Read anuak Dut Pwøc 49 Bible Online

Dut Pwøc 49 - anuak bible

Dut Pwøc 49

¹Manøgø beeye duut wäät Köra. Dïbwör bäre, beerra man wïnynyu gïn. Cegu ïthu, u bëët, u ni bëëdö bäät pinyi en,

²u na kwöru døøŋŋø ki u na kwöru bäŋgø, ki jiy moa can ki moa näk okwär bëët.

³A cäänö naa caana luup leec wïc, na acaare 'moa tiet luup nyoothge nyoodhø.

⁴Aani, ïtha ciia ciiø ki pwöc leec wïc, kiper nee tier gø caana ki yi duut mano wära ki thoom.

⁵?Aŋø, a lwäya kiper ŋø kany wø dee gïï mo leth, kany wø ö raayi mo jø wø gëëmö ki aani wø cielge aani dïër?

⁶Jøøgø, ge ŋäätha kwär marge, ni ge wø töödö kiper jap kwär moge na thööth.

⁷'Ba bäŋ dhaanhø mo løny jïre ki man wïïl jwïëye wøk, wala cïpa gät jwïëye jï Jwøk,

⁸kiper nee bëëde ni kwøw na bäre bäre, ni ba thøw; kiper gät jwïëy teek døc, ni bäŋ gïn rømi ki gø.

¹⁰Kiper ŋäc jøwi bëët ni këël jøøa näk wïthge leer, ge thøw, ni jøøa näk wïthge ba leer ki moa näk wïthge bäŋ acaara bëët ge poot thøw thuwø, ni dööŋ jap kwär moge jï jø møøk.

¹¹Bwör moge bëëdö na uudi moge na bäre bäre, ni bëëtge na kwör bëëte moge këël yïth beenhnhe moo ööi bëët; ni ö pwöthi moa näk nyeŋge ege caa rege ni dööŋge wøk.

¹²Këël dhaanhø okwär, eni ba ruu; eni caala lääy mo thøw jaak.

¹³'Ba aŋuun bëët jøøa näk ŋäätha oballe, ki jøøa caath køørge ni wø jïëc luupge beeye en:

¹⁴ge thøw kaamar dïëk jaak, na aŋuun bëëtö marge beeye yi bwörö, ni tïm thøøe na dïkwääy marge; ni tïmge ni ge ena tiet jøøa näk marge thïïŋ kanyo ruu øwi, ni tïmge ni bäŋ kar bëëtö jïge këët, ni ö dëëtge ni ränyge yi bwörö.

¹⁵'Ba aani, jwïëya wïïl Jwøki wøk cer teek thøø, ni kïth aani baŋe.

¹⁶Käru lwäyö ki dhaanhø kany wø kwäre, kany wø tïm jap paare ni thööth.

¹⁷Kiper kanyo thøøe, bäŋ gïn mo kääre noo aae; eni ba ci piny ki jap paare na aciel.

¹⁸Këël eni doo bëëdö ni pwøya dëëre keere kany bëëde ni kwøw en, ni jiy pwøya eni kiper kwär mare,

¹⁹eni poot cøøa kanya ci kwäye yie, jøøa näk tar ba jootge këët.

²⁰Dhaanhø mo okwär mo ba cädö, caala lääy mo thøw jaak.