Read anuak Dut Pwøc 24 Bible Online

Dut Pwøc 24 - anuak bible

Dut Pwøc 24

¹Manøgø beeye duut Deebit. Piny bäre ki jammi bëët moa en yie beege mo Wuuö Jwøk, këël jiy bëët mo bëëdö yie en.

²Kiper eni piny acwää bäät näpa døøŋŋø, ni këël tier gø piny ni teek.

³?Aŋa ni løny jïre ki man eth bäät Kïn Wuuö Jwøk? ?Na aŋa ni løny jïre ki man cuŋŋe kar bëëtö mar Wuuö Jwøk na en kur keere?

⁴Beeye ŋat mo bëëdö ni tïïe moe ka acaare moe beyø, na ŋat mo cwïnye ba en køør gïn mo patha adïëri, ni ba kööŋ ni mare cwøk.

⁵Teeŋ ŋatøgø gwïëth Wuuö Jwøki gwïëdhö, ni jïëyi ya Jwøki ni mare beer, ni beeye Jwø wø piem eni.

⁶Jiy mo caala teeŋ ŋatøgø beege jø wø bëëdö ni manynya Wuuö Jwøk, ni wø many eni, eni na Jwø Jeekap.

⁷Wui dhøk kiiri, japu rou; japu rou, u na dhøk kiiri moa cääŋŋe, kiper nee nyenynya näk ajiem mare päl nee dunynye.

⁸?Aŋø, nyenynya näk ajiem mare päl aŋa? Beeye Wuuö Jwøk na teek na dwøŋ, ni bee eni na Wuuö Jwøk ni wø nyooth teek mare kany wø näk ri leny.

⁹Wui dhøk kiiri, japu rou; japu rou, u na dhøk kiiri moa cääŋŋe, kiper nee nyenynya näk ajiem mare päl nee dunynye.

¹⁰?Aŋø, nyenynya näk ajiem mare päl aŋa? Beeye Wuuö Jwøk, eni na wïth jammi bëët, bee eni na nyenynya näk ajiem mare päl.