Read anuak Dut Pwøc 34 Bible Online

Dut Pwøc 34 - anuak bible

Dut Pwøc 34

¹Wuuö Jwøk wø pwøa pwøø cooth, ni bëët pwøci dhaa man wø pwøa eni ki gø.

²Aani, Wuuö Jwøk pwøa pwøø kiper gïïa tïïe; beerra man ö jøøa canni ni wïnyge gø ni mïn yïthge.

³Beerra man jiemø Wuuö Jwøk na aciel, ni tïŋø nyeŋŋe maal ø bëët.

⁴Wuuö Jwøk akwaaa, ni løk kwac mara, ni køny aani dhøk gïïa lwäära bëët.

⁵Jø wø raŋ jï Wuuö Jwøk, täärnyïmge tïmö ni waany ni ba lää wïthge këët.

⁶Aani, kanya bëëda yïth gïï mo leth, aana jwöŋö dëër Wuuö Jwøk, ni ö Wuuö Jwøki ni wïny dwøra, ni køny aani yïth gïïa leth bëët na en dëëra.

⁷Nyïïatwiet maal mo Wuuö Jwøk rege wø cielge cielø lak jø wø lwäär ki Wuuö Jwøk, ni piemge geni.

⁸Bel bëët Wuuö Jwøk, nee jootï møn ni eni beer; gwïëth en bäät ŋat wø kan ree buute.

⁹U na jic Wuuö Jwøk, lwäärru Wuuö Jwøk, kiper jø wø lwäär ki eni bäŋ gïn cange.

¹⁰Këël nyïï ŋuuwe ge wø cännö ni nägi ya käci, 'ba jø wø cac Wuuö Jwøk bäŋ gïn mo cange ri moa beyø bëët.

¹¹Ööu, u na nyïïa, ni wïnynyu mara, u pwönynya pwönynyö ki jöö man lwäärru Wuuö Jwøk ki gø.

¹²?Aŋa dïïu ni cac kwøw, na aŋa dïïu ni yie met ki man bëëde ni kwøw ki cwiiri mo thööth nee gïï mo beyø joode?

¹³Beerra man ö ŋatøgø ni gwøk leebe ki raay, ni män dhee ki luup cwøk.

¹⁴Beerra man ö ŋatøgø ni tïïc kare ni bäär ki raay, ni tïïc gïna beer, ni many bëët-mëër, ni caath køør gø døc.

¹⁵Nyeŋ Wuuö Jwøk ena bäät jøøa beyø, ni ïthe ee ciiø ki kwac marge.

¹⁶Täärnyïm Wuuö Jwøk cøl ki jø wø tïïc raay, ni tïïc ge nee wïc ba par ki geni bäät piny këët.

¹⁷Kany wø ö jøøa beyø wø jwöŋge kiper køny, wïny Wuuö Jwøki wïnynyö, ni køny geni yïth gïïa leth bëët na pïï dëëtge.

¹⁸Wuuö Jwøk kare cään ki jø wø näk cwïnyge opädhö, ni bëëdö ni køønynya geni.

¹⁹Gïï mo leth mo thööth wø tägö dëër ŋata beer, 'ba eni wø køny Wuuö Jwøki kønyø yïth gïïögø bëët.

²⁰Wuuö Jwøk ŋatøgø wø gwøe gwøø, ni bäŋe cöönne aciel mo toor.

²¹Jø wø tïïc raay näk raayi nääö, ni ö jø wø män ki jøøa beyø ni jääli.

²²Wuuö Jwøk jiye wø wïïle wøk, ni bäŋe aciel mo di jäälö dëët jø wø kan rege buute.