Read anuak Dut Pwøc 31 Bible Online

Dut Pwøc 31 - anuak bible

Dut Pwøc 31

¹Manøgø beeye duut Deebit. Wui Wuuö Jwøk, a bëëdö ni raa yaa kan buutï; kär wïïa wëëk lääö na bäre bäre. Køny aani ki køør adïëri marï.

²Wïny dwøra, ni laarï aani køny. Bëëdï niï caala kïdi mo røk kana yie, niï caala kiir mo teek mo gëëŋa aani,

³Kiper ïïna teek mara, ni ïïna kar gwøk røk mara. Beerra man cäädhï maal ni bwøthï aani kiper nee nyeŋŋï pwøc.

⁴Käl aani wøk ki ya abïëba cek jiyi kipera, kiper beeye ï na teek mara.

⁵Wui Wuuö Jwøk, jwïëya acïba cerï; aana wïïlï wøk, ï na Jwø adïëri.

⁶Wui Wuuö Jwøk, a män ki jø wø wøør juu mo bäŋ gïn duuge, 'ba aani, a bëëdö naa ŋäätha ïïni.

⁷Yia wø mïnnö ni kanynya ki køør mëër marï ni wø ba jøøl, kiper mana jootï caannø mara, ni ŋäyï gïïa leth na pïï dëëra.

⁸A kärï cïp ceŋ nyïïmänna, 'ba jöö ajapï jïra.

⁹Wui Wuuö Jwøk, køny aani, kiper bääta da gïï mo leth. Nyeŋŋa awer ni ränyge ki jwøk, ni ö dëëra ki jwïëya ni ränyge thuwø.

¹⁰Kiper nïr kwøw 'moa bëët thööra naa kïmmö, ni cwiiri 'moa thööra naa cooyø. Teek mara aränynyö ki køør gïïa reyø na tïïa, ni ö rïŋ dëëra ni ränynye.

¹¹Aana tïmö naa di jøøŋŋø ki køør nyïïmänna na thööth, na ajøøŋ kaatha jø atuti mara døc. Jøøa ŋäc aani gena tïmö ni lwäär ki aani ki køør ränynyö mara, ni tïm jiyi bëët mo wø joot aani øtjöö ni rïŋö ki aani.

¹²Wïth jiy awïl ki aani kaamar dhaanhø mo othøw, ni wø bäŋ gïn mo caar kipere këët; aana tïmö kaamar dak mo othøw.

¹³Gïïa reyø na møŋ jiy mo thööthi awïnynya, ni bëët lwärri mo dwøŋ naa ee ciel dïër. Kanya bëëtge ni ge cuuŋö kipera, gena tudö naa 'näkge nääö.

¹⁴Wui Wuuö Jwøk, a ŋäätha ïïni, naa wø köö, «Ni ïïna Jwøa.»

¹⁵Gïï wø tägi dëëra bëët ena cerï; køny aani ceŋ nyïïmänna ki ceŋ jø wø caan aani.

¹⁶Wëëk tac täärnyïmï rieny bääta, a na dhaanhnhï, ni piemï aani ki køør mëër marï ni wø ba jøøl.

¹⁷Wui Wuuö Jwøk, kär wïïa wëëk lääö, kiper a bëëdö naa cøøra nyeŋŋï. Beerra man tïme ni lää wïth jøøa reyø, ni thøwge, ni bëët jwïëcge kar bëët jwïëc jøøa no othøw no onikïïl.

¹⁸Beerra man twöc lëëp jø wø cäänö ki tööt, ni beege jø wø car atade dëët jøøa beyø, ni wø bëëdö ni ŋwöö ni ge jööŋö.

¹⁹Wui Wuuö Jwøk, da gïï mo beyø mo thööth mo iï cïp piny kiper jø wø lwäär ki ïïni, ni beege jø wø kan dëëtge buutï, ni gïïögø tïïyï ni nëënö jï jiy bëët.

²⁰Jøøgø wø kanï kanø buutï kany mo ba joot, nee gïïa tuut jiyi kiperge nee ba pïïcge dëëtge. Ge wø gwøgï gwøø kar kän marï, niï mäna geni ki gïï mo reyø mo wø käl lëëp jiy.

²¹Pwøc en jï Wuuö Jwøk, kiper kanya bëëda päänya näk ociel dïër, mëër mare ni wø ba jøøl anyoodhe jïra ki jöö mo rëëma ec.

²²Dïkwøŋ cwïnya abwøk, ni kööa, «Ni kara atïmö ni bäär ki ïïni.» 'Ba kwac mara awïnynyï kanya jwöŋa dëërï kiper køny.

²³Uuni bëët, u na cwïnynyu en køør Wuuö Jwøk, beerra man bëëdu nou mëër ki Wuuö Jwøk. Wuuö Jwøk bëëdö ni gwøga jøøa näk marge adïëri; 'ba gïn wø rømi ki jø atöör tïïe tïïö dëëtge.

²⁴U bëët ni wø ŋääth køny mar Wuuö Jwøk, bëëdu nou teek, ni cwïnynyu you maaø.