Read anuak Dut Pwøc 16 Bible Online

Dut Pwøc 16 - anuak bible

Dut Pwøc 16

¹Manøgø beeye duut Deebit. Wui, ï na Jwøk, gwøk aani, kiper raa yaa kan buutï.

²Aana köö jïrï, ï na Wuuö Jwøk, ni «Beeye ïïni na kwääya, jammi bëët moa beyø na en jïra käla baŋï.»

³Jøøa bëëdö na jic Jwøk yi ŋöömmi, gena jiy mo owøørø, ni beege jøøa met yia ki geni døc.

⁴'Ba jø wø jier juu møøk ge meeta kïmmö bäätge. Aani a ba cïpi ko olämme jï juu moge, ni ba kïtha nyeŋ juu moge dhaa.

⁵Wui Wuuö Jwøk, gïna pere leth na tïïyï jïra beeye ki man bëëdï ni ïïna Jwøk mara, ni gum dëël mara ena cerï.

⁶Adïëri møn, bëëtö mara bäre atïïyï ni beer, ni caala dhaanhø mo ojïtö ki ŋøøm mo beyø mo duunnö ki met ec jïre.

⁷Aani Wuuö Jwøk wø pwøa pwøø, eni ni wø pwöny aani; ki wäär thuwø, acaare moe na näk yaa kan cwïnya wø cäŋa cïpö ki pwöc jïra.

⁸Aani a wø bëëdö naa lääŋŋa Wuuö Jwøk cooth; a ba pädhi kiper mana bëëde ni eni nut buuta.

⁹Kiper manøgønø, yia atïmö ni met, ni kanynya, ni puta bëëtö ni aano gwøø.

¹⁰Kiper jwïëya ba wiiï kar bëët jwïëc jøøa no othøw, ni ö dëër dhaanhnhï na en kur keere ni ba wëëgï gø bëëtö yi bwörö.

¹¹Øtjöör kwøw wø nyuunhnhï aani, ni døøyï yia mo met døc kiper man wø nudï buuta; 'ba gïï wø cïpi ki met ec nutö buutï cooth.