Read anuak Dut Pwøc 40 Bible Online

Dut Pwøc 40 - anuak bible

Dut Pwøc 40

¹Manøgø beeye duut Deebit. Aana bëëdö naa raŋŋa jï Wuuö Jwøk; køøre ïthe aciie ni wïny oduuru mara.

²Ni tuut aani wøk ki yi buur mo raac, ni käl aani wøk ki yo odhöönh; ni cïp a bäät kïdi, ni kïth aani kany mo bäŋ gïn mo pïï dëëra yie.

³Dhaa acäŋŋe ki duut mo nyään, na man wø pwøa eni ki gø, eni na Jwøk marø. Gïïa tïïe oneen jiy mo thööthi ni lwäcge, ni tïmge ni ge ŋäätha Wuuö Jwøk.

⁴Gwïëth en bäät ŋat wø ŋääth Wuuö Jwøk, ŋat wø ba raŋ jï jø atöör, jø wø gaa wøk køør luup mo patha adïëri.

⁵Wui Wuuö Jwøk, ï na Jwøk mara, ïïna tïïö ki gïï mo thööth mo rëëma ec, niï lääŋŋa waani cooth. Bäŋ ŋat mo röömi ki ïïni. Këël a doo köö ni gïr gïïa tïïyï caana caanø, tïmö ni thööth døc ni ba løny ki caan.

⁶Wui Wuuö Jwøk, yiï ba met ki muuce mo beel ko olämme mo wø cïp; këël olämi man wø waaŋ bäre ko olämme mo wø cïp kiper raay, ï kär pëëö kiperge; 'ba aana mooyï ki ïdhi nee marï wïnynya.

⁷Køøre aana köö, na «A nut ennø, kaawat mana no ogöörö yi Wëël Jwøk kipera.

⁸Ïïni na Jwøk mara, yia met ki man tïïa mana manynyï; ciik moï ena cwïnya.»

⁹Luup moa met kiper køny marï akøba dï acooŋ lam mana dwøŋ. Wui Wuuö Jwøk, ŋäyï naa kär lïŋö ki car luupögø.

¹⁰Aani luum køny marï kära mooŋø, 'ba adïëri marï ki pïëm man wø piemï jiy ki gø akøba. Aani mëër marï ni wø ba jøøl ka adïëri marï kära kanø ya acooŋ lam mana dwøŋ.

¹¹Wui Wuuö Jwøk, kär bäth ec marï mänï ki aani, beerra man ö mëërri marï ni wø ba jøøl, ka adïëri marï ni bëëtge ni gwøga aani.

¹²Kiper gïïa reyø mo ba løny ki kwaan, aana cielge dïër; gïïa baya aana makge, ni tïïcge aani naa ba räŋö; gena tïmö ni thööth døc ni kaala jïëc wïïa, ni ö cwïnya ni pädhe.

¹³Wui Wuuö Jwøk, beerra man piemï aani. Wui Wuuö Jwøk, laar rwänh kuna kønyï aani.

¹⁴Jøøa many man 'näkge aani, beerra man lää wïthge ni kier wïthge bëët. Jøøa yïthge met ki caannø mara beerra man riem geni ni räny nyeŋge.

¹⁵Beerra man ö jø wø buu aani ni bwøk cwïnyge ki køør lään wïc marge.

¹⁶'Ba jø wø cac ïïni bëët beerra man mïn yïthge ki ïïni ni kanyge, ni ö jø wø yïthge met ki køny marï ni cäänge ni nøøcge nøøyø ni ge köö, ni «Dwøŋŋa Wuuö Jwøk!»

¹⁷'Ba aani, aano caannø naa bëëdö naa can; 'ba ï na Wuuö Jwøk, beerra man lääŋŋï aani. Bee ï ni wø køny aani, ni bee ï ni wø piem aani; Wui ï na Jwøk mara, kärï ruu.