Read anuak Dut Pwøc 25 Bible Online

Dut Pwøc 25 - anuak bible

Dut Pwøc 25

¹Manøgø beeye duut Deebit. Wui Wuuö Jwøk, a bëëdö na acaara mara bäre ena baŋï,

²naa bëëdö naa ŋäätha ïïni, ï na Jwøk mara; kär wïïa wëëk lääö, ni ba wëëgï nyïïmänna ŋeethø bääta.

³Ka adïëri møn, jø wø raŋ jïrï wïthge ba lääi, 'ba jø wø bëëdö ni kämö jaak wïthge olääi.

⁴Wui Wuuö Jwøk, nyooth jöörï jïra, ni pwönynyï aani ki man cäädha jöörï.

⁵Bwøth aani ki jöörï na näk adïëri ni pwönynyï aani, kiper bee ï na Jwø wø piem aani, naa bëëdö naa raŋŋa jïrï cooth ki yïth nïne bëët.

⁶Wui Wuuö Jwøk, par wïïï ki met ec marï, ki mëër marï ni wø ba jøøl, kiper beeye bëëtö marï cøøn ki mana täge ya acääŋŋe cøøn.

⁷Kär wïïï parï ki raay moa tïïa naa poot thiinh, këël gïïa baaa; Wui Wuuö Jwøk, lääŋ aani ki køør mëër marï ni wø ba jøøl ki beer marï.

⁸Wuuö Jwøk beer ni mare thïïŋ; kiper manøgønø, jø raay wø di pwönynyö ki jöö mo beer.

⁹Eni jøøa mwöl wø di bwødhø ki jöö ma kare, ni pwöny geni ki jööre.

¹⁰Jöör Wuuö Jwøk beeye jöö ma adïëri ni yie da mëër mo ba jøøl jï jø wø gwøk luumma tuude ki gïïa caane.

¹¹Wui Wuuö Jwøk, wëën gïïa baaa ki køør nyeŋŋï, kiper raay 'moa thööth.

¹²Ŋat wø lwäär ki Wuuö Jwøk onyuunh Wuuö Jwøki ki jöö man caadhe.

¹³Eno bëëdö ni bëëtö mare bäre beer, ni tïm ŋøømmi ni ena ceŋ nyïïkwaaye.

¹⁴Wuuö Jwøk gïïa en cwïnye caane caanø jï jø wø lwäär ki eni, ni lam tier gïna näk ee tuudö jïge.

¹⁵Aani, a wø raŋŋa jï Wuuö Jwøk cooth, kiper eni tieta käle wøk ki ya abïëp.

¹⁶Wui Wuuö Jwøk, luu nyïmï baŋa ni kønyï aani ki køør met ec marï, kiper aano dööŋ keera ni aano caarø.

¹⁷Gïï wø raany cwïnya athöönhnhö; beerra man kälï aani wøk ki yïth gïïa leth ni wø jwøra.

¹⁸Raŋ caarø ki teek bëëtö mara, ni wëënnï raay 'moa bëët.

¹⁹Aŋø ba raŋï nyïïmän 'moa nø, kiper gena tïmö ni ge thööth, ni mänge ki aani ki män mo dwøŋ døc.

²⁰Koor aani ni kønyï aani; kär wïïa wëëk lääö, kiper raa yaa kan buutï.

²¹Beerra man ö bëëtö mara na beer na thïïŋ ni gwøk aani, kiper a bëëdö naa raŋŋa jïrï.

²²Ï na Jwøk, køny jø Icriel yïth gïïa leth bëët ni en bäätge.