Read anuak Dut Pwøc 35 Bible Online

Dut Pwøc 35 - anuak bible

Dut Pwøc 35

¹Manøgø beeye duut mana cak Deebiti kanya cøøk ree nyïm nyeya ma Abimëlëk ni ena bøøl; ni riemmi ni put aay. Wui Wuuö Jwøk, ŋäbï ki jø wø ŋäbö ki aani, ni këëdï ki jø wø këëdi ki aani.

²Kwany kwöt leny marï, ni ööï maal ni kønyï aani.

³Lwør tøŋ marï ni këëdï ki jø wø ŋwiec køøra, niï nyootha gø jïra ni beeye ïïni na dïkunyi mara.

⁴Beerra man lää wïth jø wø many man 'näkge aani, ni räny nyeŋge; beerra man kier wïth jø wø cädö ki gïï mo reyø nee tïïcge dëëra, ni riem ge.

⁵Beerra man køøl ge kaamar lethø mo okøøl jame, ni beeye nyïïatwiel maal marï, ï na Wuuö Jwøk, noo køøl geni.

⁶Beerra man tïm jöörge na muudhö ni da adipøødha, ni ö nyïïatwiel maal marï, ï na Wuuö Jwøk, ni ŋwiec køørge.

⁷Kiper geni akupa acekge kipera jaak, ni kunyge ki buur kipera ki gïn mo bäŋ tiere.

⁸Beerra man räny ge ni cwöba dëëtge, ni päth akumma cekge keerge bäätge, ni päthge yi ränynyö.

⁹Køøre nø, yia omïnni ki ïïni, ï na Wuuö Jwøk, ni kanynya kiper mana kønyï aani.

¹⁰Ni kööa ki cwïnya bäre, ni «?Wuuö Jwøk, aŋa ni pääri ki ïïni? Beeye ïïni ni wø køny ŋata no ocaannø cer ŋata teek døc ni kaala eni, ni køny ŋata no ocaannø na can cer ŋat wø twier gø.»

¹¹Jiy mo caana luup mo patha adïëri aö maal, ni kïthge bääta ki luup mo kuua.

¹²A wø duunge duunnö ki gïn mo raac na kar mana beer, ni thøøa ki pänh cwïny.

¹³'Ba aani, kanya bëëtge ni ge tuu, aana tïmö naa käära keeca na abïï ki køør kïmmö mara kiperge, ni dwøga dëëra piny ni bëëda ni aano kweer ki cam, naa lämö ni wïïa yaa kuul piny.

¹⁴Aana jwöŋö kaawat mana daa jwöŋö kiper nyawatwa wala coka, naa bëëdö kaamar dhaanhø mo jwøga menni, ni wïïa yaa kuul piny naa kïmmö.

¹⁵'Ba kanya jootge aani naa ena yïth gïï mo leth, yïthge amïnnö ni cooŋge røkge kanya ciel; jø wø tïïc gïï mo reyø dëëtge adwalge kipera ni kuua, ni bëëtge ni ge waya nyeŋŋa, ni ba wecge.

¹⁶Gena kwääk bääta ni ge ŋeethø, ni kaacge lakge bääta.

¹⁷?Wui Wuuö Jwøk, a kany mo nyïëdi nø noo bëëdï niï räŋö jaak? Køny aani yïth gïïö ni leth ni wø temge yøø, ni gwøgï jwïëya ceŋ jiy moi ni caal ŋuuwe ii.

¹⁸Ï pwøa pwøø dï acooŋ jøøa thööth, ni pwøa nyeŋŋi dï lwaak.

¹⁹Kär yïth nyïïmänna wëëk mïnnö bääta, jø wø män ki aani jaak. Kär nyïïmänna tïïyï nee nyeŋge niiŋge bääta, jø wø män ki aani ki gïn mo bäŋ tiere.

²⁰Kiper ge ba cäänö ki luum mëër, 'ba ge wø caana luum cwøk dëët jø wø bëëdö jaak paac.

²¹Gena kwöŋŋö bääta, ni köge, ni «Wui, wui, ïïna jootwa ki nyeŋwa kiree.»

²²'Ba ï na Wuuö Jwøk, gïnögø ajootï; kärï lïŋö. Wui Wuuö Jwøk, karï kär tïïyï ni bäär ki aani.

²³Ö maal ni cwagï aani, ni cäänï kipera, ï na Jwøk mara ni bee ï na kwääya.

²⁴Wui Wuuö Jwøk, ï na Jwøk mara, ŋun aani, ki køør adïëri marï, ni tïïyï ge nee yïthge ba mïnge bääta.

²⁵Ge kär tïïyï nee cäänge ki cwïnyge ni köge, ni «Gïna manywa ajootwa.» Ni ba tïïyï ge nee köge, ni «Ena raanywa.»

²⁶Jøøa näk yïthge met ki gïna tägö dëëra, wïthge olääi ni räny nyeŋge bëët; jøøa tïïc dëëtge ni døøŋŋø bääta, lään wïc bëëde bäätge kaamar abïï.

²⁷Jø wø yïthge met ki man ŋun aani, wär kwöŋge ki met ec, ni cäänge ni nøøcge nøøyø ni ge köö, ni «Dwøŋŋa Wuuö Jwøk, eni ni wø yie mïnni kany wø tïm bëët dhaanhnhe ni beer.»

²⁸Køøre nø, adïëri marï køba købø, ni bëëda naa pwøya ïïni cooth.