøc 148 - anuak bible

Dut Pwøc 148

¹Alëluya, pwøc en jï Wuuö Jwøk. Pwøyu Wuuö Jwøk, u ni en maal, ni pwøyu eni ki kwöra enu yïthge maal.

²Pwøyu eni, u na nyïïatwiet maal moe; pwøyu eni, u na lwaae moe ni en maal.

³Cäŋ ki dwääy, pwøyu Wuuö Jwøk; ceer bëët ni wø cïpi ki tar maal, pwøyu Wuuö Jwøk;

⁴Maal ki pøøl bëët, pwøyu Wuuö Jwøk.

⁵Beerra man ö gïïögø bëët ni pwøcge nyeŋ Wuuö Jwøk, kiper kanya cwääc ge, caana dwøre jaak, ni putge thur karge.

⁶Ni cïp geni kwörge nee bëëtge na bäre bäre, ni mooc geni ki ciik mo ba dak.

⁷Pwøyu Wuuö Jwøk ki kwöra enu yïthge bäät piny, ni beeye u lääc naama dwøŋ, ki kwöra päŋ bëët,

⁸ka agaackøth, ki pey, ki køth, ki pøøl, ka atuunna ni wø kwödö ki køør ciige.

⁹Beerra man ö thuuri ki kïte bëët ni pwøcge eni, ki jenni mo wø nyïïge cam ki jer geer bëët,

¹⁰ki lääc paap ki mo paac bëët, ki gïï wø muuli ki piny ki weny bëët.

¹¹Pwøyu eni, u na nyec bäät piny ki jiy bëët, ki kwääri ki dïŋut luup mo bäät piny bëët,

¹²ki wøpe ki nyïïakuue bëët, ki jäle ko obwöre bëët.

¹³Beerra man ö gïïögø bëët ni pwøcge Wuuö Jwøk, kiper dwøŋŋa nyeŋŋe keere, na ajiem mare kaala ajiem maal ki piny.

¹⁴Eni teek mar jiye atïïe nee bëëde ni cäätha maal, ni ö jiye bëët moa cwïnyge en køøre ni jïtge ki pwøc, ni beege jø Icriel na bëëde dïge. Alëluya, pwøc en jï Wuuö Jwøk.