Read anuak Dut Pwøc 3 Bible Online

Dut Pwøc 3 - anuak bible

Dut Pwøc 3

¹Wui Wuuö Jwøk, nyïïmänna atïmö ni thööth døc. Gena ö maal bääta ni tïmge ni gëëmö ki aani.

²Jiy mo thööth wø cäänö kipera, ni köge, ni «Eni, bäŋ køny mo di joodø baŋ Jwøk.»

³'Ba ï na Wuuö Jwøk, ï caala kwöt leny man wø gëëŋa dëëra ki gø; ni bee ï, ni wø jooda ajiem ki køørï, ni bee ï, ni wø tïïc aani nee wïïa tïŋa maal.

⁴A bëëdö naa kwaaya Wuuö Jwøk, ni løk kwac mara jïra ki bäät kïnne na en kur keere.

⁵Dëëra wø nyaaŋŋa piny ni gäm nyeŋŋa, ni pääa ni dëëra jööt, kiper jwïëya ena cer Wuuö Jwøk.

⁶A ba lwäyi ki jiy ma kume apaar, mo rege ege ciel laga.

⁷Wui Wuuö Jwøk, ö maal, ni kønyï aani, ï na Jwøa; kiper nyïïmänna bëët adhööŋŋï ki thäkge, ni tøyï lakge, ge na jøøa reyø.

⁸Bee ï na Wuuö Jwøk ni wø piem jiy. Wui Wuuö Jwøk, beerra man gwïëthï jiyï.