Read anuak Dut Pwøc 33 Bible Online

Dut Pwøc 33 - anuak bible

Dut Pwøc 33

¹Manøgø beeye duut Deebit. Wui, u ni maru beer, wärru ni yïthu met jï Wuuö Jwøk; pwøc mïërö ka ŋat mo mare thïïŋ.

²Pwøyu Wuuö Jwøk ki thoom-othïënhö; wärru ki dut pwøc jïre nou pöödö ki thoom mo thøøli moe apaar.

³Wärru jïre ki duut mo nyään, pwötu thøme ni nyeŋŋu reegø, ni döötu ena maal.

⁴Kiper luum Wuuö Jwøk thïïŋ, ni tïïc mare bäre tïïe no oŋäädhö.

⁵Wuuö Jwøk yie met ki bëëtö mo beer ki ŋøl ma kare, ni piny bäre päŋ ki mëër mare ni wø ba jøøl.

⁶Wuuö Jwøk maal acwääe ki køør dwøre, ni cwääc gïïa en yie bëët ki jam dhee.

⁷Pï naama dwøŋ acooŋe kaamar acooŋ beel, ni cooŋ ge yïth kudi kaamar beel mo ocooŋ yïth odïï.

⁸Beerra man ö pinynyi bäre ni lwäär Wuuö Jwøk; beerra man ö jø bäät piny bëët ni bëëtge ni yïthge othäŋŋö ki eni.

⁹Kiper ena cäänö ki dwøre, ni put piny cwääc ki gïïa en yie bëët, ni ö mana caane ni thur kare.

¹⁰Wuuö Jwøk acaara mar wïth juurre di raanynyø; eni acaac jiy wø tïïe tïïö nee ba thurge karge.

¹¹'Ba acaara mar Wuuö Jwøk bëëdö na bäre bäre, ni ö acaare mo wø caare ni bëëtge ni nut këël yïth beenhnhe bëët.

¹²Gwïëth en bäät jø wø Jwøge beeye Wuuö Jwøk, jøøa näk ee jierø na moe.

¹³Wuuö Jwøk wø räŋŋö ki maal ni raŋ piny, ni joot jiy bëët,

¹⁴ni raŋ jøøa bëëdö bäät piny bëët ni räŋŋi ka kar bëëtö mare.

¹⁵Bee eni na cwääc cwïnyge bëët, ni tïïe moge bëët ŋääe.

¹⁶Nyeya bäŋ wø bøth ki thøø kiper jø leny moe na thööth, ni ŋat leny bäŋ wø bøth ki thøø kiper teek mare.

¹⁷Køny mar okweeny leny ba ŋääth, ni eni bäŋ wø kunynyi kaper teek mare na dwøŋ.

¹⁸Ka adïëri møn, waŋ Wuuö Jwøk ena bäät jø wø lwäär ki eni, jø wø ŋääth mëër mare ni wø ba jøøl,

¹⁹nee ge kønye cer thøø, ni gwøk geni nee kwøwge kany wø dee käc.

²⁰Øøni, ø bëëdö nøø raŋŋa jï Wuuö Jwøk; bee eni na dïkunyi marø, ni ena kwöt leny jïïø.

²¹Ka adïëri møn, met ec marø joodø baŋe, kiper ø ŋäätha nyeŋŋe na en kur keere.

²²Wui Wuuö Jwøk, beerra man ö mëërri marï ni wø ba jøøl ni bëëde bäätwa, kaawat man bëëde niï ewa ŋäädhö en.