Read anuak Dut Pwøc 46 Bible Online

Dut Pwøc 46 - anuak bible

Dut Pwøc 46

¹Manøgø beeye duut wäät Köra, na cakge kiper nywöm mar nyeya. Jwøk beeye kar kan røk marø ni ena teek marø, ni eni kare cään ni wø laara kunynyö kany wø näk da gïï mo leth.

²Kiper manøgønø, këël piny doo tïmö ni jäŋŋi, ni ö kïte ni leeŋge rege dï naama dwøŋ; ni ö pïïe ni lwörge ni neekum ki bööyö, ni ö kïte ni jäŋge rege ka athaga mare, ø ba doo lwäyö.

⁴Da naam mo døøya yïth jiy mo met yi pääny mar Jwøk, ni beeye kar bëëtö mana en kur keere mar Jwøa Dwøŋ ni en Maal.

⁵'Ba Jwøk ena dï päänyögø, ni bëët päänyögø ni ba ränynyi, ni päänyögø wø laar Jwøki ka køny.

⁶Wïth juurre atïïö ko okiera, ni ö akwömmi ni päthge; køøre Jwøk mare acaane, ni tïm dëëtge ni rïïŋö.

⁷Wuuö Jwøk, eni na wïth jammi bëët, ena buutø, eni na Jwø Jeekap bee eni ni wø kanø røø buute.

⁸Ööu ni neennu tïïe mo Wuuö Jwøk, eni na tïïc gïï mo rëëma ec bäät piny.

⁹Lenye wø jooe jooø bäät piny bäre, ni tøy athëëre ni ŋør tøøŋi, ni waaŋ jïëth leny mo wø tut okwëënyi.

¹⁰'Ba Jwøk aköö, ni «Lïŋu nø, ni ŋäyu gø ni aana Jwøk. Kara tïmö ni dwøŋ dï wïth juurre, ni tïm kara ni dwøŋ bäät piny bäre.»

¹¹Wuuö Jwøk, eni na wïth jammi bëët, ena buutø, eni na Jwø Jeekap, bee eni ni wø kanø røø buute.