Read anuak Dut Pwøc 50 Bible Online

Dut Pwøc 50 - anuak bible

Dut Pwøc 50

¹Manøgø beeye duut wäät Köra. Wuuö Jwøk, Jwøa teek, acäänö, ni cwøl jø bäät piny bëët, ni tägi ka jï løø kur tuul-cäŋ, ni pïïe jï løø kur pänh-cäŋ.

²Jwøk ree wø nyoodhe ka bäät Dhayan, paana näk wøp ni mïërö døc.

³Eni na Jwøk marø öö, ni ba nikïïl, ni ööi ni nyïme da maac mo räänyö, ni buute da atuunna mo dwøŋ.

⁴Ni cwøl maal, ni cwøl piny, kiper nee luup jiye ŋøle buutge.

⁵Ni kööe, ni «Cuuŋu jiy 'moa buuta kany moa näk cwïnyge ena køøra, jøøa jïëy ki man tutge ki luubö ki aani, na twöc luummögø ki køør olämi.»

⁶Maal gïr beeny Jwøk caane caanø, kiper Jwøk ki dëëre beeye dïŋut luup.

⁷Jwøk aköö, ni «Uuni na jiya, wïnynyu gïn caana en; uuni na jø Icriel, mara caana caanø dëëtu; aana Jwøk, ni beeye aani na Jwøk maru.

⁸U ba jääla kiper olämme mou mo wø cïpu; olämme mou mo wø waaŋ mo wø cïpu nut nyïma cooth.

⁹'Ba aani, a ba jïëy ki man käda ki rwädhe mo wø käl baŋu, wala nywø ateea mo wø kälu ki dï pïïth.

¹⁰Kiper lääc paap bëët beege 'moa, ki dhäk ki dïëk moa en yïth pwöle mo ba kwaan.

¹¹Weny moa en paap bëët ŋääa, këël lääy moø ni en yi pwöla bëët yøø beege 'moa.

¹²'Ba doo na aano näk käci, ba daa caana jïïu, kiper piny beeye mara ki gïïö ni en yie bëët yøø.

¹³?Aŋø, a wø cämö ki rïŋ rwädhe, naa wø mädhö ki rem atëëe?

¹⁴Cïpu pwøc no olämi jïra, a na Jwøk, ni cïpu gïïa kööŋŋu ki ge jïra, a na Jwøa Dwøŋ ni en Maal.

¹⁵Ni cwøllu aani kany wø näk mo u ena yïth gïï mo leth; u kønya kønyø ni wøørru aani.»

¹⁶'Ba Jwøk aköö jï ŋat raay, na «?A teega ŋø ni en jïrï ni wø caanï ciik 'moa en, naa teega ŋø ni en jïrï ni maaï luumma tuuda ki jiya dhiï en?

¹⁷Kiper ï män ki man pwöny ïïni, ni luupa iï leeŋ ŋääï.

¹⁸Ni kany wø jootï kuu, tïïyï tïïö na nyawadu, niï wø dwätö ki jø luuy.

¹⁹Dhiï atïmö ni kwel ki caan gïï mo reyø, ni tïm leebï ni cara cwøk.

²⁰Ï wø bëëdö ni ïïno pï piny niï jøøŋŋa coku, niï wø waya nyeŋ ŋata lwaar meru ki gø kiree.

²¹Gïïögø bëët atïïyï, 'ba aana lïŋö jaak; ki jïrï naa caala ïïni. 'Ba ennø, ï jääla jäälö, ni caana gïïa tïïyï na aciel aciel ni nyeŋŋø yøø kemø.

²²«'Ba ennø, wïnynyu gïn, uuni ni taak Jwøk en; 'ba ni näk mo ba wïnynyu, u raanynya raanynyø, ni tïme ni bäŋ ŋat køny uuni.

²³Ŋat wø cïp pwøc no olämi jïra wøøra aani, ni ööa ni nyoodha køny mara jïre, eni ni wø jiiŋ bëëtö mare na kare.»