Read anuak Dut Pwøc 32 Bible Online

Dut Pwøc 32 - anuak bible

Dut Pwøc 32

¹Manøgø beeye duut Deebit. Gwïëth en bäät ŋat mo raay moe owiiø, ni moa baae orïëbö.

²Gwïëth en bäät ŋat mo bääyö mare ba kwaan Wuuö Jwøki bääte, ni bëëdö ni bäŋ cwøk cwïnye.

³Wui Wuuö Jwøk, kanya bëëda ni bääyö mara kära caanø, dëëra aput ränynyö ki køør kïmmö mana bëëda naa kïmmö ki gø cooth.

⁴Kiper waŋcäŋ ki wäär cerï atïmö ni ena dëëra; ni ö teek mara ni ränynye kaamar luum man wø raany cäŋ öörö.

⁵Køøre bääyö mara acaana jïrï, ni kära gïna raac na tïïa kanø; aana köö, «Ni gïïa baaa caana caanø jï Wuuö Jwøk.» 'Ba ki køør mana nø caana gø, bääyö mara na dwøŋ aputï wec.

⁶Kiper manøgønø, beerra man ö jiyi bëët moa cwïnyge en køørï ni kwacge ïïni kany bëëdï niï nut en; køøre, këël gïï mo leth doo öö kaamar jwïïö mo raanynya piny, bäŋ gïn mo pïï bäätge.

⁷Beeye ïïni ni wø kana raa buute, ni bee ï ni wø koor aani yïth gïï mo leth; ni laga wø cielï cielø ki jø wø wär ki dut køny.

⁸Ï wø köö, «Niï pwönynya pwönynyö ni nyuunhnha ïïni ki jöö mana diï cäädhö ki yie, ni pwönynya ïïni thuwø ni waŋa ena bäätï.

⁹Kärï tïmö kaamar okweeny wala gääŋŋö ni wø bäŋ gïn ŋääe, ni wø tïïc ni maa piny ka kaw mar dhee kiper nee bëëde buutï.»

¹⁰Ŋat ma ŋat adhala wø jïtö ki gïï mo leth mo thööth, 'ba ŋat wø ŋääth Wuuö Jwøk, mëër mo ba jøøl ena bääte.

¹¹U ni bëëtö maru beer, bëëdu ni yïthu met ni kanynyu ki køør Wuuö Jwøk. U ni cwïnynyu thïïŋ bëët, pwøyu Wuuö Jwøk ni döötu ena maal ni yïthu met.