Read anuak Dut Pwøc 5 Bible Online

Dut Pwøc 5 - anuak bible

Dut Pwøc 5

¹Manøgø beeye duut Deebit. Wui Wuuö Jwøk, wïny kwac mara kany wø läma, ni wïnynyï cooyø mara.

²Ï na nyeya mara ni bee ï Jwøa, wïny oduuru mara, kiper a wø kwaaya ïïni.

³Wui Wuuö Jwøk, ka amöölla dwøra wø wïnynyï wïnynyö, kany wø läma naa køya man wø løgï jïra.

⁴Kiper ï patha Jwøk mo yie met ki gïï mo reyø, niï bëëdö ni bäŋ raay mo nyänh buutï.

⁵Ŋat ma ŋat ŋwøc ba cuŋŋi nyïmï; niï bëëdö niï män ki jiy bëët mo wø tïïc gïï mo reyø.

⁶Jø wø cäänö ki tööt wø raanynyï raanynyø, niï män ki ŋat cwøk ki ŋat wø rem jiy met jïre.

⁷'Ba aani, a wø dunynya yi ødï ki køør mëër marï na dwøŋ ni wø ba jøøl. A wø lämö ni cøŋŋa yaa këël piny yi øt lam marï na en kur keere naa wøøra ïïni.

⁸Wui Wuuö Jwøk, bwøth aani ki jöör adïëri marï, kiper jïra da nyïïmän; ni tïïyï jöörï ni thïïŋ nyïma.

⁹Kiper jøøgø ki dëëtge bäŋ adïëri dhøkge, ni cwïnyge päŋ ka aranya, ni lwöcge bëëdö kaamar bwör mo ŋammø, ni ge cäänö ki lëëpge ni marge cwøk.

¹⁰Wui Jwøk, ŋøl luubö marge ni jäälï ge; beerra man ränyge ki køør luup moa tuutge keerge; ni riemï geni wøk kiper gïïa tïïcge na thööth na reyø, kiper ge bëëdö ni ge gëëmö ki ïïni.

¹¹'Ba beerra man ö jø wø kan dëëtge buutï bëët ni mïn yïthge, ni bëëtge ni ge wär ki dudi cooth ni yïthge met; niï bëëdö niï koora geni, ni ö geni na mëër ki ïïni ni jiemge ïïni ni yïthge met.

¹²Kiper bee ï na Wuuö Jwøk ni wø gwïëth ŋat wø bëëdö ki bëëtö ma adïëri, ni ö mëërri marï ni bëëde na gëëŋi kaamar kwöt leny.