Read anuak Dut Pwøc 39 Bible Online

Dut Pwøc 39 - anuak bible

Dut Pwøc 39

¹Manøgø beeye duut Deebit mana par wï Jwøk ki gø. Aana cädö ni kööa, ni «Dëëra gwøa gwøø ki gïno caana, kiper nee leeba ba bääye. A bëëdö ni dhaa yaa gwøø, kany wø nut jø raayi buuta.»

²Aana bëëdö naa lïŋö jaak naa ba luubö; 'ba lïŋŋö mara bäŋ gïn mo ee kønyø, ni ö pänh cwïnynyi mara ni cääth nyïme.

³Yia acwat døc, ni cwat ec mara kadhi ka kanya cäda. Køøre aana lämö ni kööa,

⁴«Wui Wuuö Jwøk, beerra man pwönynyï aani kiper aŋuun kwøw mara, ki kwään nïne moo beeda, nee ŋääa ni nïr kwøw 'moa ba kän wøk ki kany mo bäär.

⁵Neenï, nïr kwøw 'moa atïïyï ni nøk, ni tïm nïne moo beeda ni bäŋ karge ki baŋï. Adïëri møn, dhaanhø ni bëëdö ni kwøw en caala jamø jaak.

⁶Adïëri møn, bëët dhaanhø caala tïpö, ni dijal mar jiy bäŋ gïn duue møn; dhaanhø jammi wø cooŋe cooŋø kiper dëëre, 'ba ŋato käl ge kuue.

⁷«?'Ba ennø, ï na Wuuö Jwøk, agïnaŋø noo dööŋ këët nø? Aani, a ŋäätha ïïni.

⁸Køny aani yïth raay 'moa bëët; kär a wëëk jøøa näk bäŋ wïthge naa jøøŋge.

⁹A bëëdö naa ba luubö, ni dhaa ba jaala, kiper bee ïïni na tïïc gïïögø bëët.

¹⁰Kär a jäälï këët, kiper aana tïmö naa manynya thøø ki køør pöödö marï.

¹¹Dhaanhø wø joogï jooø niï pwönynya gø kiper raay moe, ni raanynyï gïï wø mëëre ki geni kaawat man wø tïïc alweela; ka adïëri møn, dhaanhø caala jamø jaak.

¹²«Wui Wuuö Jwøk, wïny lam mara, ni cegï ïthï ko oduuru mara; kär ïthï dhïŋï ki jwøk mara. Kiper a bëëdö buutï naa caala dhaanhø mo path, naa bëëdö ni aana wëëllö kaawat mana bëët kwäya bëët.

¹³Wec a turu, kiper nee yia mïnne kany poode naa poot kär thøw en.»