Read anuak Dut Pwøc 20 Bible Online

Dut Pwøc 20 - anuak bible

Dut Pwøc 20

¹Manøgø beeye duut Deebit. Beerra man ö Wuuö Jwøki ni wïny kwac marï kany wø näk miï ena yïth gïï mo leth; beerra man ö eni na Jwø Jeekap ni koor ïïni.

²Beerra man ö Wuuö Jwøki baŋï ki kar bëëtö mare na en bäät Kïn Dhayan, ni køny ïïni ni mooc ï ki teek.

³Beerra man ö Wuuö Jwøki ni par wïïe ki muuce moï bëët, ni put bëëtö ni yie met ko olämme mo wø waaŋ bäre mo wø cïpï.

⁴Beerra man ö Wuuö Jwøki ni tïïc gïï wø caarï bëët nee thurge karge, ni tïïe ka køør mana manynyï ki cwïnyï.

⁵Waani wa wär ki duut ni yïthwa met kiper mano böötï nyïïmännï, ni tïŋwa bëëre mowa maal ki nyeŋ Jwøø. Beerra man ö Wuuö Jwøki ni wëëk gïï wø pëënynyï baŋe bëët thur karge.

⁶'Ba ennø, ŋääa ni Wuuö Jwøk dhaanhnhe na wï gø thïïmme ki maaw ni røønya gø na nyeya kønye kønyø, ni ö Wuuö Jwøki ni wïny kwac mare ki maal kar bëëtö mare na en kur keere, ni køny eni ki køny mo dwøŋ ki køør teek mare.

⁷Jø møøk ŋäätha jïëth leny mo wø tut okwëënyi, ni ö møga ni ŋääthge okwëënyi mo leny; 'ba øøni, ø ŋäätha teek Wuuö Jwøk, Jwøk marø.

⁸Geni tietge ocwanyge ni päthge, 'ba øøni ø ööa maal ni cuŋŋö ni ø teek.

⁹Wui Wuuö Jwøk, køny nyeya nee nyïïmän bööte; wïny marwa kany wø kwacwa ïïni.